1 Kila upeleru wa shinja sha saba, mwenga hamuwalekeziyi wawanda wenu woseri. 2 Mwenga hamtendi ntambu ayi, kila yumu gwenu yakamuwanditi Mwisraeli muyaguwi, nakamshonga nakamu shilii shakamuwanditi, viraa nakajera kumshonga uwanda awu toziya Mtuwa Mlungu mweni kamuwa lilekuwi nakamu. 3 Mwenga muweza kuwashonga wahenga uwanda yamuwawanditi, kumbiti mleki kuwashonga uwanda yamuwawanditi walongu wenu Waisraeli.

4 Mtuwa Mlungu gwenu hakawatekeleri muisi yakagenda kuwapanana. Kwahera ata yumu gwenu yakagenda kuwera muhushu pakati penu 5 handa pamumjimira Mtuwa Mlungu gwenu na kugajimira malagaliru goseri ganuwapanana leru. 6 Aga hagaweri hangu toziya Mtuwa Mlungu gwenu hakawatekeleri mwenga ntambu yakalagiliti. Mwenga hamuwawandi wantu wa isi zivuwa, kumbiti mwenga hapeni muwandi kulawa kwa muntu yoseri. Viraa mwenga hamuwakolimlima wantu wa isi zivuwa, kumbiti wantu wa isi azi hapeni wawakolimlima mwenga.

7 Handa pakawera muhusu pakati pa Waisraeli wayenu mumiji ya isi ilii Mtuwa Mlungu yakagenda kuwapanana, mwenga namuwera wayimi kuwatanga womberi. 8 Badala yakuwi, muweri na myoyu iherepa na muwawandi shyasi shawafira. 9 Gulilori weri liholu lidoda nalikwingira mumoyu gwaku na kulitakulira gamweni, shinja sha saba sha kuwalekeziya yawawanditi shapakwegera, su hapeni numuwandi muntu yoseri toziya hapeni kafiri kulipa mana shinja sha saba shakulekeziwa shapakwegera. Handa mwenga pamumuhola ndiri mlongu gwenu muntu gwa Israeli yakawera muhushu na kulema kumpanana shoseri, su yomberi hakamliliri Mtuwa Mlungu kuusu mwenga na shitwatira ashi hashiweri vidoda kwa mwenga. 10 Mumpanani mlongu gwenu muntu gwa Israeli yakawera muhushu kwa moyu guherepa, Mtuwa Mlungu hakawatekeleri mumahengu genu goseri na mukila shintu shamtenda. 11 Toziya wahushu hawaweri mashaka goseri muisi. Su neni nankuwalagalira mwenga muweri na myoyu iherepa kwa walongu wenu Waisraeli muisi yenu.

12 Handa mlongu gwenu Mwisraeli pakashuwuzuwa kwaku, yomberi hakakutenderi kwa mivinja sita, kumbiti mushinja sha saba hagumleki kaweri mlekeru. 13 Na gwenga pagumleka kagendi zyakuwi, su nagumleka kagendi mawoku hera. 14 Gumpanani kwa moyu guherepa shilii Mtuwa Mlungu shakakutekeleriti: kondolu na viboga na divayi. 15 Muliholi kuwera mwenga muweriti wamanda pamuweriti aku Misri, Mtuwa Mlungu gwenu kawakomboliti mwenga. Ndo mana nankuwapanana lilagaliru ali leru.

16 Kumbiti mmanda gwaku pakakugambira, neni hapeni mbuki kwaku, toziya kakufira gwenga pamuhera na kaya yaku na kafira kendereyi kulikala na gwenga, 17 su gwenga hagumtoli kumjega kuligomi lwa numba yaku, pakawera palii paligomi, gwenga hagutoli sanziya na kumtobola likutu lyakuyi, shitwatira shilii hashimaniziyi kuwera yomberi hakaweri mmanda gwaku makaliru gakuyi goseri. Ntambu ayi gumtenderi viraa mmanda gwaku mdala. 18 Naguhinginika pagufiruwa kumlekeziya mmanda gwaku, toziya kakutendiriti mahengu kwa mivinja sita na gwenga gumpanana nusu ya shibenamgongu sha untumintumi. Handa pagumlekeziya yomberi, Mtuwa Mlungu gwaku hakakutekeleri mukila shintu shagutenda.

19 Gumtulili gweka Mtuwa Mlungu gwaku wapanta njira woseri washipalu ama washidala mushipinga shaku sha wang'ombi ama wakondolu na wambuzi. Nagutenda watendi mahengu ga kulima mumalambu, viraa naguwamoga mibayila. 20 Gwenga pamuhera na kaya yaku hamuwalikituli wankanyama awa na kuliya vinofu vyawu kulongolu kwa Mtuwa Mlungu, pahala palii Mtuwa Mlungu pakapasyaguliti mwenga mumguwiri mweni. 21 Kumbiti nkanyama yoseri pakawera na shidoda shoseri, pashiwera shibyeketu ama lwisi ama shidoda shoseri shikulu, mwenga namumlaviya tambiku kulongolu kwa Mtuwa Mlungu gwenu. 22 Mwenga hamuwalikituli na kuliya vinofu vya wankanyama awa ukaya kwenu. Wantu woseri yawajimiluwa ama yawajimiluwa ndiri mukumguwira Mtuwa Mlungu, waweza kuliya vinofu vya wankanyama awa ntambu yawaliya nkanyama paa ama shinjapuri. 23 Kumbiti namuliya mwazi gwa nkanyama, su mwenga muyitili mwazi agu gunyinyiriki gambira mashi pasi pamuwalikitula wankanyama awa.