1 Pawaweriti aku Shilu muisi ya Kanaani walongoziya wa kolu za Walawi wawagendera mtambika Eleazari na Yoshuwa mwana gwa Nuni na walonguziya wa wantu wa makabila goseri ga Waisraeli, 2 wawagambira, "Mtuwa Mlungu kamlagiliriti Musa tupananwi miji ya kulikala na ntundu za maliwuziwu ga mifugu za wakanyama wetu." 3 Su, Mtuwa Mlungu, kawalagaliriti Waisraeli wawapanani Walawi, miji yayifata na ntundu kunja kwa miji yawu yawapananitwi.

4 Simbi ya kwanja wazipatiti wantu wa lukolu lwa Kohati. Na Walawi yawaweriti wiwuka wa mtambika Aruni wapananitwi kwa kugalambula simbi, miji yayiweriti muenewu lya makabila ga Yuda na Simoni na Benjamini. Walanga ya miji yawapananitwi ndo lilongu na mitatu.

5 Wantu wa lukolu lwa Kohati yawasigaliti wapananitwi miji lilongu yaiweriti muenewu lya makabila ga Efraimu na Dani na muenewu lya nusu ya likabila lya Manasi.

6 Wantu wa lukolu lwa Gerishoni wapananitwi kwa kugalambula simbi miji lilongu na mitatu muenewu lya makabila ga Isakari na Asheri na Nafutari na muenewu lya nusu ya likabila lya Manasi aku Bashani.

7 Kaya za lukolu lwa Merari wapananitwi miji malongu na miwili muenewu lya makabila ga Rubeni na Gadi na Zebuloni.

8 Waisraeli wawapanana Walawi miji ayi pamuhera na vijiji vya maliwuziwu ga mifugu gawu ntambu Mtuwa Mlungu vyakamlagaliriti Musa.

9 Aga ndo matawu ga miji kulawa kuenewu lya likabila lya Yuda na Simioni, 10 kwa wiwuka wa mtambika Aruni, waweriti kaya za lukolu lwa Kohati mweni kaweriti gwa likabila lya Lawi. Seemu yawu wapatiti kwanja toziya simbi yawu ilawiriti kwanja. 11 Wapananitwi Kiriati ariba yeni ndo Hebuloni, na izyengetitwi ndundu ya maliwuziwu ga mifugu, mulugongu lwa isi ya Yuda. Araba kawerit tati gwa Anaki. 12 Kumbiti malambu ga mji agu pamuhera na vijiji vyavizyengetiti kaweriti kala kapanunwa Karebu mwana gwa Yefuni viweri vyakuwi.

13 Tembera ya kuwapanana wiwuka wa mtambika Aruni mji gwa Hebuloni gweni viraa guweriti gutuluwa gweka kuwera mji gwa kutugira, viraa wawapananitwi mji gwa Libina pamuhera na ndundu zakuwi za maliwuziwu ga mifugu 14 Yatira pamuhera na ndundu zakuwi za maliwuziwu ga mifugu, Eshitemoa pamuhera na ndundu zakuwi za maliwuziwu ga mifugu, 15 Holoni pamuhera na ndundu zakuwi za maliwuziwu ga mifugu, Debiri pamuhera na ndundu zakuwi za maliwuziwu ga mifugu, 16 Aini pamuhera na ndundu zakuwi za maliwuziwu ga mifugu, Yuta pamuhera na ndundu zakuwi za maliwuziwu ga mifugu na Beti shemeshi pamuhera na ndundu zakuwi za maliwuziwu ga mifugu. Walanga ya miji ayi yaiwera muenewu lya makabila mawili aga ndo tisa. 17 Muenewu lya likabila lya Benjamini wapananuwitwi miji imonga. Gibeoni na Geba. 18 Anatoti na Alimoni, miji ayi yoseri iweriti na ndundu zakuwi za maliwuziwu ga mifugu na Walanga ya miji yawapananitwi ndo msheshi. 19 Miji yoseri ya wiwuka wa Aruni weni waweriti watambika, iweriti lilongu na mitatu pamuhera na ndundu za maliwuziwu ga mifugu.

20 Wantu yawasigaliti wa lukolu lwa Kohati, weni viraa ndo kaya za likabila lya Lawi wapananitwi miji muenewu lya likabila lya Efraimu. 21 Wapananitwi Shekemu, mji gulii yaguweriti viraa mji gwa kutugira, pamuhera na ndundu zakuwi za maliwuziwu ga mifugu muisi ya migongu ya Efraimu na Gezeri pamuhera na ndundu zakuwi za maliwuziwu ga mifugu, 22 Kibizaimu pamuhera na ndundu zakuwi za maliwuziwu ga mifugu na Beti horoni pamuhera na ntundu zakuwi za maliwuziwu ga mifugu. Walanga ya miji yawapananitwi ndo msheshi, 23 Mulienewu lya likabila lya Dani wapananitwi Eliteke pamuhera na ndudndu zyakuwi za maliwuziwu ga mifugu, Gibetoni pamuhera na ndundu zakuwi za maliwuziwu ga mifugu, 24 Aiyaloni pamuhera na ndundu zakuwi za maliwuziwu ga mifugu na Gati Rimoni pamuhera na ndundu zakuwi za maliwuziwu ga mifugu. Walanga ya miji yawapananitwi ndo msheshi. 25 Mulienewu lya nusu ya likabila lya Manasi wapananitwi Taanaki pamuhera na ndundu zakuwi za maliwuziwu ga mifugu na Gati Rimoni pamuhera na maliwuziu gakuyi. Walanga ya miji yawapananitwi ndo miwili. 26 Su, miji yeni wapananitwi kaya za Kohati yazisigaliti ziweriti lilongu yimu na ndundu za maliwuziwu ga mifugu.

27 Kaya za Walawi za lukolu lwa Gerishoni, wapananitwi miji miwili munusu ya enewu lya likabila lya Manasi. Golani aku Bashani, mji gwa kutugira, pamuhera na ndundu zakuwi za maliwuziwu ga mifugu na Beeshi Tera pamuhera na maliwuziwu ga mifugu gakuyi. 28 Mulienewu lya likabila lya Isakari, wapananitwi Kishioni pamuhera na ndundu zakuwi za maliwuziwu ga mifugu, Daberati pamuhera na ndundu zakuwi za maliwuziwu ga mifugu, 29 Yarimuti pamuhera na ndundu zakuwi za maliwuziwu ga mifugu na Eni ganimu pamuhera na ndundu zakuwi za maliwuziwu ga mifugu. Walanga ya miji yawapananitwi ndo msheshi. 30 Muenewu lya likabila lya Asheri wapananitwi Mishali pamuhera na ndundu zakuwi za maliwuziwu ga mifugu, Abudoni pamuhera na ndundu zakuwi za maliwuziwu ga mifugu, 31 Helikati pamuhera na ndundu zakuwi za maliwuziwu ga mifugu na Rehobu pamuhera na ndundu zakuwi za maliwuziwu ga mifugu. Walanga ya miji yawapananitwi ndo msheshi. 32 Muenewu lya likabila lya Nafutali wapananitwi Kedeshi, mji gwa kutugira yaguwera aku Galilaya pamuhera na ndundu zakuwi za maliwuziwu ga mifugu, Hamoti Dori pamuhera na ndundu zakuwi za maliwuziwu ga mifugu na Karitani pamuhera na ndundu zakuwi za maliwuziwu ga mifugu. Walanga yakuwi miji mitatu. 33 Walanga ya miji ya kaya zingizingi za lukolu lwa Gerishoni ziweriti lilongu na mitatu pamuhera na ndundu za maliwuziwu ga mifugu.

34 Walawi wamonga yawasigaliti, wawuka wa Merari, wapananitwi miji muenewu lya likabila lya Zebuluni. Na yeni Yokineamu pamuhera na ndundu zakuwi za maliwuziwu ga mifugu, Karita pamuhera na ndundu zakuwi za maliwuziwu ga mifugu, 35 Dimuna pamuhera na ndundu zakuwi za maliwuziwu ga mifugu na Nahalali pamuhera na ndundu zakuwi za maliwuziwu ga mifugu. Walanga yakuwi miji msheshi. 36 Mulienewu lya likabila lya Rubeni wapananitwi Bezeri pamuhera na ndundu zakuwi za maliwuziwu ga mifugu, Yahazi pamuhera na ndundu zakuwi za maliwuziwu ga mifugu, 37 Kedemoti pamuhera na ndundu zakuwi za maliwuziwu ga mifugu, na Mefaati pamuhera na ndundu zakuwi za maliwuziwu ga mifugu. Walanga yakuwi miji msheshi. 38 Muenewu lya likabila lya Gadi wapananitwi Ramoti gwa Gileadi, mji gwa kutugira, pamuhera na ndundu zakuwi za maliwuziwu ga mifugu, Mahanaimu pamuhera na ndundu zakuwi za maliwuziwu ga mifugu, 39 Heshiboni pamuhera na ndundu zakuwi za maliwuziwu ga mifugu na Yazeri pamuhera na ndundu zakuwi za maliwuziwu ga mifugu. Walanga yakuwi miji msheshi. 40 Miji yoseri yawapananitwi wiwuka wa Merari, zeni kaya za Walawi zyazisigaliti, ziweriti lilongu na mbili.

41 Walanga ya miji yoseri yeni walawi wapananitwi mumaenewu ga Waisraeli gaweriti malongu msheshi na manani pamuhera na ndundu zawu za maliwuziwu ga mifugu. 42 Kila yumu pakati pa miji ayi kazyengetwitwi na ndundu za maliwuziwu ga mifugu.

43 Su, Mtuwa Mlungu kawapananiti Waisraeli isi yoseri mweni kaweriti kawalapiriti handa hakawapanani wazewi wawu. Na womberi wayikolitimlima na kulikala amu. 44 Mtuwa Mlungu kawapananiti Waisraeli ponga kila pahala muisi ntambu yakawalapiliti wazewi wawu. Kwahera mnkondu yoseri yakajeriti kuwasegelera toziya Mtuwa Mlungu kaweriti kawatenda wankondu awa wasindi. 45 Kwahera ata lagira lyoseri liheri ilii Mtuwa Mlungu kawalagiriti Israeli itendeka ndiri, Lagira zoseri zitendekiti.