1 Mlungu kawapanana ponga Waisraeli kwa shipindi shitali kwa kuwalopola na wankondu wawu mpaka Yoshuwa pakaweriti mgogolu. 2 Yoshuwa kawashemiti Waisraeli woseri pamuhera na walonguziya na wazewi wawu, wamulira na wakulu, kawagambira, "Vinu neni wera mgogolu gwa vinja vivuwa. 3 Mwenga muwona vitwatira vyoseri Mtuwa Mlungu gwenu vyakawatenderiti maisi goseri aga kwajili yenu. Mtuwa Mlungu gwenu, ndo yakawakomaniriti. 4 Isi na maisi yagasigaliti na galii ganuwakangiti nuzibagula ziweri za makabila genu, kulawa Yoridani mpaka bahari ya Mediteraniya, uwega wa kwaguzyeta Mshenji. 5 Mtuwa Mlungu gwenu, hakawawusiyi kulongolu kwenu na kuwawinga nakamu, na mwenga hamuyihali isi yawu handa Mtuwa Mlungu, ntambu yakalagaliriti. 6 Hangu, muweri wagangamala mukutenda goseri yagalembitwi mushintola sha lagiru lya Musa, nakaka namgaleka. 7 Namwera pamuhera na maisi aga yagasigaliti pakati penu. Namuwakanta wamlungu wawu ama namulirapa kwa matawu ga wamlungu wawu, namuyitendera ama kuyisuntamalira. 8 Mgendi pamuhera na Mtuwa Mlungu gwenu ntambu yamtenditi mpaka leru. 9 Toziya Mtuwa Mlungu kawawinga kulongolu kwenu wantu yawawera na makakala na kwahera muntu yakaweza kuwalewelera mwenga mpaka leru. 10 Muntu gwenu yumu hera kaweza kawatugiziya wankondu elufu, toziya Mtuwa Mlungu gwenu ndo yakawakomangira ntambu yakawalagiliti. 11 Su muliloleri weri kumfira Mtuwa Mlungu gwenu. 12 Toziya handa pamumlema Mtuwa Mlungu na kuwera pamuhera na maisi aga yagasigaliti pakati penu, pamyuga wahinga wawu na womberi kuyuga wahinga wenu, 13 muvimani nakaka kuwera Mtuwa Mlungu gwenu, hapeni kendereyi kugawinga maisi aga kulongolu kwenu, kumbiti hagaweri kwa mwenga shidiwiru na migomiziwu. Isi azi haziweri mboku za kuwasyatira na misontu ya kuwasomera mumasu mpaka palii pamwagamira na kuwuka muisi iherepa ilii Mtuwa Mlungu gwenu, kawapanana."

14 "Vinu shaka shangu sha kuhowa ntambu yaiwera pasipanu poseri shapakwegera. Kumbiti mwenga muvimana pota kufifa mumiyoyu na murohu mwenu kuwera muvitwatira vyoseri viheri virii Mtuwa Mlungu gwenu kawalagaliriti. Kwahera ata limu lyeni litendeka ndiri, kumbiti goseri gatendekiti ntambu yakalagiliti. 15 Kumbiti handa virii Mtuwa Mlungu gwenu, ntambu yakatenditi vitwatira vyoseri viheri vyakalagaliti, ntambu ilaa kaweza kuwajegera makontola goseri mpaka kawalagi woseri kulawa isi ayi iherepa yakawapanana. 16 Handa pamulileka lipatanu lyakuyi Mtuwa Mlungu gwenu, liliii lyakawagambiriti mulikoli, na mwenga mgenda kuyitendera milungu imonga na kuyisuntamalira, su maya ga Mtuwa Mlungu hagaweri kwa mwenga, na mwenga hamwangamiri kamkamu kulawa isi ayi iherepa yakawapanana."