1 Isi yawabagulilitwi wiwuka wa Yosefu kwa kugalambula simbi yanjiti pakwegera na lushemba Yoridani, kwagulawa mshenji mwa mbwiru ya Yeriku na kupitira kushiwala, mpaka kusemu za lugongu mpaka Beteli. 2 Kulawa Beteli igenditi Luzu ipita Atoroti kulii kwawalikaliti Waariki. 3 Shakapanu isuluka kwaguzyeta mshenji muisi ya Wayafileti mpaka Betihoroni ya pasi na Gezeri na kupelera kubahali ya Mediteraniya. 4 Wiwuka wa Yosefu, ndo likabila lya Manasi na likabila lya Efureimu, wapananitwi isi iweri uhala wawu.

5 Wantu wa Likabila lya Efurayimu kulinganira na lukolu lwawu wapatiti semu yaiwera mbaka yawu uwega wa kwagulawa mshenji ipititi Ataroti adari mpaka Beti horoni ya pampindi, 6 na kupelera bahari ya Mediteraniyani. Kwa uwega wa kushana mbaka ipititi Mikimetati na uwega kwagulawa mshenji guzyengeta na kugendera Taanati shilu mpaka Yanowa. 7 Kulawa Yanowa igenditi mpaka Ataroti na Naara, mpaka kusoka Yeriku, kulii ipeleriti mulushemba Yoridani. 8 Kulawa Tapuwa, mbaka igenditi kwaguzyeta mshenji mpaka lushemba lwa Kana na kupelera bahari ya Mediteraniyani. Ayi ndo isi yawapananitwi wantu wa likabila lya Efureimu kulinganira na nkolu zawu, 9 pamuhera na miji na vijiji virii wongelelitwi kulawa kuisi ya likabila lya Manasi. 10 Waefurayimu wawawingiti ndiri Wakanaani yawalikaliti Gezeri. Wakanaani awa wendereyiti kulikala muwamu mwa wantu wa Efurayimu mpaka leru, pawawera wamanda wa kuwatendeziya mahengu ga kukakanika.