1 ए भाय-बेन्‌या मे तमने तीहयी खुस-खबर ह़मळावु, जे तमने मे पेले ह़मळाव देदलो से, अने तमु आहयी खुस-खबर ने हुकारीन मान लेदला से, अने जीनी मे तमु टेकला बी से। 2 आहयी खुस-खबर नी लारे तमारो छुटकारो हये, कदीम तमु तीहयी खुस-खबर ने फोम राखहु जे मे तमने ह़मळावलो, तात तमारो छुटकारो हयहे; नीता तमारो भरहो अमथो से।

3 एतरे मे आखा नी पेले तमने तीहयी खुस-खबर पुगाड़ देदो, जे मारीन्‌तां पुगली हती, के खरला सास्‌तर ना बोलु नी अनसारे ईसु मसी आपणा पाप नो डंड भुकत्‌वा करीन मर ज्‌यो। 4 ✝तीने गाड़ बी देदा; अने खरला सास्‌तर नी अनसारे तीसरा दाड़े जीवतो बी हय ज्‌यो। 5 ✝अने अळतेण तीहयो पतरस ने देखाव पड़्‌यो अळतेण बारे चेला ने बी देखाव पड़्‌यो। 6 अने अळतेण पांच ह़ोव गेथा जादा ईसु पोर भरहो करन्‌या भाय-बेन्‌या ने देखाव पड़्‌यो, जीनी मे ढेरेत जणा हमणे बी जीवत्‌ला से, पण ढेरेत जणा मर ज्‌या। 7 अळतेण तीहयो याकुब ने देखाव पड़्‌यो, अने अळतेण आखा ईसु ना नेवताळा ने देखाव पड़्‌यो।

8 ✝अने आखा नी छेली कावा मने बी देखाव पड़्‌यो, मे ते केदो मे तीहया सोरान तेम से जे आदरीतु पक्‌कु नी हयु अने पेलेत पयदा हय ज्‌यु हय। 9 ✝काहाके मे ईसु ना नेवताळा माय्‌न आखा नी करते नानो नेवताळो से। एक कीया मे ईसु नो नेवताळो केय एवो बी नी हय, काहाके मे भगवान नी मंडळी ने वेला पाड़लो हतो। 10 पण आज मे जे बी बण र्‌यो तीहयु भगवान नी दया नी लारेत बणलो से। तीनी दया वाञेबार नी बगड़ी। मे तीहया ईसु ना नेवताळा नी करते जादा काठी मेहनत करलो से: ते बी आहयी काठी मेहनत मे मारी ज्‌योरे नी कर्‌यो, पण भगवान नी तीहयी दया सीत करलो से। जे दया मारी पोर देखाड़लो से। 11 भले तीहया ईसु ना नेवताळा हय, आमु आखा ईसु नी खुस-खबर ने परच्‌यार करला से अने तमु आहयीत ईसु नी खुस-खबर पोर भरहो करला से।

12 ईसु मसी ना बारा मे आहयु परच्‌यार हय र्‌यु, के तीहयो मर्‌या-ह़र्‌या मे गेथो जीवतो हय्‌न बठो हय ज्‌यो, ता तमारी मे गेथा ढेरेत जणा आसम काहा केय के मर्‌या-ह़र्‌या मे गेथा माणहु जीवता हय्‌न बठा नी हये। 13 कदीम मर्‌या-ह़र्‌या मे गेथु जीवतु हय्‌न बठु हयणु नी हय, ता ते ईसु मसी बी मर्‌या-ह़र्‌या मे गेथो जीवतो हय्‌न बठो नी हयो। 14 अने कदीम ईसु मसी मर्‌या-ह़र्‌या मे गेथो जीवतो हय्‌न बठो नी हयो ता ते अमारु परच्‌यार करनु बी अमथु से; अने तमारो ईसु पोर भरहो करनु बी अमथु से। 15 एतरुत नी पण आमु ते भगवान ना झुटा गवा केवायहु; काहाके आमु ते भगवान ना बारा मे आहयी गवाय देदला से के भगवान ईसु मसी ने मर्‌या-ह़र्‌या मे गेथो जीवतो करीन तीने बठो कर देदलो से। कदीम ईसु मर्‌या-ह़र्‌या मे गेथो जीवतो हय्‌न बठो नी हयतो ता मरला माणहु बी मर्‌या-ह़र्‌या मे गेथा जीवता हय्‌न बठा नी हयता। 16 अने कदीम मरलात बठा हय्‌न जीवता नी हये, ता ईसु मसी बी जीवतो नी हयो जाणजो। 17 अने कदीम भगवान ईसु मसी ने मर्‌या-ह़र्‌या मे गेथो जीवतो करीन बठो नी कर्‌यो, ता तमारु ईसु पोर भरहो करवा अमथु से; अने तमु हजु लग पाप मे पड़ला से। 18 जे ईसु मसी पोर भरहो करता जाय्‌न मर ज्‌या, तीहया बी मरीन खत्‌तम हय ज्‌या। 19 कदीम आपणु आहयी कळी पोर वाळी आहयी जीवाय मे ईसु मसी पोर आह कर र्‌या, ता आपणु आहयी कळी मे आखा गेथा बाफड़ा माणहु से।

20 पण ईसु मसी ते ह़ाचलीनेत मर्‌या-ह़र्‌या मे गेथो जीवतो हय्‌न बठो हय जेलो से। अने जे मर जेला तीहया माणहु मे आखान पेले मर्‌या-ह़र्‌या मे गेथो जीवतो हयलो से। 21 काहाके एक माणेह नी लारे मोत आवी; ता एक माणेह नी लारे मर्‌या-ह़र्‌या मे गेथु जीवतु हय्‌न बठु हयवा नु बी हयु। 22 जीसम आदम नी लेदे आखा मर ज्‌या, तेमेत ईसु मसी नी लेदे आखा मर्‌या-ह़र्‌या मे गेथा जीवता हय्‌न बठा हय जहे। 23 पण आखा वार्‌ये-वार्‌ये मर्‌या-ह़र्‌या मे गेथा जीवता हय्‌न बठा हयहे। आखान पेले मसी, अळतेण मसी ह़रगे गेथो पासो आवहे ता तीनी पोर भरहो करन्‌या माणहु मर्‌या-ह़र्‌या मे गेथा बठा हय जहे। 24 अळतेण कळ खत्‌तम हयवा नी आखरी टेम आय लागहे; तीहयी टेमे मसी आखा राज करन्‌या ने, हक राखण्‌या ने, अने आखा भाती ना जोर ने खत्‌तम कर देहे। अने आखु राज-पाट भगवान बाह ने ह़ोप देहे। 25 पण जत्‌यार लग मसी आह़फा ना वेरी ने आह़फा ना पोगु तळे नी ली आवे तां लग तीने राज करवा जरुड़ी से। 26 जे वेरी ने आखा नी सेल्‌ली कावा खत्‌तम कर देहे, तीहयो वेरी मोत से। 27 काहाके चोखली सास्‌तर केय के भगवान आखु कंय मसी ना पोगु तळे कर देदलो से, पण आनु मतलब से के जे मसी ना पोगु तळे आखु कंय कर देदलो से तीहयो भगवान एतरोत मसी ना पोगु तळे नी हयो। 28 जत्‌यार आखु कंय सोरा ना हात मे हय जहे, ता सोरो आह़फोत बाह ना हक मे हय जहे, तीहयो बाह आखु कंय तीना हक मे कर देदलो से। आहयु ईसम करीन हय्‌हे काहाके भगवानेत आखु कंय से।

29 ता जे माणहु मरला माणहु जुगु बपतीस्‌मा लेय, ता तीहया ह़ु करहे? कदीम मर्‌या-ह़र्‌या मे गेथु जीवतो हय्‌न बठु हयवा नु नी हय, ता मरला माणहु जुगु जीवत्‌ला माणहु ने बपतीस्‌मा ह़ुका आपे? 30 कदीम मर्‌या-ह़र्‌या मे गेथु पासु जीवतो हय्‌न बठु हयवा नी हय, ता आमु दाड़ीन वेला ह़ुका कर र्‌या? 31 ए भायु, अने बेन्‌या मे मालीक ईसु मसी मे मोटाय करीन केम के मे दाड़ीन वेला करीन मर र्‌यो। 32 कदीम मर्‌या-ह़र्‌या मे गेथो पासो जीवतो हयवा नु नी रेतु, ता मे ईफीसुस ह़ेर मे माणहुन तेम जंगली जानवरु ह़ाते लड़ाय कर्‌यो ता मारो ह़ु फायदो हयो? कदीम मर्‌या-ह़र्‌या ने भगवान जीवतो करीन पासो बठो नी करे ता ह़ु फायदो "आवो, आपणु खाया-पीया काहाके वाणे ते आपणु ने मरवात से।"

33 धोको ना खावो, "गलत संगती वारला माणहु ने बगाड़ देय।" 34 वारला वीच्‌यार करो, अने पाप करवा सोड़ देवो; काहाके ढेरेत जणा ईसम से जे भगवान ने नी जाणे, आहयी वात मे तमने लाजे पाड़वा करीन की र्‌यो।

35 तमारी माय्‌न कोय केहे, "मरला कीकम मर्‌या-ह़र्‌या मे गेथा जीवता हय्‌न पासा बठा हयहे? तीमनी पांह केवु डील रेहे?" 36 ए वण-अकल्‌या जरीक वीच्‌यार कर! जे कंय तु वेरे तीहयु जत्‌यार लग नी मरे, तत्‌यार लग तीहयु जीवतु हय्‌न नी उगे। 37 अने जे कंय तु वेरे, तीहयु पासु पयदा हयवा वाळु डील नी हय, पण बीज एतरुत से, भले तीहयु गम नो बीज हय, भले काना बी अन नो बीज हय। 38 पण भगवान आह़फा नी मरजी नी अनसारे तीहया अन ने तीनु डील आपे; अने एक-एक बीज ने अलग-अलग बीज आपे।

39 आखा डील एक ह़ारका नी रेय। माणहु नु डील बीजा भात्‌यु रेय, जानवरु नु डील बीजा भात्‌यु रेय; चड़ा नु डील बीजा भात्‌यु रेय, माछला नु डील बीजा भात्‌यु रेय।

40 जेम धरती पोर वाळु डील से, तेमेत ह़रग मे वाळु बी डील से: पण धरती पोर वाळा डील नो ह़ेक बीजा से अने ह़रग मे वाळा डील नो ह़ेक बीजा भात्‌यो से। 41 दाहड़ु नो ह़ेक बीजा भात्‌यो से, अने चांद नो ह़ेक बीजा भात्‌यो से, अने तारा नो ह़ेक बीजा भात्‌यो से। अने एक-एक तारा नो ह़ेक बीजा-बीजा भात्‌यो से।

42 मर्‌या-ह़र्‌या मे गेथु पासु जीवतु हयवा नु आसमेत से। मरला माणहु नु जे धोड़ धरती मे बीज ने तेम गाड़ देय। तीहयु डील बगड़वा वाळु से। पण जे डील मर्‌या-ह़र्‌या मे गेथु पाछु जीवतु हयहे, तीहयु जलमकु से कदी नी खुटे। 43 मरला माणहु नु धोड़ धरती मे बीज ने तेम गाड़ देय, ता तीनी ईज्‌जत नी हये, पण जत्‌यार तीहयु मर्‌या-ह़र्‌या मे गेथु पाछु जीवतु हयहे, ता जोरभर्‌यु रेहे। 44 माणहु ना तीहया मरला धोड़ ने धरती मे बीज नी तेम वाळीन वळावे, तीहयु धोड़ धरती पोर वाळु से, पण तीहयो आत्‌मा नी ताखत भेळ पासु जीवतु हय जाय: ईसम करीन देखे ता बे भाती नु डील से, पेलो धरती पोर वाळु डील से, अने बीजु ह़रग मे वाळी आत्‌मा नु डील से। 45 खरला सास्‌तर मे ईसम लीखलु बी से: "पेलो माणेह आदम एक जीवत्‌ला जीव माणेह से।" पण बीजो आदम ते एक जीवाय आपण्‌यो आत्‌मा से। 46 पेले आत्‌मा नी आयी, पण धरती पोर वाळा डील नो सीको आयो, अळतेण आत्‌मा आयी। 47 पेलो माणेह आदम धरती ना कादा नो बण्‌लो हतो, अने बीजो माणेह ह़रग नो से। 48 जीसम आदम धरती ना कादा नो बण्‌लो हतो, तेमेत आपणु बी धरती ना कादा ना बण्‌ला से। अने जीसम ईसु ह़रग नो से, तेमेत जे ईसु पोर भरहो करे तीहया ह़रग ना रेहे। 49 जीसम आपणु धरती ना कादा ना बण्‌ला नु डील पेरला से, तेमेत ह़रग वाळु डील ने बी पेरहु।

50 ए भायु, अने बेन्‌या मे तमने आहयु केम के माह अने लोय ना माणहु भगवान ना राज ना हकदार्‌या नी हय सके।

51 ✝ह़मळो, मे तमने एक ह़तायली वात देखाड़ु: आपणु आखा ईसु आवहे तीहयी टेमे मरजे नी पण आपणु आखा नो सीको बदली जहे। 52 अने जरीक वार मे, पापण्‌या पटकारता वार मे, छेलु फेपार्‌यु वागतेत आपणो सीको बदली जहे। काहाके फेपार्‌यु वगाड़हे, अने मर्‌या-ह़र्‌या माणहु, खत्‌तम नी हये एसवा जलमका डील मे, पासा जीवता हय्‌न बठा हयहे, अने आपणु, जे तीहयी टेमे जीवत्‌ला रेहु, ता आपणो सीको बदली जहे। 53 काहाके रद्‌दी डील ने खत्‌तम नी हय एसवु डील पेरवानुत से, अने मरला डील ने अमरकायु डील पेरवानुत से। 54 अने जत्‌यार आहयु रद्‌दी डील खत्‌तम नी हय एसवु डील पेर लेहे, अने आहयु मरलु डील अमरकाय नु जलमकु डील पेर लेहे, ता खरला सास्‌तर मे लीखलो आहयो बोल पुरो हय जहे: "जीक मोत ने गळ जी।"

55 ए मोत तारी जीक कां से?

ए मोत तारी आळ कां से?

56 मोत नी आळ ते पाप से, अने मुसा ना कायदा सी पाप नो जोर वदे। 57 पण मे भगवान ने तु घणो वारु से केम, काहाके भगवान आपणु ने मालीक ईसु मसी नी लारे पाप ने जीकवा नो जोर आपे।

58 एतरे मारा मोंगाळ्‌ळा भायु तमु भरहा मे टणका रेवो, अने मालीक ईसु ना काम मे वद्‌ता जावो, काहाके तमने मालम से के मालीक ईसु मे तमारी मेहनत अमथी नी हय।