Atos 16

10 पोलुस आहयु ह़पनु देख लेदो अने अळतेण आमु मकीदुनीया मे आहयु ह़मजीन जवा हींडता हता के भगवान आमने तां खुस-खबर ह़मळावा करीन मोकल्‌लो से।

फीलीपुस मे लुदीया नु मन बदले

11 त्‌रोवास गेथा आमु मोट्‌ला ढुंड्‌या मे बहीन ह़ुदा-ह़ट सुमात्‌राके आया अने तां गेथा बीजा दाड़े नीयापुलीस आया। 12 अने आमु नीयापुलीस गेथा फीलीपी पुग्‌या, जे मकीदुनीया परगणा नु मुख्‌यु ह़ेर से; अने आमु थोड़ाक दाड़ा तां र्‌या। 13 युहदी माणहु ना अराम ना दाड़े आमु आहयु ह़मजीन ह़ेर नु झापलु वणकीन ह़ेर गेथा बारा, नंदी धेड़े आया के तां युहदी माणहु जुगु कानु वीन्‌ती करवा नु घोर हहे; अने तां पुगीन आमु तां भेळा हय रेला थोड़ाक बयरा ह़ाते वात करवा बाज ज्‌या। 14 अने लुदीया नाम नी एक थुवातीरा ह़ेर नी बयर जामण्‌या लुगड़ा वेचवा वाळी एक भगत बयर ह़मळी री हती, मालीक भगवान तीनु मन उगाड़ देदो, के तीहयी पोलुस नी वात पोर मन लगाड़े। 15 जत्‌यार तीहयी आह़फी ना घोरबाल्‌या भेळ पाणी मे बपतीस्‌मा लेदी, ता अमारी सी वीन्‌ती करी, के "कदीम तमु मने मालीक नी भक्‌ती करन्‌याण ह़मजी र्‌या हय, ता मारा घोर मे रेवो, अने तीहयी आमने टीणे पड़ीन ली जी।"

पोलुस अने सीलास जेल मे

16 एक दाड़े जत्‌यार आमु वीन्‌ती करन्‌या जागे जवा बाज र्‌या हता, ता आमने एक पावर्‌याण भेटी; तीनी मे आव्‌वा वाळी वात केण्‌यो भुत भराय रेलो; अने तीहयी ते भुतड़ान लारे माणहु ने आव्‌वा वाळी वात देखाड़त्‌ली अने तीना मालक्‌या जुगु ढेरेत पय्‌हा कमाय्‌न आपत्‌ली। 17 तीहयी पोलुस अने अमारी पसळ-पसळ आवीन आड़ती जाय्‌न केदी, "आहया माणहु आखा मे उचे रेण्‌या भगवान ना चाकर्‌या से, अने तमने छुटकारा नी वाट नी खबर ह़मळावे।"