1 Wantu wa likabila lya Manasi kaweriti mwiwuka gwa kwanja gwa Yosefu, viraa wapananuwitwi enewu lyawu kwa kugalambula simbi. Makiri mwiwuka gwa kwanja gwa Manasi yakawera tati gwa Gileadi wapananuwitwi kala miji ya Gileadi na Bashani kaweriti shonta mgangamala. 2 Wamonga yawasigaliti wa likabila lya Manasi wapananitwi semu yawu kwa kugalambula simbi kulinganira na nkolu zawu. Nkolu azi ziweriti zilii za Abiezeri na Heleki na Asirieli na Shekemu na Heferi na Shemida, woseri awa waweriti wiwuka wapalu wa Manasi mwana gwa Yosefu. 3 Kumbiti Selofehadi mwana gwa Heferi na Heferi kaweriti mwana gwa Gileyadi, Gileyadi kaweriti mwana gwa Makiri na Makiri kaweriti mwana gwa Manasi yakaweriti ndiri na wana wapalu, kumbiti kaweriti na wana wadala.Womberi waweriti Mahila na Nowa na Hogila na Milika na Tiriza. 4 Wahinga awa wamwizira mtambika Eliyazari na Yoshuwa, mwana gwa Nuni na walonguziya wamonga wawagambira, "Mtuwa Mlungu kamgambiriti Musa katubaguliri na twenga twawoseri isi ntambu yawabaguluwa walongu wetu wapalu." Su kugenderana na malagaliru ga Mtuwa Mlungu, Yoshuwa kawapananiti semu yawu ntambu yakawapananiti wapalu wa likabila lyawu. 5 Su likabila lya Manasi lipananitwi semu lilongu lya isi na wawongeruwa isi ya Gileyadi na Bashani yaiwera uwega umonga wa lushemba Yoridani, 6 toziya wahinga wa Manasi wabaguluwitwi semu zawu ntambu yawabaguluwitwi walongu wawu wapalu. Isi ya Gileyadi wapananitwi wiwuka wamonga wa Manasi. 7 Enewu lya likabila lya Manasi lyanjiliti Asheri na kugenda mpaka Mikimetati kwagulawa mshenji mwa Shekemu, shakapanu mbaka yawu iendereya kusika mpaka kuisi ya wenikaya wa Enitapuwa. 8 Isi ya Tapua iweriti uhala wakuwi likabila lya Manasi, kumbiti mji gwa Tapua, gulii guweriti mumbaka guweriti uhala wa wiwuka wa Efurayimu. 9 Mbaka ayi yendereyiti mpaka shishemba sha Kana. Miji yaiweriti kusika ya Kana iweriti ya Waefurayimu tembera iweriti muisi ya likabila lya Manasi. Shakapanu mbaka ya Manasi ipititi kushana mwa lushemba Kana na kupelera bahari ya Mediteraniyani.

10 Isi ya kusika liweriti lya likabila lya Efurayimu na enewu lya kushana liweriti lya likabila lya Manasi, mbaka yakuwi iweriti bahari ya Mediteraniyani uwega wa kwaguzyeta mshenji. Likabila lya Asheri liweriti kushana kwaguzyeta mshenji mwa enewu lya Manasi na kushana kwagulawa mshenji liweriti likabila lya Isakari.

11 Viraa virii muisi ya likabila lya Isakari na likabila lya Asheri, likabila lya Manasi lipananitwi miji ya Beti sheani na Ibileyamu pamuhera na vijiji vyakuwi, na miji ya Dori na En dori na Taanaki na Megidu pamuhera na wenikaya na vijiji vyakuwi na selusi ya Nafutahi. 12 Kumbiti wawuka wa Manasi waweziti ndiri kuwawinga wenikaya wa miji ayi, hangu Wakanaani wendereyiti kulikala amu, 13 tembera ata pa Waisraeli kuwera na makakala nentu, waweza ndiri kuwawinga Wakanaani kumbiti wawatendeziyiti mahengu ga kuwakakanika. 14 Wantu wa likabila lya Yosefu wamgenderiti Yoshuwa, wamgambiriti, "Iwera hashi gutubagulira semu yimu hera ya isi iweri uhala wetu? Twenga tuwera wavuwa nentu toziya Mtuwa Mlungu katutekeleriti." 15 Yoshuwa kawankula, "Handa mwenga muwera wavuwa hangu, ata isi ya vigongu vya Efurayimu viwatosha ndiri kayi, su mgendi kulidowi muisi ya Waperizi na ya Warefai, mwakalihengi lidowi na kulikali aku." 16 Na womberi wamwankula, "Nakaka handa isi ayi ya vigongu itutosheya ndiri, ata hangu Wakanaani woseri walii yawalikala kulularanda wawera na mbutuka za shuma zyazikwegwa na farasi, viraa walii woseri yawalikala Betisheani pamuhera na vijiji vyakuwi na walii yawalikala kulularanda lwa Yezireeli."

17 Su Yoshuwa kawagambira likabila lya Yosefu, ali ndo likabila lya Efurayimu na Manasi, "Nakaka mwenga muwera wavuwa nentu na muwera na makakala nentu. Ifaa ndiri mpati semu yimu hera, 18 kumbiti viraa isi ya vigongu hayiweri yenu. Tembera vinu iwera lidowi, hamulihengi na kuikolamlima yoseri kulawa uwega awu mpaka uwega umonga. Hamuwawusiyi Wakanaani, ata pawawera na mbutuka za shuma zyazikwegwa na farasi na ata pawawera na makakala."