1 Watambika woseri walii yawalawiti mulikabila lya Lawi, hapeni wahali isi yoseri ilii mu Israeli. Womberi hawalikali kuliya semu ya viboga virii wantu wamonga vyawalaviya tambiku za kulunguziya nakamu mumotu kwa Mtuwa Mlungu. 2 Womberi hapeni wapananwi isi iweri yawu pakati pa walongu wawu Waisraeli, Mtuwa Mlungu ndo yakawera uhala wawu ntambu yakawalagiliti.

3 Lifungu ali haliweri lya watambika kulawa kwa wantu yawalaviya tambiku ya ng'ombi ama kondolu ama mbuzi. Womberi hawampanani mtambika ligulu lya nkanyama lya kulongolu na mankawu na virii vyaviwera mumtima mwa nkanyama. 4 Viraa hamuwapanani viboga vyenu vya kwanja kukamala mumalambu na divayi na lipaki lya mizyetuni pamuhera na mibayira yamuwamoga wakondolu wenu kwa mala ya kwanja. 5 Kulawa mumakabila genu goseri, Mtuwa Mlungu kalisyaguliti likabila lya Walawi waweri watambika wakuwi wa gweka.

6 Handa Mlawi yoseri pakafira mweni kaweza kuwuka mumji woseri ulii wa Israeli na kugenda pahala Mtuwa Mlungu pakapasyaguliti wamguwiri, 7 su pahala palii kaweza kumtendera Mtuwa Mlungu gwakuwi handa watambika, gambira wapalu wamonga mulikabila lya Lawi walii yawatenda utenderu kulii pahala Mtuwa Mlungu pakapasyaguliti wamguwiri. 8 Yomberi hakaliyi lifungu lyakuyi lya tambiku na malaviwu, tembera yomberi kankuwaka mpiya kulawirana na mali za kaya yakuwi.

9 Mwenga pamsoka muisi ilii Mtuwa Mlungu gwenu yakagenda kuwapanana, namfata vitiba vikalaliru vya isi zilii. 10 Napawera na muntu yoseri pakati penu yakamlaviya tambiku mwana gwakuwi mpalu ama mdala mumotu, ama muntu yoseri yakatunga ama yakatenda uganga, 11 ama muhawi ama muntu yakatakula na washamshera ama muntu yakawaluwa wantu yawahowiti wamtangi. 12 Muntu yoseri yakatenda vitwatira vya ntambu ayi, hakaweri shikalaliru kulongolu kwa Mtuwa Mlungu, na kwajili ya vitwatira avi vya kukalalira, Mtuwa Mlungu gwenu kankuwawinga kulongolu kwenu, wantu wa isi ilii yamuigendera. 13 Kumbiti mwenga muweri waminika nakamu kulongolu kwa Mtuwa Mlungu gwenu.

14 Shakapanu Musa kendereyiti kawagambiriti, vipinga vya wantu wa isi ilii mwenga yamgenda kuitola kwa makakala, womberi wawapikaniraga waganga na yawatunga. Kumbiti Mtuwa Mlungu gwenu hapeni kawalekeziyi mwenga kutenda hangu ntambu yawatenda womberi. 15 Badala yakuwi Mtuwa Mlungu hakawajegeri mbuyi gambira neni kulawa pakati pa Waisraeli wayenu, mwenga mfiruwa kumpikanira.

16 Mulishaka lilii lyamjojonikiti kulii kuluseleru lya Lugongu Sinayi, mwenga mumluwiti Mtuwa Mlungu gwenu, twenga tufira ndiri Mtuwa Mlungu katakuli na twenga kayi, viraa tufira ndiri kuwona kayi motu agu mkulu palugongu Sinayi toziya tutira kuhowa. 17 Mtuwa Mlungu kang'ambiriti, shilii shawatakuliti womberi shanakaka. 18 Neni haniwajegeri mbuyi kulawa pakati pawu. Hanumgambiri yomberi ntambu ya kutakula na yomberi hakawagambiri wantu kila shintu shanumgambira katakuli. 19 Handa yoseri yakavijimira ndiri visoweru vyangu virii mbuyi yakavitakula badala ya neni, neni namweni hanumtozi. 20 Kumbiti mbuyi yakatakula badala ya neni shintu shoseri shilii neni numlagalira ndiri katakuli, ama mbuyi yakatakula badala ya wamilungu wamonga, su mbuyi ulii hakalagwi.

21 Kumbiti mwenga muweza kulonga, twenga hatuwezi hashi kuvimana visoweru virii Mtuwa Mlungu kavitakula ndiri? 22 Handa mbuyi gwa Mlungu pakatakula badala ya Mtuwa Mlungu, shintu ashi pashitendeka ndiri ama pashiwera ndiri nakaka, su hamuvimani kuwera visoweru virii vilawa ndiri kwa Mtuwa Mlungu. Mbuyi ayu gwa Mungu hakaweri kankutakula kwa uwezu wakuwi mweni, su namumtira.