1 Musa kendereyiti kutakula, payiwera kwana ndewu pakati pa wantu wawili, womberi pawagenda kushizyungu, watoza pawatoza kuwera yumu kahera makosa na yumonga kawera na makosa, 2 handa ulii yakatozituwiti kapananuwa azabu ya kusyatanguwa ntomondu, su mtoza hakalagaliri ulii yakatozuwa kagonji pasi na kusyatanguwa ntomondu kulawirana na makosa gakuyi. 3 Ulii yakawera na makosa, hapeni kawezi kusyatanguwa ntomondu nentu ya ntomondu malongu msheshi. Pamumsyatanga nentu ya ntomondu malongu msheshi hamumsoniziyi mlongu gwenu.

4 Mwenga namtula shintu shoseri pamlomu gwa ng'ombi pakakomanga viboga.

5 Handa walongu wawili wapalu walikala pahala tunga na yumu gwawu kahowa pota kuleka mwana mpalu, mdala gwa ulii yakahowiti nakayuguwa na muntu gwingi yakawera ndiri gwa kaya ilii. Mlongu gwa ulii yakahowiti, hakamuyugi mkenja ulii. 6 Mwana mpalu shipanta njira yakayuwuka, mwana ulii hakaweri gwa ulii yakahowiti su litawu lyakuyi nalyagamira hera Muisraeli. 7 Kumbiti mlongu gwa muntu ulii yakahowiti pakafira ndiri kumuhala mkenja ulii, su mkenja ulii hakagendi kulongolu kwa wazewi wa mji gulii na kulonga, mlongu gwa mpalu gwangu yakahowiti kalema kwendereza litawu lya mlongu gwakuwi Muisraeli, yomberi kalema kutenda shilii shashifiruwa kushitenda kwaneni. 8 Shakapanu wazewi wa mji hawamshemi mlongu gwa ulii yakahowiti, su wayoweri nawu. Handa pakendereya kulema kumuhala mkenja ulii, 9 mdala mkenja ulii hakamfati kulii kwa wazewi awa wa mji, hakamvuli mlongu gwa ulii yakahowiti shilwatu shakuwi shimu na kumtemera mata kusheni na kumgambira, hangu ndo vyakafiruwa kutendwa muntu yakalema kwendereza litawu lya mlongu gwakuwi yakahowiti. 10 Na litawu lya kaya yakuwi Muisraeli haliweri. Numba ya muntu yawamvuliti shilyatu.

11 Wapalu wawili pawalikomanga na mdala gwa yumu gwawu pakamtanga mpalu gwakuwi kwa kumbata upalu wa ulii yakalikomanga na mpalu gwakuwi, 12 mwenga hamuulikituli liwoku lya kumliwu lya mdala ulii, su namumwonera lusungu.

13 Mwenga namuwera na vipimu vya kupimira vya ntambu mbili mumuhaku mwaku. Shipimu shimu shitopa na shamonga shiyewuka. Namuwera na vipimu vya upayira. 14 Viraa namuwera na ntambu mbili za vipimu vya kupimira ukaya kwaku, shikulu na shididini.

15 Mtumiyi vipimu na vipimu vyeni viweri na utopa uherepa su mpati kulikala makaliru matangara muisi yakagenda kuwapanana Mtuwa Mlungu gwenu. 16 Woseri yawatenda vitwatira avi, woseri yawatenda kwa upayira su wawera likalaliru kulongolu kwa Mtuwa Mlungu gwenu.

17 Namulyaluwa shilii Waamaleki ntambu yawawatendiriti mwenga pamuweriti mwanja kulawa muisi ya Misri. 18 Womberi wawakangaliti mwenga pamuweriti legilegi na washovu, womberi wawalagiti woseri yawajonditi kumbeli mumwanja. Womberi wamtiriti ndiri Mlungu. 19 Su shaka Mtuwa Mlungu gwenu pakawatenda mwenga mwoyeri kulawirana na kulikomanga na wangondu wenu woseri yawawazyengeta mwenga muisi ilii Mtuwa Mlungu yakawapananuwa mulikali amu, mwenga hamuwaagamizi Waamaleki woseri nawawera pasipanu.