1 Toziya ya goseri galii Mtuwa Mlungu gakagatenditi kwa mwenga, su mumfiri na mwendereyi kugajimira mashariti gakuyi na malagizu gakuyi na malagaliru gakuyi goseri. 2 Muliholi leru kuusu wana wenu wavimaniti ndiri ama kuwona azabu za Mtuwa Mlungu na uwezu wakuwi na makakala gakuyi, 3 malangaliru gakuyi na makangashu gakuyi gakagatenditi kulii Misri kwa mfalumi Farao na isi yakuwi yoseri. 4 Viraa shilii shakashitenditi kwa shonta sha Misri, pamuhera na farasi wawu na mbutuka zyazikwegwa na farasi, ntambu yakalimirizuwiti shonta ali mubahari ya Shamu pawaweriti wankuwafata, ntambu Mtuwa Mlungu lyakalyagamiziyiti nakamu mpaka leru. 5 Muliholi Mtuwa Mlungu pakawaloriti weri kushiwala pamberi pa kusoka panu. 6 Viraa muliholi vitwatira vyakawatendiriti Datani na Abiramu wana wa Eliyabu gwa likabila lya Rubeni. Kulongolu kwa kila muntu, pasipanu papavugukiti pahala pawaweriti womberi na kuwamira pamuhera na kaya zawu na malingu gawu na wankanyama wawu na kila shintu shashiwera shawu. 7 Kumbiti mwenga nakaka masu genu gawoniti vitwatira vyoseri avi vikulu Mtuwa Mlungu vyakavitenditi.

8 Mwenga mulilori weri kugajimila malagaliru ganuwapanana leru, su mwenga hamuweri na makakala ga kugenda kuitola kwa makakala isi ilii mwenga yamloka Yoridani kugenda kulikala, 9 su mwenga mpati kulikala kwa shaka shivuwa muisi ilii Mtuwa Mlungu kalirapiriti kwa wambuyi wetu kuwapanana pamuhera na shiyuwuku shawu, isi ilii yaiwera na mbotu kwa kulima na iherepa kwa kuliziya mifugu. 10 Isi yamgenda kuhala ilifana ndiri na isi ya Misri kwamlawiti, kulii mtenditi mahengu gakamala ga kuyala viboga na kuyitilira mashi kwa magulu. 11 Kumbiti isi yamgenda kuhala ndo isi ya vigongu na lularanda, isi yaipata mvula ivuwa. 12 Mtuwa Mlungu gwenu kailolera weri isi ilii, kailolera mushaka shoseri mukila shinja.

13 Su mwenga handa pamgajimira malagaliru ganuwapanana leru, pamumfira Mtuwa Mlungu gwenu na kumtendera kwa myoyu yenu yoseri na kwa rohu zyenu zoseri, 14 pamtenda hangu, Mtuwa Mlungu hakaitoweri mvula isi yenu mushaka shakuwi, mvula za masika na vuli, mwenga hambenangi viboga vyenu na divayi lya syayi pamuhera na lipaki lya mizyetuni. 15 Neni hameriziwu manyasi mumalambu kwajili ya kuliziya mifugu yenu na maweni mwenga hamuweri na kila shintu shamfira kuliya. 16 Mulilori weri, myoyu ya mwenga naipotuziwa na kugalambuka na kuwaguwira wamilungu wamonga. 17 Mwenga pamtenda hangu, Mtuwa Mlungu hakawakalalili nentu na hakaleki kuwatowera mvula na isi haileki kumeriziya vimeru vyakuwi, shakapanu hamwagamiri kalongola kulawa muisi iherepa Mtuwa Mlungu yakawapanana.

18 Muvituli visoweru vyaneni avi mumyoyu mwenu na murohu zyenu. Muvilembi mulukuli na kuvitawa mumawoku mwenu kuwera shimaniziru na kuvala muviwunju vya sheni zyenu. 19 Muwafundi wana wenu visoweru avi pamulikala mnumba zyenu na pamtyanga na pamgenda kugonja na pamwimuka. 20 Mugalembi muvizingiti vya magomi ga numba zyenu na mumagomi makulu ga miji yenu, 21 su mashaka goseri kulyera pakusigala pampindi pa pasipanu, mwenga pamuhera na wana wenu hamulikali makalilu gatangara muisi ilii Mtuwa Mlungu gwenu yakawalagiliti kuwapanana wambuyi wetu.

22 Muliloli weri kugajimira malagaliru goseri aga ganiwapananiti, mumfiri Mtuwa Mlungu gwenu na kuzigendera njira zyakuwi zoseri na kuwera waminika kwakuwi, 23 su Mtuwa Mlungu hakawawingi wantu wa isi zoseri kulongolu kwa mwenga, mwenga hamuihali isi zilii zyaziwera nkulu na zyaziwera na makakala kuliku mwenga. 24 Kila pahala muisi ilii pampatimbanga hapaweri pa mwenga. Isi yenu haiyeneyi kulawa kushiwala uwega wa kusika mpaka lugongu lwa Lebanoni uwega wa kushana, kulawa lushemba Eufrati uwega wa kwagulawa mshenji mpaka ku Bahari ya Meditereniya uwega wa kwaguzyeta mshenji. 25 Mtuwa Mlungu gwenu hakawatendi wantu woseri muisi ilii kuwatira mwenga ntambu yakalagiliti, malawiranu gakuyi kwahera shipinga sha wantu shashiweza kuwapingira mwenga.

26 Mloli, leru nankuwapanana usyagula kulongolu kwenu, matekeleru ama mpangilu. 27 Handa pamugajimira malagaliru ga Mtuwa Mlungu ganuwapanana leru, su hakawatekeleri. 28 Handa pamugajimira ndiri na kugalambuka kuwaguwira wamilungu wamonga, wamilungu walii yamuwamaniti ndiri kwanja, su hakawapangili. 29 Na Mtuwa Mlungu pakawajega kwingira muisi yamugenda kuhala, wamu wenu hawagoloki palugongu lwa Gerizimu kubwera shilii shashitenda Mtuwa Mlungu kawatekeleri na wamonga hawagoloki palugongu lwa Ebali kubwera shilii shashitenditi Mtuwa Mlungu kawapangili. 30 Migongu ayi miwili iwera uwega kwaguzyeta mshenji mwa lushemba Yoridani muisi ya Kanaani yawalikala mulilaranda lya Yoridani pakwegera na mji gwa Giligali, kutali ndiri kulawa mumitera ya Morehi. 31 Mwenga hamuloki lushemba Yoridani mwingiri kuihala isi ilii Mtuwa Mlungu gwenu kankuwapanana. Su pamwingira muisi ilii na kulikala, 32 mulilori weri mtendi mashariti na malagizu ganuwapanana leru.