1 Mtuwa Mlungu kamgambira Yoshuwa, "Nagutira, viraa naguwera na lyoga lyoseri, guwatoli wamashonta waku woseri gugendi kumji gwa Ai. Toziya hanikutendi gumkanki mfalumi gwa Ai pamuhera na wantu wakuwi, mji gwakuwi na isi yakuwi. 2 Hamgutenderi mji gwa Ai pamuhera na mfalumi gwakuwi ntambu yamugutendiriti mji wa Yeriku pamuhera na mfalumi gwakuyi. Ulunda wakuyi pamuhera na mifugu yakuyi yanamuyilopoli hayiweri ndo lunda yenu. Mgendi mkagutoli kwa makakala mji kulawa uwega wa kumbeli."

3 Su Yoshuwa kawuka pamuhera na wamashonta wakuyi woseri wagenda Ai. Kawasyagula wantu wagangamala elufu selasini na kawagambira walongoleri pashiru. 4 Kawagambira hangu, "Mwenga mgunyatili mji kulawa uwega wa kumbeli. Kumbiti namgenda kutali na mji, su muweri kala shaka shoseri. 5 Neni pamuhera na wantu woseri yawawera pamuhera na neni, hatugusegeleri mji. Wantu pawalawa kunja kwiza kutukomanga handa kwanja, twenga hatuwatiri. 6 Nawomberi hawendereyi kutufata mpaka waweri patali na mji gwawu, toziya hawaliholi watuwinga ntambu yawatenditi shaka shipititi. Twenga hatuwaleki watuwingiwingi. 7 Panu mwenga hamlawiri kulawa aku kwamweriti mgunyatiri na kugutola mji kwa makakala. Toziya Mtuwa Mlungu gwenu, hakawatendi muukanki mji agu. 8 Pamgutola kala kwa makakala mji, hamgulunguziyi nakamu kwa motu, handa Mtuwa Mlungu ntambu yakalagaliriti. Guloli! Aga ndo malagaliru gakufata."

9 Su Yoshuwa kawagambiriti womberi wagendi pahala pawu pa kuwagwandira na womberi walitula uwega kwaguzyeta mshenji mwa mji gwa Ai pakati pa mji gwa Ai na Bateli. Kumbiti Yoshuwa kagonjiti pashiru kulii kumalingu ga Waisraeli. 10 Yoshuwa kimuka mandawira putiputi, kawajojonira Waisraeli na kugenda kumjini Ai pakawera pamuhera na wazewi. 11 Mashonta woseri yawagenditi pamuhera na Yoshuwa, waweriti pakwegera na mji na kunyawa malingu kushana kwakuyi, na lularanda luweriti pakati pawu na mji gwa Ai. 12 Shakapanu Yoshuwa kawasyagula wantu elufu muhanu na kuwatula wagwandili pakati pa mji gwa Beteli na Ai, uwega kwaguzyeta mshenji mwa mji gwa Ai. 13 Shipinga sha wamashonta shitulitwi kushana mwa mji na walii yawasigaliti, wawatuliti kusika wankukwandira mji. Kumbiti pashiru panu, Yoshuwa kagenditi kulularanda. 14 Mandawira putiputi Mfalumi gwa mji gwa Ai pakawoniti hangu, kalopokeriti na kugenda kuluseleru lwalugenda Araba su walikomangiti nkondu na Wasraeli. Kumbiti kavimaniti ndiri handa mji gwakuwi guweriti gukangaluwa kulawa kumbeli. 15 Shakapanu Yoshuwa pamuhera na wantu wa Israeli woseri walitenditi handa wankusinda, wanja kutugira kushiwala. 16 Wantu woseri yawaweriti mjini washemitwi wawafati Waisraeli, na pawaweriti wankumfata Yoshuwa, walawiti na kugenda patali na mji gwawu. 17 Kwahera muntu yoseri yakasigaliti kumjini Ai ama Beteli, wagulekiti mji agu lupalahera wagenda kuwafata Waisraeli.

18 Shakapanu Mtuwa Mlungu kamgambira Yoshuwa, "Gulanguziyi mgoha gwaku aku kumjini Ai toziya hanikutendi guukanki mji agu." Yoshuwa kagulanguziya mgoha gwakuwi kumjini Ai. 19 Kamkamu Yoshuwa pakagulanguziyiti mgoha gwakuwi kulii Ai, shipinga shashiweriti shankugwandira uwega umonga shilawa na kwingira kumjini, wagutola mji kwa makakala mji na kugulunguziya nakamu kwa motu. 20 Wantu wa mji gwa Ai pawagalambukiti kumbeli, waliwona lyosi kulawa kumjini palituma kugenda kulyera. Womberi waweriti ndiri na uwezu wa kutuga uwega woseri, toziya Waisraeli wawagalambukiriti awa yawaweriti wankuwafata. 21 Yoshuwa na Waisraeli woseri pawawoniti kuwera shipinga shashiweriti shakugwandira shigutola kwa makakala mji na lyosi liweriti lyankutuma kugenda kulyera, wawagalambukiriti na kwanja kuwalaga wantu wa mji gwa Ai. 22 Wantu wa Israeli yawaweriti wagutola kwa makakala mji gwa Ai walawa na kuwafata wantu wa Ai na walii yawaweriti wangutuga wagulambukiti hangu wantu wa Ai waliwoniti wapakati pa mashonta ga Israeli na Waisraeli wawalaga woseri pota kumleka hata muntu yumu. 23 Kumbiti mfalumi gwa Ai wambatiti kwa makakala pakawera mkomu na kumjega kwa Yoshuwa.

24 Waisraeli pawamalaliti kuwalaga wantu woseri wa mji gwa Ai kulii kushidohi kwawawafatiti, su wawuyiti kumjini Ai na kuwalaga woseri yawasigaliti amu. 25 Walanga ya wantu wa mji gwa Ai yawalagitwi lishaka lilii, wapalu pamuhera na wadala waweriti elufu kumi na mbili. 26 Yoshuwa kalilekeziyiti ndiri liwoku lyakuyi lyakagukoliti mgoha gwakuwi kugulanguziya kumjini Ai mpaka pawawalagiti wenikaya woseri wa mji agu. 27 Waisraeli watoliti hera kwa makakala wakanyama na lunda gambira Mtuwa Mlungu ntambu yakamlagaliriti Yoshuwa. 28 Su Yoshuwa kagulunguziyiti nakamu kwa motu mji gwa Ai na kugutenda magofu mpaka leru. 29 Shakapanu kamkongera mfalumi gwa mji gwa Ai mumtera mpaka pashimihi. Kumbiti mshenji pagwanjiti kwinala, Yoshuwa kalongiti mauti gakuyi gawusiwi kumtera na kwaswa kunja kuligomi likulu lyakwingilira kumji. Shakapanu wamamatiri limatiru likulu lya mabuwi pampindi pa mauti ga mfalumi ayu, limatiru ali lyankali mpaka leru.

30 Shakapanu Yoshuwa kamnyawira Mtuwa Mlungu gwa Israeli, pahala pakutambikira Kulugongu Ebali, 31 gambira Musa ntumintumi gwa Mtuwa Mlungu, ntambu yakawalagaliriti Waisraeli, ntambu yailembitwi mushintola sha lagiru lya Musa handa hapaweri pakutambikira papanyawituwi kwa mabuwi galii gagasongolituwiti ndiri, pota kushinkuluwa na shombu shoseri sha shuma. Pampindi pa kutambikira palii wamlaviliriti Mtuwa Mlungu tambiku za kulunguziwa nakamu pamuhera na malaviwu ga ponga. 32 Na aku, kulongolu kwa lipinga lya wantu woseri wa Israeli, Yoshuwa kalembiti kayi lagaliru lya Musa pampindi pa mabuwi. 33 Waisraeli woseri pamuhera na wakulu wawu, wazewi na watoza na wahenga woseri yawaweriti pakati pawu, wagolokiti kila uwega pakwegera na lisanduku lya lipatanu kulongolu kwa Walawi yawaweriti watambika, walii yawalipapati lisanduku lya lipatanu lya Mtuwa Mlungu. Wamu wawu wagoloka kulola kulugongu Gerizimu na wamonga wagolokiti kulola kulugongu Ebali, gambira viraa Musa ntumintumi gwa Mtuwa Mlungu, ntambu yakalagaliriti mashaka gapititi ga kutekeleruwa kwa Waisraeli. 34 Shakapanu Yoshuwa kawabetulira Malagaliru goseri, pamuhera na matekeleru na mpangiru ntambu yailembitwi mushintola sha malagaliru. 35 Kwahera shisoweru shashilagaliritwi na Musa, shilii Yoshuwa kashibetula ndiri kulongolu kwa lipinga lya Waisraeli, muwamu mwawu waweriti wadala, wana na wahenga yawaweriti wankulikala pamuhera nawu.