1 Mandawira putiputi Yoshuwa pamuhera na wantu wa Israeli wanjiti mwanja kulawa Shitimu. Pawasokiti kulushemba Yoridani, wagonjiriti panu kwa shipindi pamberi pa kuloka. 2 Pa mashaka matatu walongoziya wapititi pakati pa lugonjeru alu, 3 na kuwagambira wantu, "Pamuwawona watambika wa likabila lya Walawi wapapa lisanduku lya lipatanu lya Mtuwa Mlungu gwenu, hamuwuki na kulifata. 4 Ndo hamuvimani njira ya kupita toziya hamweni piti aku nakamu. Kumbiti namulisegelera nentu lisanduku lya lipatanu, muweri utali handa kilomita yimu."

5 Yoshuwa kawagambiriti wantu, "Mulipungi maweni, toziya shirawu Mtuwa Mlungu hakatendi mauzauza pakati pa mwenga." 6 Shakapanu Yoshuwa kawagambiriti watambika, "Mtoli lisanduku lya lipatanu, mlongoleri nali kulongolu kwa wantu." Womberi walitoliti na kulongolera kulongolu kwa wantu.

7 Mtuwa Mlungu kamgambira Yoshuwa, "Leru panu, hananji kukukwisa kulongolu kwa wantu woseri wa Israeli su wavimani kuwera, ntambu yaweriti pamuhera na Musa, ndo viraa haweri pamuhera na gwenga. 8 Guwagambiri watambika awa yawapapa lisanduku lya lipatanu pawasoka mulushema Yoridani, wagendi wagoloki mumashi."

9 Shakapanu Yoshuwa kawagambiriti Waisraeli, "Mwizi panu mpikaniri shilii shakalongiti Mtuwa Mlungu gwenu." 10 Yoshuwa kendereya kulonga, "Vinu hamumaniziwi nakamu handa Mlungu yakawera mkomu kamuwamu mwenu na handa hakawawingi kulongolu kwa mwenga Wakanaani na Wahiti na Wahivi na Waperizi na Wagirigashi na Waamoni na Wayebusi pota kusinda. 11 Lisanduku lya lipatanu lya Mtuwa Mlungu gwa pasipanu poseri lyapakwegera kupita kulongolu kwamwenga kugenda kuloka kulushemba Yoridani. 12 Vinu msyaguli wantu lilongu na mbili kulawa kila likabira lya Israeli, kila likabira muntu yumu. 13 Shaka nzayu za watambika yawapapa lisanduku lya lipatanu lya Mtuwa Mlungu, Mtuwa gwa pasipanu poseri, pazingira mumashi ga lushemba Yoridani, mashi ga lushemba hagaleki kunyililika na galii gagiza uwega wa kushana hagaweri pahala pamuhera handa shidunda."

14 Su wantu watupuliti malingu gawu wagenda kuloka lushemba Yoridani, watambika yawapapa lisanduku lya lipatanu wawalongoleriti wantu.

15 Palaa palii awa yawapapiti lisanduku lya lipatanu pawasokiti Yoridani na zyayu zawu pazitimbiti muunenemu mwa lushemba Yoridani, lushemba lweni lirawa shaka sha kubenanga, 16 mashi gaweriti ganyililika kulawa uwega wa kushana gagolokiti na kulimamatira mpaka aku Adamu kushijiji shashiwera pakwegera na mji gwa Saretani. Mashi yagaweriti gankunyililika kugenda bahari ya Araba viraa ishemuwa bahari ya munu, gayumiti nakamu, wantu walokiti kumwambu kwa Yeriku. 17 Shaka Waisraeli pawaweriti wankuloka, watambika yawaweriti wankulipapa lisandiku lya lipatanu, wagolokiti pahala payuma pakati pa lushemba Yoridani mpaka wantu woseri pawalokiti.