1 Wantu wa isi yoseri pawalokiti kala lushemba Yoridani, Mtuwa Mlungu kamgambiriti Yoshuwa, 2 "Gusyaguli wantu lilongu na mbili muwamu mwa Waisraeli, muntu yumu kulawa kila likabila, 3 guwalagaliri kutola mabuwi lilongu na mbili kulawa panu pakati pa lushemba Yoridani, kulawa panu pawagolokiti watambika, mgatoli mabuwi aga na kugatula pahala pamgenda kugonja leru."

4 Su Yoshuwa kawashemiti wantu lilongu na mbili yakawasyaguliti, muntu yumu kulawa kila likabila, 5 kawagambira, "Mulilongoleri lisanduku lya lipatanu lya Mtuwa Mlungu, Mlungu gwenu, mpaka pakati palushemba Yoridani. Pamsoka palii Kila yumu gwenu katoli libuwi kapapi paliwega pakuyi, libuwi limu kwajili ya kila likabila lya Israeli. 6 Shitwatira ashi hashiweri langaliru pakati penu na wananguta wenu pawawakosiya mashaka gagiza, hashi, mabuwi aga gawera na mana gaa kwa mwenga? 7 Mwenga hamuwagambiri, lisanduku lya lipatanu lya Mtuwa Mlungu palipitiziwitwi lushemba Yoridani, mashi ga lushemba alu gagoloka!’ Su mabuwi aga hagaweri maholu kwa Waisraeli mashaka goseri."

8 Wantu wajimiriti malagira ga Yoshuwa na kutenda shili Mtuwa Mlungu shakamlagaliriti. Womberi watoliti mabuwi lilongu na mbili kulawa pakati pa lushemba Yoridani, libuwi limu kwajili ya kila likabila limu lya Israeli, wagenditi naga mpaka pahala palii pawagonjeriti mwanja gwawu, su wagatula aku. 9 Yoshuwa kagamatika mabuwi lilongu na mbili galii mkati mwa lushemba Yoridani, pahala palii pawagolokiti watambika yawapapiti lisanduku lya lipatanu. Mabuwi aga gawera aku mpaka leru. 10 Watambika walii yawapapiti lisanduku lya lipatanu, wagolokiti mkati mwa lushemba Yoridani mpaka wantu pawamaliliti kutenda kila shintu shilii Mtuwa Mlungu shakamlagaliriti Yoshuwa kawagambiri wantu. Yoshuwa katenditi goseri galii yakagambiziwituwiti na Musa. Wantu walokiti kalongola lushemba, 11 palaa palii wantu woseri pawalokiti kala, lisanduku lya Mtuwa Mlungu pamuhera na watambika wawalongoleriti wantu. 12 Wapalu wa likabila lya Rubeni na lya Gadi na nusu ya likabila lya Manasi wawalongoleriti Waisraeli pawawera na vikomaniru vyawu, ntambu yakawalagiliriti Musa. 13 Wantu handa elufu alubaini waweriti kala kwa nkondu wapititi kulongolu kwa Mtuwa Mlungu pawagenda mulularanda lwa mji gwa Yeriku. 14 Mulishaka lilii Mtuwa Mlungu kamkwisa Yoshuwa kulongolu kwa wantu wa Israeli woseri, na womberi wampanana ligoya Yoshuwa mumakaliru gakuyi goseri ntambu yawampananiti ligoya Musa.

15 Shakapanu Mtuwa Mlungu kamgambiriti Yoshuwa 16 "Guwalagaliri watambika yawalipapa lisanduku lya lipatanu walawi mulushemba lya Yoridani." 17 Su Yoshuwa kawagambiriti watambika walii, "Mlawi mulushemba Yoridani," 18 na watambika yawaweriti wapapa lisandiku lya lipatanu lya Mtuwa Mlungu pawalawiti pakati pa lushemba Yoridani na kutimba mpeku ya lushemba Yoridani, mashi ga lushemba Yoridani ganja kunyiririka kayi na kumema gambira kwanja.

19 Wantu awa walokiti lushemba Yoridani mulishaka lya lilongu lya mwezi gwa kwanja na wagenditi kubawira malingu gawu kumji gwa Giligali uwega wa kwagulawa mshenji mwa Yeriku. 20 Yoshuwa kagagolusiyiti mabuwi galii lilongu na mawili aku Giligali gagatolitwi kulawa mulushemba Yoridani. 21 Shakapanu Yoshuwa kawagambiriti Waisraeli, "Mumashaka gagizaku wananguta wenu pawawakosiyani, hashi, mabuwi aga gawera na mana gaa? 22 Su mwenga hamuwawankuli, mabuwi aga gatuholuziya twenga shaka patulokiti lushemba Yoridani pahala papayumiti mashi gakuyi na kugoloka.’ 23 Viraa hamuwagambiri kuwera Mtuwa Mlungu gwenu, kagayumiziyiti mashi ga lushemba Yoridani toziya ya mwenga mpaka palii pamlokiti, ntambu yakagayumiziyiti mashi ga bahari ya Shamu toziya ya twenga. 24 Yomberi katenditi hangu kuwera wantu woseri wa pasipanu wavimani kuwera liwoku lya Mtuwa Mlungu liwera na makakala, su mwenga mumguwiri Mlungu gwenu mashaka goseri."