1 Pagumuwona ng'ombi ama kondolu gwa Mwisraeli muyagu kagamira, nagumleka kagamiri, kumbiti gumwuziyi kwa mlongu gwaku. 2 Kumbiti handa ukaya kwa mlongu gwaku ayu yakawera na mifugu ayi pawera patali ama gumumana ndiri yakawera na mifugu ayi, su gwenga hagumtoli nkanyama ayu kugenda nayu ukaya kwaku, kalikali kwaku mpaka mweni pakiza kumsakula, gwenga hagumuwuziyi kwakuwi. 3 Hagutendi ntambu ilaa ayi kuusu punda ama nguwu ama shintu shoseri shilii mlongu gwaku Mwisraeli pakashyagamiziya. Nakamu naguleka kumtanga.

4 Paguwona punda ama ng'ombi gwa mlongu gwaku Mwisraeli kaguwa munjira, naguleka kumtanga mlongu gwaku ayu, gwenga hagumtangi kumgolusiya.

5 Wadala nawavala nguwu za wapalu, viraa virii wapalu nawavala nguwu za wadala. Mtuwa Mlungu hakamkalaliri muntu yakatenda vitwatira vya ntambu ayi.

6 Paguwona shitukulu sha mpongu pamtera ama munjira, shiwera na wana wa mpongu ama maligi na mpongu tembi kawagubikira wana wakuwi ama maligi gakuyi, nagumtola mpongu ulii pamuhera na wana wakuwi. 7 Haguleki mpongu tembi ulii kagendi zakuwi, kumbiti guweza kutola wana wa mpongu. Pagutenda hangu haguweri na makaliru matali.

8 Pagunyawa numba yaku, gunyawi ukingu mumbwega mwa shitwiku, gwenga hapeni guweri na lawama muntu pakapatuka kulawa aku na kuhowa.

9 Naguyala vimeru vyamonga pahala paguyaliti mizyabibu, paguyala vimeru vyamonga, gwenga hapeni gulekeziwi na Mlungu kubena mabenu kulawa muvimeru vyaguyaliti ama kubena mabwajubwaju kukama divayi.

10 Nagulima lirambu kwa kuwatawa ng'ombi na punda pamuhera.

11 Naguvala nguwu yainyawituwiti kwa mibayila ya kondolu yaipotutiwiti na shitambala shiherepa shifufu.

12 Gutawi vifundu vya mishirashira mupembi zamsheshi za nguwu zaku.

13 Mpalu pakayuga mdala, shakapanu pakafira kumleka, 14 pakayowera vitwatira vya upayira, kuwera mdala ulii kaweriti ndiri luyenja pakamuyugiti,

15 Su walera wa mdala ulii hawatoli lishuka lyawayaliti mulisaga pawagonjiti shaka sha ndowa na kugenda nalu kwa wazewi palugomi likulu lwa mji, 16 na kuwagambira, tumyugiziyiti muhinga gwenu kwa muntu ayu, kumbiti vinu kamfira ndiri kayi. 17 Yomberi katakuliti masitaka ga upayira kuusu muhinga gwenu pakalonga yomberi kaweriti ndiri luyenja pakamuyugiti. Kumbiti guloli! Avi ndo virii vyankulanguziya kuwera muhinga gwangu kaweriti luyenja! Guloli matoni ga mwazi mulishuka lyawatandiziyiti pawagonjiti pashiru lishaka pawamuyugiti! 18 Shakapanu wazewi walii wa mji, hawamtoli mpalu ulii na kumsyatanga ntomondu. 19 Viraa hawamtozi muntu ayu fayini ya vipandi miya vya feza na kumpanana tati gwa mdala ulii toziya mpalu ulii kamsoniziya muhinga gwa Israeli. Na mdala ulii hakendereyi kuwera mdala gwakuwi na hapeni kamleki mumakaliru gakuyi goseri.

20 Kumbiti masitaka aga pagawera ga nakaka, mdala ulii kaweriti ndiri luyenja, 21 womberi hawamjegi kuligomi lwa tati gwakuwi. Shakapanu wapalu wa mji gulii hawamgumangi mabuwi mdala ulii mpaka kahowi, toziya katenditi shintu sha kusoniziya mu Israeli kwa kutenda undiyandiya. Kwa kutenda hangu hamumalili ukondola pakati penu.

22 Mpalu pawambata ugoni na mda gwa muntu, woseri wawili mpalu na mdala walaguwi. Kwa kutenda ntambu ayi mwenga hamumalili ukondola pakati penu. 23 Mpalu pakamwona muhinga yawamuhetiti, su pakagonja nayu, 24 woseri wawili hamuwalaviyi kunja kwa mji na kuwagumanga mabuwi mpaka wahowi. Muhinga ulii mpaka kalaguwi toziya katenditi ndiri umatu su katanguwi tembera kaweriti mjini. Mpalu ulii mpaka kalaguwi toziya kamsoniziya muheta gwa wapakwegera gwakuwi. Kwa kutenda hangu mwenga hamumalili ukondola pakati penu.

25 Kumbiti mpalu pakaliwona na muhinga yawamuhetiti kwa kumbata kwa makakala, su mpalu gweka yakuwi hera hakalagwi. 26 Namumwazibu muhinga ayu, toziya katenditi ndiri shintu shoseri shashimtenda kaweri na ukondola yaumtenda kalaguwi. Shitwatira ashi shilifana na mtu yakamkangaliti muntu yumonga na kumlaga, 27 toziya mpalu ayu kambatiti kwa makakala muhinga ayu kuntundu aku, tembera kabotangiti kuluwa utanga na paweriti ndiri na muntu gwa kumtanga.

28 Mpalu pakambata kwa makakala muhinga yakawera luyenja hakenihetuwiti, muntu yoseri pakamwona pakatenda hangu, 29 muntu ulii hakampanani tati gwa muhinga ulii vipandi malongu muhanu ga madini ga feza, viraa hakamuyugi muhinga ulii yakambatiti kwa makakala. Yomberi hapeni kamleki makalilu gakuyi goseri.

30 Mpalu yoseri nakagonja na wadala wa tati gwakuwi.