1 Shakapanu Musa kalawiti kulularanda lwa Mowabu na kukwena kugenda kulugongu lwa Nebo palugongu lwa Pisiga kwagulawira mshenji aku Yeriku. Kulii Mtuwa Mlungu kamlanguziyiti isi yoseri. Mji gwa Gileadi mpaka Dani, 2 Nafutali yoseri na isi yoseri ya Efurayimu na Manasi na isi yoseri ya Yuda, mpaka bahari ya Mediterania, 3 na Negebu na enewu lya ntundu lya lularanda kulawa Soari kugenda Yeriko gweni gushemwa mji gwa mitera ya mitendi. 4 Shakapanu Mtuwa Mlungu kamgambiriti Musa, "Ilii ndo isi yanuwalagaliti kwa kukumlapira Iburahimu na Isaka na Yakobu, panongiti, hanishipanani shiyiwuku shaku. Su nikulanguziya guwoni kwa masu gaku, kumbiti hapeni guloki kwingira kulii."

5 Su, Musa ntumintumi gwa Mtuwa, kahowiti kulii muisi ya Mowabu, gambira Mtuwa ntambu yakatakuliti. 6 Mtuwa kamfintiriti Musa mulularanda lwa Mowabu, pakwegera na mji gwa Beti Peori, kumbiti mpaka leru kwahera muntu yakavimana lisembi lyakuyi. 7 Musa kaweriti na umuli wa vinja miya na ishilini pakahowiti, masu gakuyi gaweriti gankuwona weri na kaweriti na makakala gakuyi. 8 Waisraeli wamdayiliriti Musa mulularanda lwa Mowabu kwa mashaka selesini. Su mashaka ga kudaya na kugonjera shiwembu gaperiti.

9 Vinu Yoshuwa mwana gwa Nuni kamemitwi rohu gwa luhala, toziya Musa kamtuliriti mawoku gakuyi. Su Waisraeli wamjimiriti Yoshuwa na kugajimira malagaliru ga Mtuwa gakampananiti Musa.

10 Hakwenilawiri kayi Muisraeli mbuyi gambira Musa, ulii yakayowiriti sheni kwa sheni na Mtuwa Mlungu. 11 Kwahera mbuyi gwingi gwa Mlungu yakatenditi mawuzawuza pamuhera na makangashu gambira ilii Mtuwa yakagajegiti kwa Musa gakatendi kulongolu kwa Farao mfalumi gwa isi ya Misri pamuhera na wakulu wayaguyi na isi yoseri. 12 Kwahera mbuyi gwingi gwa Mlungu yakatenditi mirandu mikulu na vya kutiliziya gambira Musa ntambu yakatenditi kulongolu kwa Waisraeli woseri.