लुका 1

ईसु नी पयदावारी नु टकायवा

26 अळतेण एलीसीबा नो छटवो मयनो चाल र्‌यो हतो, ता भगवान जीब्‌राईल ह़रगदुत ने गलील ना नासरत ह़ेर मे एक कुवारी सोरीन्‌तां मोकल्‌यो। 27 ✝1:27 मत्‌ती 1:18तीहयी कुवारी सोरी नु नाम मरीयम हतु, अने तीनी जोड़ावणी युसुफ नाम ना सोरा ह़ाते हय जेली हती। अने आहयो दावुद राजा नी अवल्‌यात माय्‌न हतो।✝1:27 मत्‌ती 1:18 28 अने ह़रगदुत मरीयम ने तां आवीन केदो, "वारु से के? भगवान नी संयबरकत तारी पोर से, मालीक भगवान तारी ह़ाते से।"

29 मरीयम ते बोल सी घणी घबराय जी, अने सोचवा लागी, ईनु मतलब ह़ु से? 30 ह़रगदुत तीने केदो, "ए मरीयम; भंगलाये ना, काहाके भगवान नी संयबरकत तार पोर आवली से। 31 ✝1:31 मत्‌ती 1:21देख, तु भारेपोगे हयह़ी, अने तारो एक सोरो हयहे; तु तीनु नाम ईसु राखजे। 32 तीहयो मोटो हयहे, अने तीहयो आखान मुख्‌या भगवान नो सोरो केवायहे। मालीक भगवान तीना बाह राजा दावुद नी राजगादी तीने आपहे। 33 अने तीहयो याकुब नी अवल्‌यात पोर सदा राज करतो रेहे, अने तीनु राज कदी नी खुटे।"

34 मरीयम ह़रगदुत ने केदी, "मे ते अदमी ने जाणु तक नी, ता तारी लारे केदली वात केम पुरी हयहे?"

35 ह़रगदुत जपाप आप्‌यो, "तार पोर चोखली आत्‌मा उतरह़े, अने तारी पोर आखान मुख्‌या भगवान नो जोरभर्‌यो साहळो पड़हे। एतरे तीहयु पयदा हयवा वाळु चोखलु सोरु, भगवान नु सोरु केवायहे। 36 तारी ह़गाय मे वाळी एलीसीबा ना बारा मे ह़मळ, तीहयी वांज्‌याण हती, अने हाव डायावारे भारेपोगे से, अने छोव मयना हय र्‌या। तीनु सोरु हयवा वाळु से। 37 काहाके भगवान जुगु कानु बी काम नी हये, ईसम नी हय।"

38 मरीयम केदी, "ह़मळ! मे मालीक भगवान नी पावर्‌याण से। तु हमणे केदो, तेम ने तेम मारी ह़ाते हयवा दे।" अने अळतेण ह़रगदुत तीनीन्‌तां गेथो जत र्‌यो।