1 Shapakanu Musa kawagambiriti Waisraeli, Mugajimiri malagaliru goseri galii na malagizu goseri ganuwafunditi. Handa pagutenda aga, mwenga hamulikali na hamwingiri kuihala isi ilii Mtuwa Mlungu gwa wambuyi wetu kankuwapanana. 2 Namuwongera shintu shoseri ama kupungura shoseri muvilii vyanuwagambiriti. Mugajimiri malagaliru goseri ga Mtuwa Mlungu gwenu, galii ganuwapanana. 3 Maweni mwenga muviwoniti vitwatira virii Mtuwa Mlungu vyakavitenditi aku Baali Peori. Mtuwa Mlungu gwenu kawagamiziyiti wantu woseri pakati penu yawamguwiriti ulaa mlungu aku Baali Peori. 4 Kumbiti mwenga yamuweriti waminika kulongolu kwa Mtuwa Mlungu gwenu, mwenga mulikala mpaka leru.

5 Mloli, neni nuwafunditi malagaliru na malagizu gambira Mtuwa Mlungu gwenu ntambu yakanagalira ntendi, su mugajimiri muisi yamgenda kuhala. 6 Mugajimiri nakamu toziya pamtenda hangu, hamuwalanguziyi wantu wa isi zyamonga kuwera mwenga mwana mahala. Pawapikanira visoweru vyenu kuhusu malagaliru aga, womberi hawalongi, nakaka Waisraeli wawera na luhala na mahala.

7 Kwahera isi yoseri ilii ata paiwera nkulu ntambu gaa, isi ilii mlungu gwakuwi kawera pakwegera nayi ntambu yakawera pakwegera na twenga Mtuwa Mlungu gwenu patumluwa utanga. 8 Kayi kwahera isi yamonga ata paiwera nkulu ntambu gaa, yaiwera na malagizu gagaherepa na teratera gambira aga ganuwafunda lishaka lya leru. 9 Muliloli weri, namulyaluwa vitwatira virii vyamuviwoniti maweni. Nailawira ata mala yimu mumakaliru genu vitwatira avi viwuki mumiyoyu mwenu. Muwatambiri visoweru avi wana wenu na wazukulu wenu. 10 Muwatambiri kuhusu lishaka ilii patugolokiti kulongolu kwa Mtuwa Mlungu gwenu kulugongu Sinayi, palii pakang'ambiriti, guwajojoniri wantu pamuhera, su womberi hawapikaniri shilii shanonga. Nfira womberi walifunda kumgohelera mashaka goseri ga makaliru gawu na kuwafunda wana wawu kutenda ntambu iraa ilii.

11 Su mwenga msegeleriti na kugoloka paluseleru lya lugongu lulii shaka shilii luweriti lyankuyaka motu yagugenditi mpaka kulyera, lugongu ligubikituwiti na lihundu lititi na lyosi. 12 Shakapanu Mtuwa Mlungu kalongiti na wambuyi wetu kulawa pakati pa motu gulii. Wambuyi wetu wavipikaniriti visoweru vyakalongiti kumbiti wamwoniti ndiri ntambu yakawera. 13 Mtuwa Mlungu kawabweleriti womberi lipatanu lyakuyi, lilii mweni kafira mwenga viraa mulijimiri. Kawapananiti malagaliru lilongu. Kagalembiti malagaliru aga muvibawu viwili vya mabuwi gagasongolutuwiti. 14 Na Mtuwa Mlungu kanagaliriti kugafunda mashariti na malagizu aga gamfiruwa kugajimira muisi yamgenda kuitola kwa makakala.

15 Kumbiti muliloli weri! Mtuwa Mlungu kalongiti na mwenga kulawa mumotu kulugongu Sinayi, mwenga mumwoniti ndiri ntambu yakaweriti. 16 Namtenda vidoda kwa kulinyawira maweni vinyagu! Namulinyawira shinyagu shashilifana na muntu mpalu ama mdala, 17 ama shashilifana na nkanyama yoseri pasipanu ama mpongu, 18 ama shashilifana na nkanyama yakalikwakwa pasipanu ama somba yakalikala mumashi. 19 Muliloli weri, pamlola kulyera namjeruwa kuguwira shoseri shamushiwona aku handa mshenji ama lyezi ama ntondu. Mtuwa Mlungu gwenu kaviwumbiti toziya ya wantu pasipanu. 20 Kumbiti Mtuwa Mlungu kawalaviyiti mwenga kulawa Misri, kulii mwenga mtabikiti gambira muweriti mulitanuri lyaliwera na motu gukaripa. Kawalaviyiti aku su muweri wantu wakuwi wa gweka ntambu yamuwera leru. 21 Toziya ya mwenga, Mtuwa Mlungu gwenu kankaliriti neni na kalirapiriti nakaka hapeni ndoki lushemba Yoridani kugenda kwingira muisi yaiwera na mbotu, isi ilii yakakupanani. 22 Mtuwa Mlungu kang'ambiriti kuwera hahowi panu na hapeni ndoki lushemba, kumbiti mwenga mwapakwegera kuloka kugenda kuitola makakala isi ilii yaiwera na mbotu. 23 Muliloli weri, namulyaluwa lipatanu lilii Mtuwa Mlungu gwenu lyakalitenditi pamuhera na mwenga. Namulinyawira shinyagu kusonguluwa mfanu wa shintu shoseri shilii Mtuwa Mlungu gwenu shakatulewelera kushifaniziya, 24 toziya Mtuwa Mlungu gwenu, ndo motu yagwagamaziya, mweni ndo Mlungu yakawera na weya. 25 Pamuhera muisi ilii ya Kanaani, pamlera wana na pamuhera na wazukulu na mwenga pamuhera wazewi, namtenda vidoda kwa kulitendera shinyagu sha kusonguluwa mfanu wa shintu shoseri, ashi shiwera shitwatira shikondora, su Mtuwa Mlungu gwenu hakawakalaliri mwenga. 26 Leru neni hanshemi kumpindi ama pasipanu kulola shilii shamtenda. Handa pamlema kulijimira lipatanu lilii lyanuwagambira, mwenga hamuhowi muisi yamgenda kuhala aku kumwambu kwa lushemba Yoridani. Hapeni mulikali aku kwa shaka shitangara, kumbiti mwenga hamwagamiziwi nakamu. 27 Mtuwa Mlungu hakawapalasiyi mwenga pakati pa isi zyamonga, aku wamu wenu wadidi hawasigali. 28 Mwenga pamuhera aku muisi zyamonga, hamuwaguwiri wamilungu yainyawituwiti kwa mbawu na mabuwi, milungu yainyawituwiti na wantu, milungu ilii yaiweza ndiri kuwona shintu shoseri ama kupikanira shoseri ama kuliya shoseri ama kunusa shoseri. 29 Kumbiti pamuhera muisi azi na pamumsakula nakaka Mtuwa Mlungu gwenu, su mwenga hamumpati handa pamumsakula kwa moyu goseri na rohu yoseri. 30 Mwenga pamuhera muntabiku na vintu vyoseri avi pavilawira kwa mwenga, shakapanu hamumuwuyiri Mtuwa Mlungu na kumjimira. 31 Mtuwa Mlungu gwenu, ndo Mlungu yakawera na lusungu, hapeni kawaleki ama kuwagamiziya ama kulilyaluwa lipatanu lyakuyi lilii lyakalitenditi na wambuyi wetu kwa kulirapa.

32 Muliholi nentu kuusu makashu, mushaka mwenga hamweniyuwuki, kuusu goseri kwanjira Mlungu pakamuumbiti muntu pasipanu. Msakuli kila pahala kumpindi na pasipanu, handa shitwatira sha kulikangasha sha ntambu ayi shipatiti kulawira na kupikana! 33 Hashi, kwana wantu yawapikaniriti kala liziwu lya Mlungu palilonga kulawa mumotu, ntambu mwenga yampikaniriti, womberi wasigariti wakomu? 34 Hashi, kwana mlungu yoseri yumonga yakajeriti nakaka kugenda kulitolera wantu wakuwi kulawa muisi yamonga, gambira Mtuwa Mlungu gwenu ntambu yakatenditi kwa kutumiya majeru na malangaliru na makangashu, kwa ngondu na kwa makakala gakuyi makulu, katenditi vitwatira vya kutiriziya, virii mwenga muviwoniti kwa masu genu kulii Misri? 35 Mtuwa Mlungu kawalanguziyani aga, su mwenga memuvimani kuwera mweni ndo Mlungu nakaka gwa gweka, na kwahera Mlungu yumonga. 36 Mweni kawatenditi mpikaniri liziwu lyakuyi kulawa kumpindi su kawezi kuwafunda. Pasipanu kawalanguziyani motu gwakuwi mkulu na kupikanira visoweru vyakuwi kulawa pakati pa motu gulii. 37 Toziya kawafiriti wambuyi wetu, mweni kawasyaguliti mwenga washiyuwuku shawu, kawalaviyiti mweni kwa makakala gakuyi makulu kulawa muisi ya Misri. 38 Kaziwingiti kulongolu kwenu isi nkulu na zyaziwera na makakala kuliku mwenga, su kawajegi na kuwapanana isi yawu iweri uhala wenu, ntambu yaiwera mpaka leru! 39 Su leru muliholi nakaka Mtuwa Mlungu ndo Mlungu, yomberi kakolamlima kumpindi na pasipanu, na kwahera Mlungu gwingi. 40 Mugajimiri malagaliru goseri na malagizu galii nankuwapanana leru, su goseri hagaherepi kwa mwenga na kwa shiyuwuku shenu na mwenga hamulikali shaka shitangara muisi ilii Mtuwa Mlungu yakawapanana iweri yamwenga mashaka goseri.

41 Musa katuliti gweka miji mitatu uwega wa kwagulawa mshenji mwa lushemba Yoridani, 42 mumiji ayi muntu hakawezi kutugira na kuliponiziya, handa pakamlaga pota kufira muntu yakawera ndiri mngondu gwakuwi. Muntu handa ayu hakawezi kutugira mumji gumu pamiji ayi na kugalopuziya makaliru gakuyi. 43 Kwa likabila lya Rubeni, Musa katuliti mji gwa Beseri mulilaranda lya shiwala. Kwa likabila lya Gadi, yomberi katuliti mji gwa Ramoti muisi ya Gileyadi. Na kwa likabila lya Manasi, yomberi katuliti mji gwa Golani muisi ya Bashani.

44 Aga ndo malagaliru ga Mlungu, Musa gakawapananiti Waisraeli. 45 Aga ndo maamliru na mashariti na malagizu galii Musa gakawagambiriti Waisraeli pawalawiti muisi ya Misri, 46 pawaweriti kumwambu mwa lushemba Yoridani, kulularanda lwaluwera kulongolu kwa Beti Peori, muisi yaiweriti ya mfalumi Sihoni gwa Waamori, yakakolitimlima kulawa kumjini Heshiboni, Musa pamuhera na Waisraeli wamkankiti yomberi pawalawiti Misri. 47 Waisraeli waitoliti kwa makakala isi yakuwi na isi ya mfalumi Ogu gwa Bashani. Wafalumi awa wawii wa Waamori wakolitimlima aku kwagulawa mshenji mwa lushemba Yoridani. 48 Isi ayi ieneyiti kulawa Aroeri, mumpeku mwa lushemba Arinoni, mpaka lugongu Sirioni, viraa ishemuwa lugongu lwa Herimoni. 49 Pamuhera na enewu lyoseri uwega wa kwagulawa mshenji mwa lushemba Yoridani mpaka Bahari ya Munu na paluseleru mulugongu Pisiga.