1 माणहु आमु ने ईसु मसी ना पावर्‌या अने भगवान नी ह़तायली वात ने उजन्‌ती करन्‌या ह़मजवा जोवे। 2 अने भगवान नी वात ने उजन्‌ती करन्‌या ने भरहो करे एवा रेवा जोवे। 3 भले तमु मारो नीयाव करो, ते बी मने आहयी वात नी फीकर नी हय, भले कानो बी माणेह मारो नीयाव कोरट-कचवरी मे करे, ते बी मारी फीकर नी हय, काहाके मे बी मारो नीयाव नी करु। 4 काहाके मारु मन मारो वाक नी काडे, ते बी मे वण-गुनाळ्‌ळो नी हय, काहाके मारो नीयाव करवा वाळो मालीक से। 5 एतरे नीयाव करन्‌या मालीक ने आवता लग, कोयनो बी नीयाव ना करो: मालीक अंदारला मे ह़तायली वात ने वीजाळा मे उजन्‌ती करहे, अने माणहु नी मन नी वात ने उजन्‌ती करहे। तीहयी टेमे भगवान एकीक जणा ने तु घणो वारु से केहे।

6 ए भायु, अने बेन्‌या तमु सास्‌तर नी वात ने टाळीन एक जणा नी वगे वळीन, अने बीजा नो वीरोद करीन मोटाय नी करवा जोवे, करीन मे आपणी अने अपुल्‌लोस नी वात कीन एक दाखलो देखाड़लो से। 7 कोय केय के तु बीजा गेथो वारु से? तारी पांह तारु ह़ु से, जे तने भगवान नी आप्‌यो हय? जत्‌यार तारी पांह जे कंय से तीहयु आखु भगवान पांह गेथु जड़लु से। ता आहयी वात कीन मोटाय ह़ु करवा करे के मने ते भगवान पांह गेथु जड़्‌यु नी।

8 तमु आहयो वीच्‌यार कर र्‌या के जे कंय जोवतु हतु तीहयु आखु अमारी पांह से। तमु हमणे आहयो वीच्‌यार कर र्‌या के तमु मालदार हय ज्‌या। ईसम कीन तमु ते अमारी वगर राजा बण ज्‌या। घण वारु हय जतु जत्‌यार तमु ह़ाचलीन राजा बण जता। ता आमु बी तमारी ह़ाते राज करता। 9 काहाके मारो वीच्‌यार से, के भगवान, आमु ने जे ईसु ना नेवताळा से, आहयी कळी मे आखा गेथा पसळ हालर मे उबा कर देदो, तीहया माणहुन तेम जीमने मोत नो डंड आपवा करीन ली जाय। काहाके आमने आखी कळी ना माणहु अने ह़रगदुत बी हाहे। 10 आमु ईसु मसी नी करते वण-अकल्‌या बण ज्‌या, पण तमु मसी मे घण अक्‌कल वाळा बण ज्‌या! आमु लुला से, पण तमु ते जोर वाळा से! तमु ते अबरु वाळा से अने आमु ते वण-अबरु वाळा से। 11 हजु लग आमु भुकला तरहेला से। अने पेरवा लग लुगड़ा नी हय। आमने माणहु ठोक देय, अने अमारी जुगु रेवा करीन अमारु घोर तक नी हय। 12 ✝4:12 नेवताळा ना काम 18:3आमु घण काठु काम करीया। माणहु आमने गलत केय, पण आमु बरकत आपया; तीहया आमने वेला पाड़े, पण आमु वेठता र्‌या। 13 जत्‌यार अमारु नामबद्‌दी करे ता आमु वीन्‌ती कर्‌या। आमु हजु लग आहयी आखी कळी ना माणहु ना मोळ ह़रका से, अने उकड़े नु कचरुन तेवा से।

14 तमने लाजे पाड़वा करीन नी पण मोंगाळ्‌ळो सोरा ह़मजीन तमने चेतावा करीन लीख र्‌यो। 15 काहाके भले तमने ह़ीकाड़वा वाळा मास्‌तर्‌या दह हजार हहे, पण तमारा बाह ते ढेरेत नी हय। काहाके ईसु मसी मे, मे तमने खुस-खबर ह़मळावीन तमारो बाह बण जेलो से। 16 ✝4:16 1 कुरन्‌थी 11:1; फीलीपीयो 3:17एतरे मे तमारी सी वीन्‌ती करु के तमु मारीन तेम जीवो। 17 मे आनीन करते तीमुथीयुस ने तमारीन्‌तां मोकल्‌लो से के तमने आहयी फोम करावहे के ईसु मे कीसम जीवो। मसी मे तीमुथीयुस मारो मोंगाळ्‌ळो अने भरहो करे एवो सोरो बण जेलो से। जां-जां ईसु नी मंडळी से तां-तां आहयी वात ह़ीकाड़ु।

18 काना ते एतरी जबर मोटाय करीन की र्‌या के हीय्‌यो अमारीन्‌तां आवेत नी। 19 पण कदीम मालीक नी मरजी हय, ता मे ह़ाचलीनेत तमारीन्‌तां छोटो आवही, अने मोटाय करन्‌या नी वात ने नी, पण तीमनी सक्‌ती नो पतो लगाड़ लेही। 20 काहाके भगवान नु राज वात पोर एतरुत नी, पण जोर पोर टेकलु से। 21 तमु केवो, के मे तमारीन्‌तां ह़ु लीन आवु? लाकड़ी लीन डंड आपवा आवु के मोंग अने नीचळे जीव सी आवु?