1 Musa kendereyiti kuwagambira Waisraeli, handa pamjimira shilii Mtuwa Mlungu shakafira na kuwera waminika kujimira kila shintu shanuwalagalira leru, mweni hakatukweniziyi nentu kuliku isi zyamonga pasipanu. 2 Handa pamjimira kutenda shilii shakalagalira Mtuwa Mlungu gwenu, mwenga hampananwi matekeleru aga.

3 Mtuwa Mlungu hakatekeleri pamuhera mjini,

viraa hakawatekeleri mumalambu genu.

4 Mtuwa Mlungu hakawateleri mwenga kwa kuwapanana wana wavuwa na kuwapanana viboga vivuwa na wang'ombi wavuwa na wakondolu wavuwa.

5 Mtuwa Mlungu hakawateleri mwenga muweri na mabenu gavuwa su muwezi kuliya.

6 Mtuwa Mlungu hakawatekeleri mwenga mukila shintu shamtenda.

7 Mtuwa Mlungu hakawatendi mwenga muwakomangi wangondu wenu, hawakangali mwenga muuwega wumu, kumbiti womberi hawatugi kulawa kwenu muuwega saba.

8 Mtuwa Mlungu hakawatekeleri mwenga kwa kuzimemiziya hanja zyenu za viboga, viraa hakawatekeleri mumahengu goseri gamtenda, hakawatekeleri viraa muisi yakagenda kuwapanana muhali.

9 Mwenga pamjimira malagaliru gakuyi goseri galii Mtuwa Mlungu gwenu yakawapanana leru, pamulikala makaliru gakafira, su hakendereyi kututenda tuweri wantu wakuwi wananagala ntambu yakalagiliti. 10 Shakapanu wantu woseri pawawona mwenga kuwera Mtuwa Mlungu kawasyagula muweri wantu wakuwi, wantu woseri pasipanu hawawatiri. 11 Mtuwa Mlungu hakawatendi mwenga mfanikiwi. Mwenga hamuweri na wana wavuwa na mifugu ivuwa na mabenu gavuwa kulawa mumalambu genu muisi ilii yakawalagiliti wambuyi wetu kuwera hakawapanani. 12 Mtuwa Mlungu hakawavugulirani hanja zyakuwi ziherepa za mvula kulawa kumpindi na kutowa mvula muisi kwa shaka sha mvula na hakagatekeleri mahengu genu. Mwenga hamuwawandi wantu wa isi zivuwa, kumbiti mwenga hapeni mwanki shoseri kulawa kwawu. 13 Mwenga pamuhera waminika kugajimira malagaliru goseri ga Mtuwa Mlungu gwenu, galii ganuwapanana leru, Mlungu hakawakweniziyi nentu mwenga kuliku isi zyamonga. 14 Mtuwa Mlungu hakavitendi vitwatira avi kwa gwenga, handa pagujimira shilii shanuwalagalira mwenga leru, ama pamlema kuwajimira wamilungu wamonga.

15 Kumbiti pagulema kutenda shilii Mtuwa Mlungu shakawagambiriti mtendi, pamuhera ndiri waminika kujimira mashariti goseri na malagizu goseri galii ganuwapanana leru, Mtuwa Mlungu hakawapangiri ntambu ayi.

16 Mtuwa Mlungu hakawapangiri mwenga pamuhera mjini, viraa hakawapangiri mwenga mumalambu genu.

17 Mtuwa Mlungu hakawapangiri mwenga kwa kuwapanana ndiri viboga vivuwa na su muwezi kunyawa mabumunda.

18 Mtuwa Mlungu hakawapangiri mwenga kwa kuwapanana wana watangarandiri na viboga vyenu havipangiruwi, hakawapangiri wang'ombi wenu na wakondolu wenu nawongereka.

19 Mtuwa Mlungu hakakupangiri mukila shintu shagutenda.

20 Mwenga pamuvitenda vintu vikontola na kumlema Mtuwa Mlungu, yomberi hakawapangiri mwenga msindi kutenda shintu shoseri na mpati shida na mshashatiki mukila shintu shamtenda, mpaka palii wangondu wenu pawawagamiziya nakamu. 21 Su Mtuwa Mlungu hakawajegeri malweri ga kutiriziya mpaka woseri pamwagamiya nakamu muisi ilii yamgenda kuitola kwa makakala. 22 Mtuwa Mlungu hakawakomangi kwa kuwajegera ulweli gwa shifuwa shikulu na nshimba kupyupa na maputi na livuki likalipa na mvula kuleka kutowa, lipuga na lifukafuka. Vitwatira avi haviwapati mwenga mpaka mwagamili nakamu. 23 Kumpindi hakuyumi gambira madini ga shaba ntiti na pasipanu hapayumi gambira shuma. 24 Mtuwa Mlungu hakagalambuli mvula yaitowa muisi yenu iweri ubumu na muhanga hawitiki kulawa kulyera mpaka mwenga mwagamiri nakamu.

25 Mtuwa Mlungu hakawatendi wangondu wenu wawakomangi. Mwenga hamgendi kuwakangala wangondu wenu kupitira uwega wumu, kumbiti hamtugi kulawa kwawu kupitira wega saba. Na wantu woseri wa pasipanu hawatiriziwi pawawona virii vyaviwalawira kwa mwenga. 26 Mwenga pamuhowa, wampongu pamuhera na wankanyama wa kuntundu hawizi kuliya mitugulu yenu, hapeni kuweri na muntu gwa kuwawinga. 27 Mtuwa Mlungu hakawakomangi kwa kutenda muweri na malipu yagatumbuka na kutukuta ntambu yakawatenditi Wamisri. Hakatendi muweri na vironda na upeli na nshimba kuwawa, mwenga hapeni mponi nakamu. 28 Mtuwa Mlungu hakawakomangi kwa kuwatenda muweri na lukwali na hamuweri lwisi na mahala genu kupunganika. 29 Mwenga hamgendi kwa kupapasiya papasiya paluwala gambira lwisi, viraa hapeni mfanikiwi mumahengu genu. Hamzulumiwi kila mala na hapeni kuweri na muntu gwa kuwatanga.

30 Gwenga hagumuheti muhinga kumbiti muntu yumonga hakambati kwa makakala.

Hagunyawi numba, kumbiti hapeni gwingiri kulikala. Haguyali mizyabibu, kumbiti muntu gwingi hakabenangi. 31 Wangondu wenu hawawalikituli wang'ombi wenu mwenga pamuwalola, kumbiti hapeni mlawaliri ata shipandi shimu sha shinofu. Punda waku hawatoluwi kwa makakala kulawa kwa mwenga na hapeni wawawuziyi kwa mwenga. Wakondolu waku hawapananuwi wangondu waku pamuwawona na kwahera muntu yoseri ulii hakawalopoziyi. 32 Wana wenu wapalu na wadala hawalaviwi kwa wahenga kuwera wamanda, uganu mwenga pamulihola paluwala poseri kuwalolelera mewuyi, kumbiti hapeni muweri na makakala ga kutenda shoseri. 33 Wahenga wa isi yamuyimana ndiri halitoli viboga vyoseri mwenga mtenditi mahengu gakamala kulima,

womberi hawawazulumu na kuwatabisiya nentu. 34 Mwenga hampati lukwali kwa vitwatira vyamgenda kuviwona. 35 Mtuwa Mlungu hakagatendi manung'unu genu na magulu genu gaweri na malipu madoda, mwenga hapeni muwezi kupona,

malipu aga hagawaeneyi kwanjira kumtuwi mpaka kulwayu lwa magulu genu.

36 Mtuwa Mlungu hakawatendi mwenga pamuhera na mfalumi gwenu yamumsyaguliti, kugenda muisi yamuimana ndiri mwenga na wambuyi wenu hamwenikali.

Kulii mwenga hamuviguwiri vinyagu vyavinyawituwiti kwa mbawu ama mabuwi. 37 Muisi zilii Mtuwa Mlungu zyakawapalasiya, wantu woseri hawatiriziwi kwa virii vyavilawiriti kwa mwenga womberi pawawona, su womberi hawawazalawu na kuwazihaki.

38 Mwenga hamuyali mbeyu zivuwa, kumbiti hambenangi kidogu toziya wanjombi hawaliyi viboga vyenu. 39 Hamuyali mizyabibu na kuyilolera weri, kumbiti hapeni mwapi zyabibu azi ama kulanda divayi yakuwi, toziya wavingongolu hawaliyi. 40 Hamuweri na mizeyituni pahala poseri muisi yenu, kumbiti hapeni muweri na lipaki ya kulityeremeka, toziya zeyituni azi hazituluki pamberi pa kukamala. 41 Mwenga hamwiwuli wana wapalu na wadala, kumbiti hapeni walikali na mwenga, toziya wangondu wenu hawatolowi kwa makakala kugenda nawu. 42 Wanjombi hawaliyi viboga vyenu mumalambu pamuhera na mahamba ga mitera yenu yoseri ya mabwajubwaju.

43 Wahenga yawalikala muisi yenu hawongereki kuwera walunda nentu pamuhera na makakala nentu, kumbiti maweni mwenga hamuweri wahushu na kuwera legilegi. 44 Womberi hawawapanani uwanda mwenga, kumbiti mwenga hapeni muweri na uwezu wa kuwapanana uwanda.

Womberi hawaweri waherepa na mwenga hamuweri wadoda.

45 Mwenga pamlema kutenda shilii Mtuwa Mlungu gwenu shakawalagalira mwenga mtendi, viraa pamlema kujimira mashariti gakuyi na malagizu gakuyi yagawapananiti, goseri aga hagawapati mwenga na kwendeleya kulawira kwa mwenga mpaka mwenga pamwagamira. 46 Kumbiti aga goseri hagaweri ukapitawu ga utoza wa Mtuwa Mlungu kwa mwenga na wiwuka wenu mashaka goseri. 47 Mtuwa Mlungu gwenu kawatekeleriti mwenga mukila njira, kumbiti mwenga mumtenderiti ndiri kwa moyu guherepa na gwagunemelera. 48 Su hamuwatenderi wangondu wenu walii Mtuwa Mlungu yakawajega kuwakangala mwenga. Hamuweri na njala na kuyumuluwa na hapeni muweri na nguwu za kuvala na hapeni muweri na vintu. Viraa Mtuwa Mlungu hakawatendi mwenga mtabiki na mtendi mahengu gakamala mpaka mwenga pamwagamira nakamu. 49 Mtuwa Mlungu hakalijegi shonta kulawa kutali liwakomangi, wanjagira hawatakuli visoweru virii mwenga hapeni muvimani. Womberi hawawakangali mwenga gambira kapungu ntambu yakatenda. 50 Wantu walii hawaweri na sheni shashitiriziya. Womberi hapeni waweri na lusungu kwa wazewi ama wantemba na wahinga. 51 Womberi hawawalagi wang'ombi wenu na kuliya vinofu vyakuwi, viraa hawaliyi viboga vyenu na mwenga hamuhowi toziya hapeni muweri na shintu sha kuliya. Su hapeni wawalekeri viboga ama divayi ama lipaki lya mizyetuni ama mifugu yenu, mwenga hamuhowi kulawirana na njala. 52 Wangondu wenu hawaizyengeti mumiji yenu yoseri namlawa muisi ilii Mtuwa Mlungu gwenu yakagenda kuwapanana. Womberi hawabomolangi vibambaza virii mwenga muliholiti vyankuwalolera weri.

53 Wangondu wenu pawaizyengeta miji yenu, mwenga hamuweri na njala nentu na malawiranu gakuyi hamuwalagi na kuliya vinofu wana wenu walii Mtuwa Mlungu yakawapananiti. 54 Ata muntu mpoli na yakaleleruwiti weri, hakamwimi mlongu gwakuwi ama mdala gwakuwi yakamfira ama mwana gwakuwi yakasigala, vinofu virii. 55 Viraa hapeni kambaguliri ata yumu gwawu shinofu sha wana wakuwi yakagenda kuwaliya. Hapeni msigali na shintu shoseri shaka ashi wangondu wenu pawawazyengeta na kuwatabisiya mumiji yenu yoseri. 56 Ata mdala ulii yakawera mkulu, na yakaleleruwa weri na mlunda, yomberi hakatendi ntambu iraa ilii. 57 Wangondu pawaizyengeta miji yenu yoseri, mdala ulii hakaweri na njala nentu, kwa bada hakamliyi mwana mdidi yakamuyuwula, hakaliyi viraa kondo lilii lyalilawa pa kwiyula mwana. Kayi hakaliyi na kumuyima ata mpalu gwakuwi yakamfira nentu, viraa hakawayimi ata wana wakuwi.

58 Handa pamuhera ndiri waminika kugajimira malagaliru goseri galii ganugalemba mushintora ashi, viraa pamgaholera ndiri litawu lya kulikangasha lya Mtuwa Mlungu gwenu, 59 su Mtuwa Mlungu hakawazibu mwenga kwa kuwajegera mwenga pamuhera na viyiwuku vyenu ntabiku nkulu na makomangu makulu ga malweli yagapona ndiri. 60 Hakawajegeri malweri galii yamgatiriti pamuweriti muisi Misri na hapeni mponi. 61 Mtuwa Mlungu hakajegeri malweri ga kila ntambu na makomangu gamonga galii gakanduwa ndiri mushintora ashi sha malagaliru mpaka mwenga pamlaguwa. 62 Tembera mwenga muwera wavuwa gambira ntondu za kulyera, kumbiti hamuweri wadidini hera toziya mumjimira ndiri Mtuwa Mlungu gwenu. 63 Mtuwa Mlungu ntambu yakaherepeziwiti kuwatendera vintu viherepa na kuwatenda muweri wavuwa, ntambu iraa ayi hakaherepeziwi kuwajegera ntabiku na kuwagamiziya. Mwenga hamuwusiwi muisi yamgenda kuitola kwa makakala. 64 Mtuwa Mlungu hakawapalasiyi muisi zoseri, kulawa wega umu gwa pasipanu mpaka uwega umonga, aku mwenga hamuitenderi milungu ilii yainyawituwiti kwa mbawu ama mabuwi, milungu ilii mwenga pamuhera na wambuyi wetu hawenimani. 65 Hapeni muweri na ponga pahala poseri palii pa kwoyera. Mtuwa Mlungu hakawatendi myoyu yenu iweri na lyoga, hapeni muwezi kuwona weri na hamshashatiki mumoyu. 66 Mashaka goseri mwenga hamuweri na lyoga kuwera wangondu wenu hawawalagi. Hamuweri na lyoga paluwala na pashiru. 67 Myoyu yenu hayiweri na lyoga. Mandawira mwenga hamlongi, mbaka meyiweri pamihi, paluwala papasoka mwenga hamlongi, mbaka meyiweri mandawira. 68 Mtuwa Mlungu hakawawuziyi mwenga ku Misri kwa mtumbwi mkulu, mwanja gweni kalagiliti kuwera hapeni mgendi kayi. Aku Misri hamjeri kulishuwuza maweni kwa wangondu wenu su muweri wamanda, kumbiti kwahera muntu hakawahemeri.