João 21

ईसु चेला अगळ उजन्‌तो हये

1 तीबर्‌या दर्‌या धेड़े ईसु अळी आह़फा ना चेला अगळ आहयी रीते उजन्‌तो देखाव पड़्‌यो। 2 एक दाड़े, सीमोन पतरस, थोमस, जे दीदुमस बी केवायतो हतो, नतनेल, जे गलील ना काना ह़ेर नो हतो, अने जब्‌दी ना बे बेटा अने ईसु ना बे बीजा चेला आहया आखा भेळात हता। 3 ✝21:3 लुका 5:5सीमोन पतरस, तीमने केदो, "मे ते माछला मारवा जाम।" अने तीहया पतरस ने केदा, "आमु बी तारी ह़ाते आवये।" अने तीहया तीनी ह़ाते चाल पड़्‌या, अने ढुंड्‌या मे चड़ीन बह ज्‌या, पण तीहयी राते तीमने एक बी माछली नी मरी। 4 ह़वारे हयतेत ईसु दर्‌या नी धेड़े आवीन उबो री ज्‌यो; बाखीन चेला ईसु ने नी ओळख्‌या। 5 तत्‌यार ईसु तीहया चेला ने केदो, "ए सोरा! तमने खावा करीन एक बी माछली नी मरी ह़ु?" तीहया चेला जपाप आप्‌या, "एक बी नी मरी।"

6 ✝ 21:6 लुका 5:6 तत्‌यार ईसु तीमने केदो, "ढुंड्‌या नी जमणी धेड़े जाळ नाखो ता तमने माछला मरहे।" तीहया जाळ नाख्‌या अने एतरा माछला आया के तीमने जाळ नी हपकायी।

7 ता तीहयो चेलो, जे ईसु नो लाडलो चेलो केवायतो हतो, पतरस ने केदो, "आहयो ते मालीक ईसुत से।" जत्‌यार सीमोन पतरस ह़मळ्‌यो के आहयो मालीक ईसुत से, ता तीहयो अरदो नागरलो हतो करीन फटकु सी केड़ वाळ लेदो, अने ईसु ने भेटवा जवा करीन दर्‌या मे कुद पड़्‌यो। 8 पण बीजा चेला, माछला भरायली जाळ ने हापकता जाय्‌न नान्‌ला ढुंड्‌या ने दर्‌या नी धेड़े लाया। काहाके तीहया दर्‌या नी धेड़े गेथा सेटा नी हता, तीहया दर्‌या धेड़े गेथा बेक ह़ोव हात सेटा हता। 9 जत्‌यार धेड़े पुग्‌या, ता तीहया कोयला नु आक्‌ठु, अने तीनी पोर माछला मेकला देख्‌या, अने रोट्‌ला देख्‌या। 10 ईसु तीमने केदो, जे माछला तमु हमणे मारला से, तीनी मे गेथा थोड़ाक लावो।

11 सीमोन पतरस ढुंड्‌या पोर चड़ीन एक ह़ो तीरपन मोट्‌ला माछला सी भरायली जाळ धेड़े हापक्‌यो, अने एतरा माछला हता ते बी जाळ नी फाटी।