1 Wafalumi woseri yawaweriti kumwambu kulushemba Yoridani muisi ya kumigongu na kulularanda na enewu lyoseri ya mpeku za bahari ya Mediteraniya kulola Lebanoni na Wahiti na Waamori na Wakanaani na Waperizi na Wahivi na Wayebusi, pawapikaniriti visoweru vya Waisraeli. 2 Walijojonira pamuhera kwa nfiru yimu su kulikomanga nkondu na Yoshuwa pamuhera na Waisraeli.

3 Kumbiti wenikaya wa Gibeyoni pawapatiti shisoweru kuusu Yoshuwa ntambu yakayitenditi miji ya Yeriku na Ai, 4 womberi wamuwa kutenda upayira. Watandira viboga, wakweneziya malobota gasakaliti panani pa punda wawu, muvihaku vya lukuli visakaliti na kusonuwa. 5 Wavala vilwatu na nguwu zyazisakaliti na viboga vyawu vyoseri viweriti viyuma vyavimeriti ukungu. 6 Su wamgendera Yoshuwa kuliringu aku Giligali, wamgambira yomberi pamuhera na Waisraeli, "Twenga tulawa isi ya kutali nentu, shondi mtendi lipatanu pamuhera na twenga." 7 Kumbiti Waisraeli wawankula Wahivi, "Hatuwezi hashi kutenda lipatanu na mwenga? Pamonga mwenga mulikala pakwegera na twenga" 8 Na womberi wamgambira Yoshuwa, "Twenga twantumintumi waku." Yoshuwa kawakosiya, "Hashi, mwenga mwashina gaa na mlawa koshi?" 9 Womberi wamwankula, "Twenga wantumintumi waku, tulawa isi ya kutali nentu, twiza toziya tupikinira zyumi za litawu lya Mtuwa Mlungu gwenu, tupatiti visoweru vya umanika wakuwi na goseri gakatenditi muisi ya Misri. 10 Tupikaniriti vyoseri vyakawatendiriti wafalumi walii wa Waamori, yawaweriti kumwambu kulushemba Yoridani, mfalumi Sihoni gwa Heshiboni pamuhera na mfalumi gwa Ogu gwa Bashani yakalikaliti aku Ashitaroti. 11 Ndo wazewi wetu pamuhera na wenikaya woseri wa isi yetu, watugambiriti tutoli viboga vya mwanja, twizi tuliwoni na mwenga na kuwagambira twenga ndo wantumintumi wenu, shondi mtendi lipatanu na twenga. 12 Guloli mabumunda getu gaweriti gankali motu patugatoliti shaka patuwukiti ukaya kwetu, kumbiti vinu gayuma na kumera ukungu. 13 Vihaku vyavinyatwi kwa lukuli ali tuvimemiziyiti divayi paviwera vyasyayi, kumbiti vinu idegeka. Ata nguwu pamuhera na vilwatu vyetu visakala toziya mwanja guweriti mtali nentu."

14 Su Waisraeli watoliti viboga virii pota ya kumkosiya Mtuwa Mlungu. 15 Yoshuwa katenditi nawu mapatanu ga ponga, katenditi lipatanu kuwera hakawajimili walikali. Walonguziya wa shipinga sha Waisraeli wawalapiriti kugatenda mapatanu aga.

16 Mashaka matatu pa kutenda lipatanu na womberi, Waisraeli wayambuliti kuwera wantu walii waweriti wapakwegera wawu na walikaliti muwamu mwawu. 17 Su Waisraeli wanja mwanja, pa mashaka matatu wasokiti mumiji yawu. Miji ayi iweriti Gibioni na Kefira na Beerotihi na Kiriyati yearimu. 18 Kumbiti Waisraeli wawalagiti ndiri, toziya walongoziya wa Waisraeli wawalapiriti kwa litawu lya Mtuwa Mlungu gwa Israeli. Su Waisraeli woseri yawahinginikiyiti walongoziya wawu. 19 Kumbiti walongoziya wa Waisraeli washigambiriti shipinga sha wantu wau, "Toziya tuwalapiriti kwa litawu lya Mtuwa Mlungu gwa Israeli, vinu hapeni tuwalagi. 20 Hatuwaleki walikali su natwiza kwazibiwa toziya ya kulirapa kwatutenditi. 21 Muwaleki walikali." Su Wagibeyoni waweriti wankuwatendera wantu woseri wa Israeli, pawawabawulira mbawu na kuwatekera mashi, handa walongoziya wa Waisraeli ntambu yawalongiti.

22 Yoshuwa kawashema Wagibeyoni na kuwakosiya, "Ntambu hashi mtuzyangiti kuwera mlawiti isi ya kutali, uganu mwenga mulikala muwamu mwetu? 23 Vinu mwenga mpangiruwa na wamu wenu mashaka goseri hamuweri wamanda wa kubawula mbawu na kuteka mashi kwajili ya Numba ya Mlungu gwangu." 24 Womberi wamwankula Yoshuwa, "Tugambiluwa kuwera nakaka Mtuwa Mlungu gwenu, kamlagaliriti Musa ntumintumi gwakuwi kawagamiziyi wenikaya woseri wa isi ayi na kuwapanana mwenga isi ayi iweri yenu. Su twenga tuweriti na lyoga nentu kuusu makaliru getu, ndo mana tutenditi shitwatira ashi. 25 Vinu twenga tuwera mumakakala gaku, gututenderi ntambu yaguwona iherepa."

26 Su Yoshuwa kawalopuziyiti na kalekiti ndiri walaguwi na Waisraeli, na Waisraeli wawagamiziyiti ndiri. 27 Kumbiti kwanjira lishaka lilii, Yoshuwa kawatenditi womberi waweri wabawula mbawu pamuhera na wateka mashi kwajili ya shipinga shoseri sha Waisraeli, viraa kwajili ya shitalawanda sha kutambikira sha Mtuwa Mlungu pahala pakapasyaguliti. Shitwatira ashi shiwera mpaka leru.