1 Aga ndo mashariti na malagizu galii gamfiruwa kuwera waminika kugajimira muisi ilii Mtuwa Mlungu, Mlungu gwa wambuyi wetu kawapanana mwenga muihali mashaka goseri ga makaliru genu muisi ilii. 2 Mwenga mwagamiziyi nakamu pahala poseri vipinga vya wantu yamuwawinga waguwiriti wamilungu wawu, pamigongu na pavigongu na pasi pa mitera miwisi. 3 Muvipanti vitalawanda vyawu vya kutambikira na kuzibomolanga nakamu mpanda zawu za mabuwi. Muvyagamiziyi nakamu mumotu vinyagu vya mlungu Ashera na muvidumuli vinyagu vyawu vya kusonguluwa na mugawusiyi nakamu matawu gawu.

4 Namumguwira Mtuwa Mlungu gwenu gambira wantu wa Kanaani ntambu yawawaguwiriti wamilungu wawu. 5 Kumbiti mwenga mfiruwa kugenda pahala palii Mtuwa Mlungu hakapasyaguli. Mumakabila genu goseri hakatuli litawu lyakuyi na makawu gakuyi panu, aku ndo hamgendi kumguwira. 6 Kulii mwenga hamjegi tambiku zyenu za kulunguziwa nakamu na malaviwu na zaka za malaviwu genu na malaviwu genu gambira gamonga na wapanta njira wa wang'ombi wenu na wakondolu na wambuzi wenu. 7 Kulii kulongolu kwa Mtuwa Mlungu gwenu, mwenga pamuhera na kaya zyenu hamuliyi vintu viherepa vyamuvipata kwa kutenda mahengu, su hamunemeleri.

8 Shaka shilii shashizaku, namtenda ntambu yatutenda vinu. Mpaka vinu mwenga mwankuguwira ntambu yamfira maweni. 9 Toziya mwenga hamweniyingiri muisi ilii Mtuwa Mlungu gwenu yakawapanana, kulii mwenga hamuwezi kulikala kwa ponga. 10 Kumbiti pamloka lushemba lwa Yoridani na kulikala muisi ilii Mtuwa Mlungu gwenu yakagenda kuwapanana muhali, hakawapanani mwoyeri namgaziwa na wangondu wenu woseri yawawazyengeta, su mwenga hamulikali kwa ponga. 11 Mtuwa Mlungu hakapasyaguli pahala pakafira twenga tumguwiri. Pahala palii mwenga hamjegi malaviwu goseri galii ganuwalagalira mwenga kugajega, tambiku zyenu za kulunguziya nakamu na malaviwu genu na zaka zyenu za malaviwu na malaviwu genu ga usali zyamulilapira kumlavilira Mtuwa Mlungu. 12 Kulii mwenga hamunemeleri kulongolu kwakuwi Mtuwa Mlungu gwenu, mwenga pamuhera na wana wenu wapalu na wadala, wantumintumi wenu wapalu na wadala, wantu wa Lawi yawalikala mumiji yenu toziya womberi wahera isi yawu weni ntambu yamuwera mwenga. 13 Mulilori weri namlaviya tambiku zyenu za kulunguziwa nakamu pahala poseri pamfira. 14 Kumbiti mwenga mulaviyi tambiku pahala Mtuwa Mlungu pakawasyaguliriti muisi yakagenda kuwapanana. Kulii mwenga mfiruwa mulaviyi tambiku zyenu za kulunguziwa nakamu na kutenda kila shintu ntambu yanuwalagaliriti.

15 Kumbiti mwenga muwera na ulekeru wa kulikitula wankanyama wenu na kuliya vinofu vyawu mumiji yenu. Ntambu yamfira, mwenga muweza kuliya vinofu vya nkanyama walii Mtuwa Mlungu gwenu yakawatekeleriti na kuwapanana mwenga. Wantu woseri yawajimiluwa kulongolu kwa Mlungu ama walii yawajimiruwa ndiri kulongolu kwa Mlungu su waweza kuliya vinofu avi, vinofu vya nkanyama yawamshema paa ama shinjapuli. 16 Namuliya mwazi, muyitiri pasi mwazi agu gambira mashi. 17 Pahala pamulikala, mwenga namuliya vintu virii vyamumlavilira Mtuwa Mlungu. Namuliya zaka za viboga ama zaka ya divayi ama zaka ya lipaki lya mizyetuni ama zaka ya shipanta njira sha ng'ombi ama wakondolu na wambuzi ama tambiku za usali ama tambiku zyenu gambira tambiku zyamonga ama malaviwu gamonga galii. 18 Mwenga hamuviliyi vintu avi kulongolu kwa Mtuwa Mlungu gwenu pahala pakagenda kupasyagula. Hamuviliyi mwenga pamuhera na wana wenu wapalu na wadala, pamuhera na wantumintumi wenu wapalu na wadala na wantu wa Lawi yawalikala mumiji yenu. 19 Mulilori weri namuwalyaluwa wantu wa Lawi shaka shoseri shamulikala muisi yenu.

20 Mtuwa Mlungu gwenu pakayongera isi kuliku yamuweriti nayu kwanja ntambu yakalagiliti, mwenga hamlongi kuwera mfira kuliya vinofu, su muweza kuliya vinofu shyasi shoseri shamfira. 21 Handa pahala pa kuguwira papasyagulituwiti na Mtuwa Mlungu gwenu pawera patali nentu kulawa ukaya kwenu, mwenga mlekeziwa kulikitula ng'ombi ama kondolu ama mbuzi yoseri ulii Mtuwa Mlungu gwenu kawapanana, mwenga muweza kuliya vinofu vyakuwi pahala pamulikala ntambu yakawalagaliriti. 22 Hamuviliyi vinofu avi ntambu yawamliya nkanyama yawamshema paa ama nkanyama shinjapuli. Muntu yakajimiluwa ama muntu yakajimiluwa ndiri kumguwira Mlungu, su kaweza kuliya. 23 Kumbiti namuliya mwazi toziya mwazi ndo ukomu, su namuliya ukomu pamuhera na vinofu. 24 Namuliya mwazi agu kumbiti muguyitiri pasi gambira mashi. 25 Pamliya ndiri mwazi, kila shintu hashifanikiwi kwa mwenga na kwa shiyuwuku shenu. Toziya hamtendi yagamfiriziya Mtuwa Mlungu. 26 Vintu vinanagala pamlaviya na tambiku zyenu za usali, hamuvitoli kuvijega pahala Mtuwa Mlungu pakagenda kupasyagula. 27 Mwenga mfiruwa kulaviya palii tambiku ya kulunguziwa nakamu, vinofu pamuhera na mwazi pashitalawanda sha kutambikira sha Mtuwa Mlungu gwenu, mwazi hamuguyimishiri pashitalawanda shakuwi Mtuwa Mlungu gwenu, kumbiti mlekeziwa kuliya vinofu. 28 Mugajimiri kwa uwaminika kila shintu shanuwalagaliriti. Handa pamutenda aga, kila shintu hashiherepi kwa mwenga pamuhera na walera wenu mashaka goseri, toziya mtenda shilii shiheri na galii gagaherepa na yagawera teratera kulongolu kwa Mtuwa Mlungu gwenu.

29 Mwenga pamwingira muisi ilii yamgenda kuhala, Mtuwa Mlungu gwenu hakawagamiziyi wantu wa isi yamgenda kuitola kwa makakala na kuikolamlima. 30 Mtuwa Mlungu pakavyagamiziya kala, mwenga mulikali weri namuguwila milungu walii womberi waguwiriti, ntambu ayi hayiweri gambira mgomeziwu gwa kuwagomiziya. Namkosiya ntambu yawaguwira milungu yawu, su mwenga mguwiri kwa ntambu iraa ilii. 31 Namjera kumguwira Mtuwa Mlungu gwenu gambira wantu wa Kanaani ntambu yawawaguwira wamilungu wawu, womberi watenda kila ntambu ya vintu vyavifaa ndiri kwa Mtuwa Mlungu. Walaviya tambiku kwa kuwalunguziya wana wawu pakutambikira pawu.

32 Muliloli weri, mtendi kila shintu shanuwalagaliriti kushitenda. Namwongera shintu shoseri ama kupungula shintu shoseri.