1 Musa kandereya kulonga, niwapanana usyagula, matekeleru ama pangiru. Vitwatira avi vyoseri paviwalawira mwenga, mwenga pamulikala muisi zilii Mtuwa Mlungu gwenu pakawapalasiyiti, mwenga hamuliholi usyagula yanuwapanana. 2 Handa mwenga pamuhera na viyiwuku vyenu pamuwuyira Mtuwa Mlungu gwenu kwa myoyu yenu yoseri kugajimira malagaliru gakuyi ganuwapanana leru, 3 shakapanu Mtuwa Mlungu gwenu hakawawoneri lusungu. Hakawawuziyi mwenga kulawa muisi zilii zyakawapalasiyiti na hakawatendi kayi muweri nyanyi. 4 Ata mwenga pampalasiwa kutali pasipanu, Mtuwa Mlungu gwenu hakawajojoniri pamuhera na kuwawuziya, 5 su muhali kayi isi ilii mambuyi wetu walikaliti. Mtuwa Mlungu hakawatendi mfanikiwi nentu na muweri wavuwa kuliku wambuyi wenu ntambu yawaweriti. 6 Mtuwa Mlungu gwenu, hakawatendi mwenga pamuhera na viyiwuku vyenu muweri na miyoyu ya kujimira su mumfiri mweni kwa miyoyu yenu yoseri na kwa rohu zyenu zoseri, su mwenga mwendereyi kulikala muisi. 7 Mtuwa Mlungu gwenu hakatendi pangiru zoseri azi ziwapati wankondu wenu yawawakalariti na kuwatabisiya, 8 shakapanu mwenga hamumjimiri Mtuwa Mlungu na kugatenda malagaliru gakuyi ganuwapanana leru. 9 Mtuwa Mlungu gwenu hakawatendi mwenga mfanikiwi mukila shintu shamtenda, hamuweri na wana wavuwa na wang'ombi wavuwa na malambu genu hagalaviyi viboga. Toziya hakaweri na nemeleru kuwatendera vintu viherepa ntambu yakawatendiriti wambuyi wenu, 10 handa pamushijimira shilii shakawalagaliriti mushitendi na kutenda malagaliru gakuyi na mabeliziwu gakuyi yagalembitwi mushitabu ashi sha malagaliru na kumuwuyira Mtuwa Mlungu gwenu kwa miyoyu yoseri na kwa rohu yoseri.

11 Malagaliru ganuwapanana leru gakamala ndiri kwa mwenga kugamana, viraa gawera ndiri patali na mwenga. 12 Gawera ndiri kumpindi ata mwenga mkosiyi, gaa hakakweni kumpindi kutujegera su tupati kugapikanira na kugajimira? 13 Viraa gawera ndiri kumwambu kubahari ata mwenga mkosiyi, gaa hakaloki bahari katujegeri su tupati kugapikanira na kugajimira? 14 Mwenga mfiruwa ndiri kutenda hangu toziya malagaliru gakuyi ga pamuhera na mwenga. Mwenga mugamana na gawera mumahala genu, su vinu mwenga mugajimiri.

15 Leru nankuwapanana mwenga usyagula, msyaguli maheri ama madoda ama ukomu ama kuhowa. 16 Handa pamugajimira malagaliru ga Mtuwa Mlungu gwenu, galii ganuwapanana leru na pamumfira Mtuwa Mlungu gwenu na kugatenda goseri na kugajimira malagiru na amuri na toza zakuyi zoseri, su hamulikali na kwongere. Mtuwa Mlungu gwenu hakawatekeleri muisi yamgenda kuhala. 17 Kumbiti pamgalambuka na kulema kugajimira aga, pamgenda kuwaguwira wamlungu wamonga, 18 nankuwaberiziya vinu, hamwagamiri nakamu. Hapeni mulikali kwa shaka shitangala muisi yamgenda kuhala, kumwambu kulushemba Yoridani. 19 Nizishema mpindi na pasipanu ziweri kapitawu kwa mwenga leru, niwapanani kusyagula ukomu ama kuhowa, matekeleru ama pangiru. Kumbiti mwenga msyaguli ukomu, mwenga pamuhera na viyiwuku vyenu su mulikali. 20 Mwenga mumfiri Mtuwa Mlungu gwenu, mpikinili liziwu lyakuyi na kuwela pamuhera na yomberi. Toziya kwa kutenda hangu hakulanguziyi kuwera hamuweri na makaliru gatangala na hamulikali muisi ilii Mtuwa Mlungu gwenu yakawalagiliti kuwera hakakupanani wambuyi wenu Abrahamu na Isaka na Yakobu.