1 Namumlavilira tambiku Mtuwa Mlungu gwenu, ng'ombi ama kondolu ama mbuzi yakawera na shidoda shoseri, toziya Mtuwa Mlungu kazikalalira tambiku za ntambu azi.

2 Muweza kupikanira kuwera mpalu ama mdala pakati penu yakalikala mumiji Mtuwa Mlungu yakawapanana, yomberi kawoneka katenda ukondola kwa kulilema lipatanu lilii Mtuwa Mlungu lyakalitenditi kwa mwenga, 3 kwa kuwaguwira na kuwatendera wamilungu wamonga ama kuguguwira mshenji ama lyezi ama ntondu, vintu avi Mtuwa Mlungu kalagaliriti naviguwiruwa. 4 Handa muntu yoseri pakawagambira kwana muntu katenda hangu, su mwenga mushiloliloli weri shitwatira ashi. Na paiwoneka shisoweru shamgambirituwi shanakaka kuwera shintu shikontola shilawira kwa Waisraeli, 5 su mwenga mumlaviyi muntu ayu kunja kwa mji na mumlagi kwa kumgumanga mabuwi. 6 Mwenga mlekiziwa kumlaga handa kwana wakapitawu wawili ama watatu yawawoniti ntambu yakatenditi muntu ulii. Nakalaguwa muntu ulii handa kwana ukapitawu wa muntu yumu hera. 7 Wakapitawu walii ndo hawanji kumgumanga kwa mabuwi, shakapanu wantu wamonga hawamgumangi mabuwi. Kwa kutenda hangu, ukondola awu haupeli pakati penu.

8 Pamonga hakulawiri masitaka mushizyungu shenu yagawera makulu kugatoza, gambira muntu pakamtenduwa muyaguwi ama kumlaga muyaguwi, pakatenda kwa kuvimana ama pota kuvimana. Pagalawira aga, mwenga mgendi pahala Mtuwa Mlungu gwenu pakapasyaguliti mumguwiri, 9 na kulii hamuwagenderi watambika walii yawawera Walawi pamuhera na mtoza yakawera mulihengu shaka ashi, su mwenga hamlaviyi masitaka kulongolu kwawu, weni hawatakuli utoza wawu. 10 Mwenga hamtendi kulawirana na shilii womberi shawagenda kuwagambira pahala Mtuwa Mlungu pakapasyaguliti mumguwiri. 11 Mjimiri kulawirana na malagaliru gagawafunditi mwenga pamuhera na shilii shawamlila gagawapanani mwenga. Namgalambula shoseri mushilii shawamuliti. 12 Muntu yoseri yakawoneka kamshera ndiri mtambika ama mtoza yakatulituwiti kumtendera Mtuwa Mlungu gwenu, yomberi hakalagwi. Ntambu ayi hamumalili ukondola pakati penu mu Israeli. 13 Wantu woseri hawapikaniri na kutira, su hapeni watendi kayi shintu pota kulishera.

14 Mwenga pamwingira muisi ilii Mtuwa Mlungu yakawapanana muitoli kwa makakala na kulikala amu, handa mwenga pamtakula, twenga hatusyaguli mfalumi katukolimlima gambira isi zyamonga zyazituzyengeta ntambu yaziwera. 15 Mwenga muliloli weri kuwera muntu ulii yamgenda kumsyagula kuwera mfalumi, kaweri muntu ulii Mtuwa Mlungu yakamsyaguliti. Yomberi kaweri Mwisraeli, namusyagula muntu yakawera ndiri Mwisraeli kaweri mfalumi gwenu. 16 Pamuhera na hangu, mfalumi nakawera na wafalasi wavuwa kwajili ya shonta lyakuyi mweni, ama kuwatuma wantu wagendi Misri kuhemera wafalasi, toziya Mtuwa Mlungu kakuberiziyani, nakamu namuwuya kayi Misri! 17 Mfalumi nakayuga wadala wavuwa, toziya pakatenda hangu, wadala walii hawamtendi kaleki kumguwira Mtuwa Mlungu. Viraa nakawera na ulunda uvuwa. 18 Yomberi pakawera mfalumi gwenu, kaweri na nakala ya shintora sha malagaliru aga gagatulituwiti na watambika wa shiyuwuku sha Lawi. 19 Nakala ayi hakaweri nayu na kuibetula mashaka goseri mumakaliru gakuyi, su kapati kulifunda mweni kumtira Mtuwa Mlungu gwakuwi kwa kuvijimira visoweru vya lilagaliru lilii na mashariti aga. 20 Aga hagamtendi yomberi nakalihola kuwera kaherepa nentu kuliku Waisraeli wayaguwi na kugalema malagaliru ga Mtuwa Mlungu kwa ntambu yoseri ilii. Su yomberi pamuhera na shileri shakuwi hawakolimlima mu Israeli kwa shaka shivuwa.