ईब्‌रानीयो 12

5 अने तमु तीहयी ह़ीकापण ने जे तमने सोरान तेम ह़मजीन आपली से, ह़ु तमु तीने भुल ज्‌या?

ए मारा सोरा, मालीक ईसु नी वेला ने हळकी वात ना जाणो,

अने जत्‌यार तीहयो तमने डंड आपे ता हीम्‌मत ना हारो।

6 काहाके मालीक ईसु, जीने मोंग करे, तीने दुख बी आपे,

अने जीने सोरो बणाय लेय, तीने ह़ोटी दीन बी ह़ुदारे।

7 तमु दुख ने डाट ह़मजीन वेठ लेवो; भगवान तमारी ह़ाते सोरो जाणीन वेहवार करे। तीहयो कानो सोरो से बाह नी लारे डंड हात करे? 8 कदीम तीहया डंड जीना साजल्‌या आखा रीया, तमारो नी हय, ता तमु तीना सोरा नी हय, पण छीनाळ्‌या नी अवल्‌यात ठेर्‌या। 9 अने अमारो धरती पोर वाळो बाह बी आपणु ने डंड आप्‌या करे अने आमु तीनी ईज्‌जत कर्‌या, ता ह़ु आत्‌मा ना बाह ह़ाते अळी बी कब्‌जा मे रीन जीवत्‌ला रेवो। 10 तीहया ते आह़फा-आह़फा नी ह़मज नी अनसारे थोड़ाक दाड़ा जुगु डंड आप्‌या करता हता, पण तीहयो ते अमारा फायदा जुगु करे, के आमु बी तीना चोखलापण ना साजल्‌या हय जीया। 11 हमणे आखी भाती नी डाट खुसी नी, पण दुख नीत वात देखाय पड़े; ते बी जे आने वेठता-वेठता पक्‌का हय जेला से, अळतेण तीमने अराम भेळ धरम नी जीवाय अने सांती नो फोळ जड़े।