1 Wafalumi woseri wa Waamori yawalikaliti kumwambu kwa guzyeta mshenji mwa Yoridani na wafalumi woseri wa Wakanaani yawaweriti kumpeku mwa bahari ya Meditireniya, pawapikaniriti kuwera Mtuwa Mlungu kagayumiziyiti mashi ga lushemba Yoridani kwajili ya Waisraeli mpaka pawalokiti kala, womberi watwezuka twezu na waperuwituwiti makakala nakamu kwa kuwatira Waisraeli.

2 Shakapanu Mtuwa Mlungu kamgambiriti Yoshuwa, "Gunyawi vimagi vya mabuwi gakamala su gwawingiziyi jandu Waisraeli." 3 Su Yoshuwa kanyawiti vimagi avi vya mabuwi makamala na kuwingiziya jandu Waisraeli aku Gibea haaralotihi. 4 Toziya ya kuwingiziya jandu Waisraeli ndo ayi. Waisreli woseri wapalu yawalawiti Misri yawaweriti na umuli wa kugenda kunkondu, woseri wahowiti mumwanja kushiwala pa kulawa muisi ya Misri. 5 Woseri walii yawalawiti Misri waingiziwitwi jandu, kumbiti wantu woseri walii yawayiwukiti kushiwala pawaweriti mumwanja kulawa Misri, wingiziwituwiti ndiri jandu. 6 Waisraeli waweriti mumwanja kwa shaka sha vinja malongu msheshi kushiwala, mpaka wapalu woseri yawaweriti na umuli wa kugenda munkondu wahowiti toziya wapikaniliti ndiri shakalongiti Mtuwa Mlungu. Mtuwa Mlungu kawalapiriti wantu walii kuwera hapeni wayiwoni isi ilii yaiwera na ntundu ziherepa za kuiliziya mifugu na yaiwera na mbotu kwa kulima, isi ilii Mtuwa Mlungu yakawalapiriti kuwera hakawapanani wazewi wawu. 7 Hangu ndo iweriti wana awa, weni Mtuwa Mlungu kawaleriti waweri pa womberi, ashi ndo shileri sha syayi sheni Yoshuwa shakashingiziyiti jandu.

8 Wapalu woseri pakawaingiziyiti kala jandu, su wasigaliti kulikala kumalingu gawu mpaka pawaponiti. 9 Shakapanu Mtuwa Mlungu kamgambiriti Yoshuwa, "Leru nuwawusilirani mwenga soni ilii ya kuwera aku Misri." Su pahala palii mpaka leru pashemuwa Giligali.

10 Waisraeli pawabawiriti malingu aku Giligali mulularanda lyaliwera pakwegera na Yeriku, womberi watenditi msambu gwa Pasaka pashimihi mulishaka lya lilongu na msheshi lya mwezi. 11 Shirawu yakuwi kwa mala ya kwanja waliyiti shiboga shashimeriti Mukanaani, waliyiti ntutu pamuhera na mabumunda yawagalekeluwa ndiri simika. 12 Shiboga shawashishemiti mana shilekiti kutuluka, na Waisraeli wapatiti ndiri kayi shiboga ashi. Kwanjira shaka shilii womberi waliyiti shiboga shashimeriti Mukanaani.

13 Lishaka limu Yoshuwa pakaweriti pakwegera na mji gwa Yeriku, kamwoniti muntu kagoloka kulongolu kwakuwi pakawera na ligumba muliwoku lyakuyi. Yoshuwa kamgenderiti yomberi na kumkosiya, "Hashi, gwenga gwa yumu gwa wamashonta watwenga ama gwa wankondu?"

14 Yomberi kamuwankula, "Ndala neni gwenu ndiri pota gwa wankondu wenu. Neni napanu handa mkulu gwa lishonta lya Mtuwa Mlungu."

Yoshuwa kasuntamala makukama na kuguwira pakalonga, "Mtuwa gwangu, neni ntumintumi gwaku. Gufira neni ntendi ashi?"

15 Su mkulu gwa lishonta lya Mtuwa Mlungu kamwankula, "Guvuli vilwatu vyaku toziya pahala pagugoloka ndo pananagala." Yoshuwa katenditi ntambu yakalagiritwi.