1 Awa ndo wafalumi walii Waisraeli wawakankiti na kutola kwa makakala isi yawu yoseri yaiweriti kwagulawa mshenji mwa lushemba Yoridani kulawa lularanda lwa lushemba Arinoni mpaka lugongu Herimoni na isi yoseri ya Araba uwega wa kwagulawa mshenji. 2 Mfalumi Sihoni gwa Waamori yakalikaliti aku Heshiboni na kakolitimlima aku Aroeri, mji yaguweriti mumbwega ya lularanda lwa Arinoni. Kakolitimlima viraa kwanjira pakati pa lularanda mpaka lushemba Yaboki, lushemba lulii luweriti mbaka ya isi ya Waamoni, ndo ilii nusu ya isi ya Gileadi. 3 Viraa virii kakolitimlima isi yoseri ya Araba, kulawa bahari ya Kinereti, uwega wa kwagulawa mshenji, mpaka Beti yeshimoti bahari ya munu na kwendeleya mpaka isi ya luseleru lwa lugongu Pisiga. 4 Yumonga ndo mfalumi Ogu yumu gwa Warefai yawasigaliti, ulii kakolitimlima Bashani na kalikaliti Ashitaroti na Edireyi. 5 Ukolamlima wakuwi ueneyiti aku kulugongu Herimoni aku Saleka, Bashani yoseri mpaka mumbaka ya Wageshuri na Wamaaka na nusu ya Gileyadi mpaka mumbaka mwa isi ya mfalumi Sihoni gwa Heshiboni. 6 Musa ntumintumi gwa Mtuwa Mlungu pamuhera na Waisraeli wawakankiti wafalumi awa, kagapananiti isi azi makabila ga Rubeni na Gadi na nusu ya likabila lya Manasi iweri yawu nakamu.

7 Shapanu Yoshuwa pamuhera na Waisraeli wawakankiti wafalumi woseri wa enewu lyaliwera kwaguzyeta mshenji mwa lushemba Yoridani, kwanjira Baaligadi mulularanda lwa Lebanoni mpaka lugongu lwaluhera shintu lwa Halaki kusika pakwegera na Seiri. Yoshuwa kagapananiti makabila ga Israeli isi zilii ziweri zawu nakamu. 8 Isi azi ziweriti pamuhera na semu za vigongu, Isi laranda enewu lya Araba na miseleru ya migongu, maenewu ga shiwala na enewu lya Negebu, isi yaziweriti za Wahiti na Waamori na Wakanaani na Waperizi na Wahivi na Wayebusi. 9 Waisraeli wawakankiti wafalumi awa. Mfalumi yumu gwa Yeriku na mfalumi yumu gwa Ai mji yaguwera pakwegera na Beteli. 10 Mfalumi yumu gwa Yerusalemu na mfalumi yumu gwa Hebroni, 11 na mfalumi yumu gwa Yarimiti na mfalumi yumu gwa Lakishi. 12 Mfalumi yumu gwa Eguloni na mfalumi yumu gwa Gezeri, 13 na mfalumi yumu gwa Debiri na mfalumi yumu gwa Gederi. 14 Mfalumi yumu gwa Horima na mafalumi yumu gwa Aradi, 15 na mfalumi yumu gwa Libina na mfalumi yumu gwa Adulamu 16 na mfalumi yumu gwa Makeda na mfalumi yumu gwa Beteli. 17 Mfalumi yumu gwa Tapuwa na mfalumi yumu gwa Heferi 18 na mfalumi yumu gwa Afeka na mfalumi yumu gwa Lasharoni na 19 mfalumi yumu gwa Madoni na mfalumi yumu gwa Hazori. 20 Mfalumi yumu gwa Shimirunimeroni na mfalumi yumu gwa Akishafi 21 na mfalumi yumu gwa Taanaki na mfalumi yumu gwa Megido. 22 Mfalumi yumu gwa Kadeshi na mfalumi yumu gwa Yokineamu mji yaguwera kulugongu Karimeli na 23 mfalumi yumu gwa Dori mumkowa gwa Nafatidori na mfalumi yumu gwa Goiimu aku Giligali na 24 mfalumi yumu gwa Tiriza. Walanga ya wafalumi awa iweriti malongu matatu na yimu.