1 Aga ndo maenewu ga isi ilii yawapananitwi Waisraeli muisi ya Kanaani. Mtambika Eliyazari pamuhera na Yoshuwa mwana gwa Nuni, pamuhera na wakulu wa nkolu za makabila ga Waisraeli wawabaguliriti Waisraeli. 2 Isi yawu ayi wabaguluwitwi kwa kugalambula simbi gambira Mtuwa Mlungu ntambu yakamlagaliriti Musa kuwera kagapanani makabila tisa na nusu. 3 Musa kagapananiti makabila galii mawili na nusu ya isi yawu kwagulawa mshenji mwa Yoridani, kumbiti Walawi waweriti ndiri wapananwa semu yawu pamuhera na womberi 4 Wiwuka wa Yosefu waweriti makabila mawili. Manasi na Efureimu. Likabila lya Lawi lipananituwiti ndiri seemu yoseri ya isi, ila miji hera ya kulikala na semu za maliwuziwu ga mifugu kwajili ya wankanyama wawu. 5 Su Waisraeli waibagula isi gambira Mtuwa Mlungu ntambu yakamlagariti Musa.

6 Lishaka limu wantu wa likabila lya Yuda wamgenderiti Yoshuwa aku Giligali. Karebu mwana gwa Yefuni, mweni kaweriti muntu gwa Kenizi, kamgambiriti Yoshuwa, "Nakaka gulihola Mtuwa Mlungu ntambu yakamgambiriti Musa, muntu gwa Mlungu kuusu neni pamuhera na gwenga patuweriti Kadeshi barineya. 7 Paweriti na umuli gwa vinja alubaini, Musa ntumintumi gwa Mlungu, kandagaliriti kulawa Kadeshi barineya kugenda kuyilolalola isi. Pambuyiti nimjegeriti visoweru vya vitwatira vya aku kulawirana ntambu yanjimiriti mumoyu mwangu. 8 Kumbiti walii yawagenditi pamuhera na neni wawatenditi wantu waweri na lyoga, ila neni nimjimiriti Mtuwa Mlungu gwangu kwa uwaminika. 9 Lishaka ali Musa kanapilira, nakaka semu ya isi ilii yagupipiti hayiweri ya gwenga na wiwuka waku mashaka goseri. Toziya ya waminika waku kwa Mtuwa Mlungu gwangu. 10 Kumbiti vinu guloli! Ndo shaka sha vinja malongu msheshi na muhanu kwanjira Mtuwa Mlungu pakayoweriti na Musa, Waisraeli pawaweriti wankupita kushiwala. Kwanjira shaka ashi Mtuwa Mlungu ntambu yakalagaliriti, kantula mkomu mpaka leru na vinu neni nana umuli wa vinja semanini na mhanu 11 Kumbiti nankali na likakala ntambu yaweriti shaka shilii Musa pakanagaliriti. Ata vinu wera na makakala ga kuweza kulikomana nkondu ama kutenda shintu shoseri shilii. 12 Vinu nduwa gumpanani neni isi ayi ya migongu Mtuwa Mlungu yakanagaliti lishaka lilii. Gwenga gupikaniriti lishaka lilii kuwera Waanaki walikaliti amu mumiji yaiwera na boma, pamonga Mtuwa Mlungu hakaweri pamuhera na neni, na neni hanuwawingi womberi gambira Mtuwa Mlungu ntambu yakatakuliti." 13 Shakapanu Yoshuwa kamtekeleriti Karebu mwana gwa Yefuni na kampananiti mji gwa Hebroni kuwera uhala wakuwi. 14 Su mji gwa Hebroni guwera semu yawu wiwuka wa Karebu mwana gwa Yefuni muntu gwa Kenizi mpaka leru, toziya Karebu kaweriti kamfata Mtuwa Mlungu gwa Israeli kwa moyu gwakuwi goseri. 15 Mji gwa Hebroni mashaka gapititi gushemituwiti Kiriyatiariba. Ariba kaweriti muntu kamanikana kuliku woseri pakati pa Waanaki.

Isi yoseri iweriti na ponga.