1 Yoshuwa kaweriti mgongolu gwa vinja vivuwa. Su Mtuwa Mlungu kamgambiriti, "Gwenga vinu guwera mgongolu gwa vinja vivuwa na kusigala semu nkulu za isi hazyenitolowu kwa makakala. 2 Isi yaisigaliti ndo isi yoseri ya Wafilisti na Wageshuri, 3 viraa ndo isi lilii lyalimanika handa lya Wakanaani, kwanjira shishemba lwa Shiholi mumbaka mwa Misri mpaka isi ya Ekroni kushana aku, isi yoseri ya wakolamlima muhanu wa Ufilisti mu Gaza na Ashidodi na Ashikeloni na Gati na Ekroni pamuhera na isi ya Waavi uwega wa kusika. 4 Ntambu iraa isi za Wakanaani kwanjira Ara ya Wasidoni mpaka Afeki mumbaka mwa Waamori. 5 Ntambu iraa ilii isi ya Gebali kwagulawa mshenji mwa Lebanoni kulawa Baaligadi muluseleru lwa lugongu Herimoni mpaka Lebohamati, 6 na enewu lya migongu yaiwera pakati pa Lebanoni na Misirefotimaimu lilii wenikaya wakuwi ndo Wasidoni. Waisraeli ntambu yawendereya kugenda kulongolu, neni namweni hanuwawingi wantu wa isi azi kulongolu kwawu. Nagwenga haguwagawili Waisraeli semu za isi azi kwa kugalambula simbi ntambu yanikulagaliriti. 7 Haguzibaguliri isi azi makabila tisa, pamuhera na nusu ya likabila lya Manasi, makabila galii hagenipati shintu."

8 Makabila ga Rubeni na Gadi pamuhera na nusu imonga ya likabila lya Manasi, gapananitwi isi yaiwera kwagulawa mshenji mwa lushemba Yoridani, gambira Mtuwa Mlungu ntambu yakamlagaliriti Musa ntumintumi gwakuwi. 9 Enewu lyawu liweriti kwanjira Aroeri muukingu mwa lularanda lwa Arinoni na mji yaguwera pakati pa lularanda na isi ilii yoseri ya laranda kwanjira Medeba mpaka Diboni, 10 pamuhera na miji yoseri ya mfalumi Sihoni gwa Waamori, yakakolitimlima aku Heshiboni mpaka mumbaka mwa Waamoni, 11 pamuhera na isi za Gileadi enewu lya Wageshuri na Wamakati, lugongu lwa Herimoni na isi yoseri ya Bashani mpaka Saleka, 12 na ufalumi woseri wa Ogu yumu gwa Warefayi yawasigaliti, mweni kakolitimlima aku Ashitaroti na Edireyi Mubashani. Musa kaweriti kawakanka woseri walii na kuitola isi yawu. 13 Pamuhera na hangu Waisraeli wawawingiti ndiri Wageshuri na Wamaaka kumbiti walikaliti muwamu mwa Waisraeli mpaka leru.

14 Musa kawapananiti ndiri nakamu enewu wantu wa likabila lya Lawi. Kumbiti tambiku zyawamlaviliriti Mtuwa Mlungu gwa Israeli kwa kulunguziya motu, tambiku azi ziweriti lifungu lyawu, gambira Mtuwa Mlungu ntambu yakamlagaliriti Musa.

15 Semu ya isi ilii Musa yakawapananiti wantu wa likabila lya Rubeni kulinganira na kolu zawu, 16 Iweriti kwanjira Aroeri mbwega ya lularanda lwa Arinoni pamuhera na mji yaguweriti mulularanda alu pamuhera na miji yakuwi yoseri na isi yayahera migongu ya Medeba. 17 Iweriti viraa pamuhera na Heshiboni na miji yakuwi yoseri yaiwera yahera migongu. Yeni ndo Diboni Bamotibaali na Betibaalimeoni, 18 Na Yahasa na Kedemoti na Mefaati, 19 Kiriataimu na Sibima na Seretisahari, aku kushidunda sha lularanda, 20 na Betipeori na mumiseleru za lugongu Pisiga na Betiyeshimoti 21 na miji yoseri yayahera migongu, isi yoseri ya mfalumi Sihoni gwa Waamori yakakolitimlima aku Heshiboni. Musa kamkankiti mfalumi ayu Sihoni na walongoziya wa Midiyani na Evi na Rekemu na Suri na Huri na Reba ulii yakakolitimlima semu ya isi badala ya mfalumi Sihoni. 22 Mukwongera kwa walii yawahowiti munkondu, shonta lya Israeli limlagiti Balaam yakaweriti mtunga, yomberi kaweriti mwana gwa Beori. 23 Mbaka ya isi ya likabila lya Rubeni uwega wa kwaguzyeta mshenji iweriti lushemba Yoridani. Miji na maenewu yagakantitwi panu iweriti semu yawapananitwi wantu wa nkolu za likabila lya Rubeni.

24 Semu ya isi ilii Musa yakawapananiti wantu wa likabila lya Gadi kulingalira na nkolu zawu, 25 iweriti Yazeri na miji yoseri ya Gileadi na nusu ya isi ya Waamoni mpaka Aroeri yaiwera pakwegera na mji gwa Raba. 26 Viraa virii kwanjira Heshiboni mpaka Ramati mizipa, Betonimu na kulawa Mahanaimu mbaka ya Debiri. 27 Viraa miji yaiweriti mulularanda lwa Betiharamu na Betinimra na Sukoti na Zafoni na isi yaisigaliti ya mfalumi Sihoni gwa Heshiboni. Mbaka yawu uwega wa kwaguzyeta mshenji guweriti lushemba Yoridani gusoka mpaka litanda Galilaya. 28 Miji na vijiji avi ndo vyawapananitwi wantu wa likabila lya Gadi kulinganira na nkolu zawu.

29 Kayi Musa kaweriti kalipananiti nusu ya likabila lya Manasi kulinganira na nkolu zawu, 30 enewu la isi kwanjira Mahanaimu mpaka kwingira muisi yoseri yaiweriti ya mfalumi Ogu aku Bashani, pamuhera na miji malongu sita ya Yairi. 31 Na nusu ya Gileyadi na Ashitaloti na Edireyi yaikolitwimlima na mfalumi Ogu gwa aku Bashani. Kulinganira na nkolu zawu enewu ali wapananitwi nusu ya wiwuka wa Makiri mwana gwa Manasi.

32 Musa kawabaguliriti semu azi za isi zyaziweriti uwega wa kwagulawa mshenji mwa Yeriku na Yoridani, pakaweriti kularanda za Mowabu. 33 Kumbiti Musa kalipananiti ndiri likabila lya Walawi semu yawu ya isi, toziya kawagambiriti kuwera semu yawu ndo Mtuwa Mlungu gwa Israeli.