1 Shakapanu Mtuwa Mlungu kamgambira Yoshuwa, 2 Guwagambiri Waisraeli, "mtuli gweka miji ya kutugira kuponera, ntambu yanukulagaliriti kupitira Musa, 3 Muntu yoseri pakamlaga muntu pota kukusudiya kaweza kutugira kumji gumu gwawu na hangu kumshapira muntu ulii yakawera na lihengu lya kuwuzilira kwa kulaga. 4 Muntu yakalaga katugiri kumji gumu gwawu na kugoloka paligomi lya mji na kuwagambira wazewi wa mji agu lishitaka lyakuyi. Wazewi hawamwingiziyi mngati na kumpanana pahala pa kulikala pamuhera na womberi. 5 Uli yakamwuzilira pakamgendera mpaka kumjini, wazewi wa mji agu wajimiruwa ndiri kumlaviya mlaga ayu kwa yakawuzilira, toziya kamlagiti myaguwi kwa kufira ndiri, kwaniti unkondu ndiri pakati pawu shaka shipititi. 6 Mlaga hakendereyi kulikala amu mpaka palii pakatozwi kulongolu kushipinga shoseri sha Israeli na viraa mpaka palii mtambika mkulu ulii yakaweriti na ukulu shaka ashi pakahowa. Pa panu muntu ayu hakawezi kuwuya ukaya kwakuwi kumji gulii gwakatololikiti." 7 Su, toziya ayi wayitula gweka miji ya Kadeshi Mugalilaya kumigongu ya Nafutali, Shekemu mumigongu ya Efureimu na Kiriati Ariba ndo Hebuloni muisi ya migongu ya Yuda. 8 Kumwambu mwa lushemba Yoridani, kwagulawa mshenji mwa mji gwa Yeriku, watuliti mji gwa Bezeri yaguweriti kushiwala lularanda na mji agu ndo gwa likabila lya Rubeni. Viraa watuliti Ramoti aku Gileadi agu ndo mji gwa likabila lya Gadi na Golani aku Bashani muenewu lya likabila lya Manasi. 9 Ayi ndo miji yaitulitwi gweka kwajili ya wantu woseri wa Israeli na wahenga yawalikaliti muwamu mwawu, su muntu yoseri yakamlaga myaguwi pota kukusudiya katugiri aku nakiza kulaguwa na yakana utoza wa kuwuzilira kwa kulaga, mpaka palii hakatozwi kulongolu kwa shipinga shoseri.