1 Pa kuyikanka isi ilii, shipinga shoseri sha Israeli shijojonikiti aku Shilo na kulibawira liringu linanagala. 2 Kulii gasigaliti makabila saba ga Waisraeli gawapananitwi ndiri isi kuwera uhala wawu.

3 Su Yoshuwa kawagambiriti Waisraeli, "Hashi, hamkawi mpaka ndii kugenda kuyikolamlima isi ilii Mtuwa Mlungu gwa wambuyi wenu kawapanana? 4 Msyaguli wantu watatu kulawa mukila likabila niwalagaliri muisi yoseri wailoliloli na kulemba lamani kulinganira na makabila gawu, shakapanu wanjegeri shawawoniti. 5 Na womberi hawayibagulangi isi ayi semu saba. Likabila lya Yuda halisigali na semu yakuwi ya kusika na likabila lya Yosefu kushana. 6 Mlembi weri kuusu semu zoseri saba na kunjegera. Shakapanu hang'alambuli simbi kulongolu kwa Mtuwa Mlungu gwetu, kuusu semu ya kila likabila lyenu. 7 Kumbiti Walawi hapeni wapati semu yoseri pakati penu, toziya semu yawu hayiweri watambika wa kumtendera Mtuwa Mlungu. Gadi na Rubeni pamuhera na nusu ya likabila lya Manasi wapatiti kala semu yawu uwega wa kwagulawa mshenji mwa lushemba Yoridani. Wapananituwiti semu ilii na Musa ntumintumi gwa Mtuwa Mlungu." 8 Su wantu awa wanjiti mwanja gwa kugenda kuilolalola isi. Pamberi pa kugenda, Yoshuwa kawalagaliriti pakawagambira, "Mgendi kuisi koseri mwakalembi weri visoweru kuusu isi ilii, shakapanu muwuyi mung'ambiri, shakapanu hang'alambuli simbi kulongolu kwa Mtuwa Mlungu palaa panu Shilo kuusu semu yamgenda kupananwa." 9 Wantu walii wawukiti na kugenda kuisi ilii yoseri. Walembiti weri visoweri kuusu semu zilii saba pamuhera na miji yakuwi, shakapanu wawuyiti kwa Yoshuwa kumalingu kulii Shilo. 10 Shakapanu Yoshuwa kazigalambuziyiti simbi aku Shilo kulongolu kwa Mtuwa Mlungu kuusu semu zilii, su kawabaguliriti Waisraeli, kila likabila ipatiti semu yakuwi.

11 Simbi ya kwanja ipatiti likabila lya Benjamini kulinganira na nkolu zakuwi. Enewu lyawapananitwi wantu awa liweriti pakati pa likabila lya Yuda na lilii lya likabila lya Yosefu. 12 Mbaka yakuwi ya kushana iyanjiti lushemba Yoridani na kupitira kushana mwa Yeriku na isi ya vigongu paigenda kwaguzyeta mshenji mpaka kushidowi sha Beti yaveni. 13 Kulawa aku, mbaka yakuwi igenditi kusika kugenda Luzu kupitira uwega wa kusika mwa Luzu, Luzu imanikana handa Beteli, su igenditi mpaka Ataroti yadari, kulugongu lwaluwera kusika mwa Beti horoni ya pasi. 14 Mbaka yawu ya kwaguzyetera mshenji ndo kulawa kushigongu shashilolana na Beti holoni kwa uwega wa kusika mbaka igalambukiti payipita kumbwega mwa isi ya Wabenjamini na kusoka Kiliati baali agu ndo Kiliati jearimu yaguweriti mji gwa wantu wa Yuda. 15 Uwega wa kusika mbaka yakuwi iyanjiti uwega wa upeleru wa mji gwa Kiriyatiyearimu, isoka Efroni na kugenda mpaka kumbwiru ya mashi ya Nefutowa. 16 Shakapanu igenditi pasi kupitira kumbeku mwa lugongu lwaluwera pakwegera na lularanda lwa Hinomu, lilii lyaliweriti musemu ya kushana nentu ya lularanda lwa Warefayi. Kayi mbaka iseleriti lularanda lwa Hinomu, kusika mwa lugongu lwa Wayebusi, yendeleya kuselelera mpaka Enirogeli. 17 Aku mbaka igalambukira kugenda kushana kugenda Enishemeshi, ipitira Gililoti pakwegera pashidunda sha Adumimu kuselelera mpaka kulibuwi lya Bohani mwana gwa Rubeni. 18 Kulawa palii mbaka izyengetiti kushana muunenemu mwa pampindi pa Araba na kupelera aku Araba. 19 Kayi yendeleyiti uwega wa kushana mwa lugongu lwa Betihogila na kupelera kushana mwa Bahari ya Munu, pahala palwingilira lushemba Yoridani. Ayi ndo mbaka yakuwi kwa uwega wa kusika. 20 Lushemba Yoridani ndo lyaluweriti mbaka yakuwi uwega wa kwagulawa mshenji. Ndo zyazituluwitwi mbaka za isi zyazipananuwitwi nkolu za likabila lya Benjamini.

21 Miji ya nkolu za likabila lya Benjamini ndo Yeriku na Betihogila na Emekikesisi, 22 na Betiaraba na Zemaraimu na Beteri, 23 na Avimu na Para na Ofura, 24 na Kefaraamoni na Ofini na Geba. Walanga ya miji yawapananitwi iweriti lilongu na mbili pamuhera na vijiji vyakuwi. 25 Miji yamonga iweriti Gibeoni na Rama na Beeroti, 26 na Mizipa na Kefira na Moza, 27 na Rekemu na Iripeeli na Tarala, 28 na Zela na Haelefu na Yebusi gushemuwa viraa Yerusalemu na Gibea na Kiriatiyearimu. Walanga ya miji yawapananitwi iweriti lilongu na msheshi pamuhera na vijiji vyakuwi. Yoseri ayi ndo seemu yawapananitwi wantu wa likabila lya Benjamini na nkolu zawu.