1 Shaka shilii Mtuwa Mlungu kang'ambiri, gusongoli vibawu viwili vya mabuwi ntambu yagutenditi kwanja, viraa gunyawi lisanduku lya mbawu kwajili ya kugatula mabuwi aga, shakapanu gukweni kwiza kwaneni kulugongu. 2 Neni hanembi mumabuwi galii gambira kwanja ntambu yanembiti muvibawu virii vyaguvipantiti, shakapanu guvituli vibawu avi mulisanduku.

3 Su neni nyawiti lisanduku lya mbawu za mjoholu na kusongola vibawu viwili vya mabuwi ntambu yaiweriti kwanja na nkweniti kulugongu pampapa vibawu virii. 4 Mtuwa Mlungu kalembiti visoweru viraa virii vyakalembiti kwanja muvibawu virii, malagaliru lilongu galii gakawapananiti pakayoweriti na mwenga kulawa mumotu kulugongu, shaka pamjojonikiti paluseleru lwa lugongu. Shakapanu Mtuwa Mlungu kampananiti neni vibawu virii 5 na neni ng'alambukiti kuselera pasi kulawa kulugongu. Ntambu yanagalirituwiti na Mtuwa Mlungu, neni ntuliti vibawu virii mulisanduku lyanyawiti na vinu viwera mla mulisanduku.

6 Waisraeli wagenditi mwanja kulawa mumanegu ga wantu wa Yaakani kugenda Mosera. Kulii Aruni kahowiti na kasiruwiti na Eliazeri mwana gwakuwi kaweriti mtambika pa mweni kuhowa. 7 Kulawa palii Mosera, wagenditi mwanja mpaka Gudigoda na kulawa Gudigoda wagenditi mwanja mpaka Yotibatiha pahala papawera na lushemba zivuwa za mashi. 8 Mushaka shilii Mtuwa Mlungu kawasyaguliti wantu wa likabila lya Lawi kupapa lisanduku lya Lipatanu lya Mtuwa Mlungu, wamtenderi gambira watambika na kuwatekelera wantu kwa litawu lyakuyi. Womberi wankutenda vitwatira avi mpaka shaka ashi. 9 Su kabila lya wantu wa Lawi lyahera uhala pahala pa Waisraeli ntambu yawawera makabila gamonga. Womberi wawankiti ligoya lya kuwera watambika wa Mtuwa Mlungu ntambu yakalagiliti.

10 Musa kendereyiti kulonga, nilikaliti kulugongu kwa shaka sha malongu msheshi ntambu yaiweriti kwanja. Mtuwa Mlungu kampikaniriti kayi neni gambira kwanja ntambu yakampikaniriti, na kanjimiriti kuwera hapeni kawagamiziyi. 11 Shakapanu kang'ambiriti, guwuki gwendereyi na mwanja gwaku, guwalongoziyi wantu kwingira kuitola kwa makakala isi yanuwalagiliti wambuyi wenu kuwera haniwapanani.

12 Vinu mwenga Waisraeli, mpikaniri shilii shakafira Mtuwa Mlungu gwenu kulawa kwa mwenga. Mtuwa Mlungu gwenu kafira mumguwiri na kugajimira goseri gakalagalira. Mumfiri na mumtenderi kwa myoyu na rohu yoseri, 13 kugajimira malagaliru na malagizu ga Mtuwa Mlungu ganuwapanana leru kwa mota yenu. 14 Guloli, kumpindi na kumpindi ndo vyakuwi Mtuwa Mlungu gwenu, pasipanu na vyoseri vyaviweramu viwera vyakuwi. 15 Kayi Mtuwa Mlungu kawafiriti nentu wambuyi wetu, kawasyaguliti mwenga walera wawu kuwera wantu wakuwi badala ya wantu wamonga woseri ntambu yaiwera leru. 16 Su kwanjira vinu mumjimiri Mtuwa Mlungu na mleki kuwera na ubinta. 17 Toziya Mtuwa Mlungu gwenu ndo mkulu nentu kuliku wamilungu woseri, viraa mkulu kuliku wakolamlima woseri. Kawera na makakala nentu na katiliziya, hapeni kapendereyi ama kuwanka swinda. 18 Mtuwa Mlungu kahakikisha kuwera mshiwa na wakenja hapeni wazulumiwi, viraa kankuwafira ata wahenga kulawa isi zyamonga walii yawalikala pakati penu kankuwapanana shiboga pamuhera na nguwu. 19 Su muwafiri wahenga viraa toziya mwenga muweriti wahenga muisi ya Misri. 20 Mumgoheliri Mtuwa Mlungu gwenu na mumguwiri gweka yakuwi. Muweri waminika kwakuwi na mlagili kwa litawu lyakuyi hera. 21 Mweni ndo yumu ulii yakafiruwa kukwisuwa. Mweni ndo Mlungu gwenu yakawatendiriti vitwatira avi vikulu na vya kutiriziya vyamuviwoniti kwa masu genu. 22 Wambuyi wetu pawagenditi Misri waweriti wantu malongu saba hera, kumbiti vinu Mtuwa Mlungu gwenu kawatenda wavuwa gambira ntondu ya kulyera.