1 Pakahowiti kala Musa, ntumintumi gwa Mtuwa Mlungu, Mtuwa Mlungu kamgambiriti Yoshuwa mwana gwa Nuni, ntumintumi gwa Musa. 2 Ntumintumi gwangu Musa kahowa, vinu mloki lushemba Yoridani, gwenga pamuhera na Waisraeli woseri mpaka kuisi irii yanuwapanani. 3 Kila isi yanamtimbi niwapanani ntambu yanumlagiliti Musa. 4 Mbaka ya isi yenu hayiweri hangu. Kusika ndo shiwala, kushana ndo migongu ya Lebanoni, Lebanoni, kwagulawa mshenji ndo lushemba lulii lukulu Eufirati, kupitira isi yoseri ya Wahiti mpaka bahari ya Mediteraniya uwega wa kwaguzyetera mshenji. 5 Kwahera muntu yoseri yanakakukanki mashaka goseri ga makaliru gaku. Neni haweri pamuhera na gwenga ntambu yanuweriti pamuhera na Musa. Mashaka goseri haweri pamuhera na gwenga hapeni nikuleki gwenga nakamu. 6 Guweri mkamalira na mgangamala toziya gwenga haguwalongoziyi wantu awa kuhala isi irii yaniwalapiriti wazewi wawu kuwera haniwapanani. 7 Guweri mkamalira na mgangamala, guliloleri weri kugatenda Malagaliru goseri gakakugambiliti ntumintumi gwangu Musa. Gufati kila semu ya lagaliru ali na gwenga hagufanikiwi kwoseri kwagugenda. 8 Naguleka nakamu shintola ashi sha lagaliru kushibetula mukuguwira kwaku. Su guliholi pashiru na paluwala na guvijimila vitwatira vyoseri vyavilembuwa amu. Shakapanu gwenga hagugendi weri. 9 Guliholi kuwera neni nukulagalira guweri mkamalira na mgangamala. Nagutira ama kutwezuka toziya neni Mtuwa Mlungu gwaku, napamuhera na gwenga kwoseri kwagugenda.

10 Shakapanu Yoshuwa kawalagalira walongoziya wa wantu. 11 Mgendi mulugonjeru lyoseri na kuwagambira wantu watandi shiboga, "Toziya pa mashaka matatu hamloki lushemba lwa Yoridani, kugenda kuikolamlima isi yeni Mtuwa Mlungu gwenu kawapanana iweri ya mwenga."

12 Yoshuwa kawagambira wantu wa likabira lya Rubeni na Gadi na nusu ya likabira lya Manasi. 13 "Muliholi malagaliru galii Musa ntumintumi gwa Mtuwa Mlungu kawalagaliriti pakalonga, Mtuwa Mlungu gwenu hakakupanani pahala pa kwoyera na hakawapanani isi ayi.’ 14 Wadala wenu na wananguta wenu na wankanyama wenu wa kulolera hawasigali muisi irii Musa kawapananiti, uwega awu wa lushemba Yoridani. Kumbiti wapalu woseri wagangamala pawawera na vintu vya kulikomangira hawaloki lushemba na kuwalongolera walongu wenu. 15 Hamuwatangi mpaka Mtuwa Mlungu pakawapanana walongu wenu viraa pahala pa kwoyera, ntambu yakawapananiti mwenga. Na womberi viraa iweri yawu isi irii yawapananuwa na Mtuwa Mlungu gwenu. Shakapanu hamuwuyi muisi irii yaiwera lunda yenu na iweri yenu isi irii yampananituwi na Musa, ntumintumi gwa Mtuwa Mlungu, uwega kwagulawa mshenji mwa lushemba Yoridani."

16 Womberi wamwankula Yoshuwa, "Vitwatira vyoseri vyagutugambiriti hatuvitendi na kwoseri pagulagalira hatugendi. 17 Hatukujimili gwenga ntambu yatumjimiliti Musa muvisoweru vyoseri, Mtuwa Mlungu kaweri na gwenga ntambu yakaweriti na Musa. 18 Muntu yoseri yakalema amuli yaku ama kujimira ndiri visoweru vyaku ama shitwatila shoseri shagumgambiziya, hakalagwi. Kumbiti gwenga guweri mkamalira na kuwera mgangamala."