1 ढेरेत जणा तीहयी वातु ने जे भगवान नी लारे आपणी वच मे वीतली ते वात ना बारा मे लीखवा मे मदत कर्‌या। 2 जीसम के तीहया जे पेले गेथात आहयी वातु ने देखवा वाळा अने खुस-खबर ना परच्‌यार करवा वाळा, अमारीन्‌तां तक पुगाड़्‌या। 3 एतरे ए थीयुफीलुस मने बी आहयु वारु मालम हयु के तीहयी आखी वीतली वात ना बारा मे आखु हालचाल सुरु गेथोत संय-संय जाच करीन तीने तारी वाटु नम्‌बर सी लीखु। 4 मे आहयु आनीन करते लीख्‌यो काहाके तमने आखी ह़ाचली वात मालम हये।

5 युहद्‌या ना राजा हेरोद नी टेमे अबीयाह नी पाल्‌टी✝ मे जकर्‌याह नाम नो एक पुंजारो हतो, अने तीनी लाडी हारुन ना कुटुम नी हती, जीनु नाम एलीसीबा हतु। 6 जकर्‌याह अने एलीसीबा बेम जणा भगवान नी अगळ धरमी माणेह हता, तीहया ते भगवान ना आखा हुकम अने कायदा पाळता हता। 7 काहाके एलीसीबा वांज्‌याण हती, अने तीहया बेम जणा डायला हय ज्‌या हता, अने तीमना एक बी सोरा नी हता।

8 जत्‌यार जकर्‌याह तीनी पाल्‌टी मे वारी आवे ता भगवान नी अगळ पुंजारा नु काम करतो हतो। 9 ता पुंजारा नी रीतीन तेम तीना नाम सी चीट्‌ठी नीकळी, के मालीक भगवान ना मंदीर मे जाय्‌न अगरबत्‌ती धपाड़े। 10 अने अगरबत्‌ती धपाड़वा नी टेमे आखा माणहु ना टोळा बारथा वीन्‌ती करता हता।

11 ता मालीक भगवान नो एक ह़रगदुत अगरबत्‌ती नी वेदी ना जमणी धेड़े उबो हय रेलो जकर्‌याह ने देखाव पड़्‌यो। 12 अने जकर्‌याह देखीन घबराय ज्‌यो अने तीहयो घणो बीही ज्‌यो। 13 पण ह़रगदुत तीने केदो, ए जकर्‌याह, बीहे ना काहाके तारी वीन्‌ती ह़मळी लेदलो से अने तारी लाडी एलीसीबा सी तारी वाटु एक सोरो पयदा हयहे, अने तु तीनु नाम युहन्‌नो राखजे। 14 अने तु खुस हय्‌न चेकळाय पड़ही: अने घणा माणहु तीने पयदा हयवा सी खुस हयहे। 15 काहाके तीहयो मालीक नी नींगा मे घणो मोटो गीणायहे, अंगुर नो रोह अने ह़रो अने कानी बी नसा नी चीज कदी नी पीय;✝ अने आह़फा नी आय्‌ह ना कोख मे गेथोत चोखली आत्‌मा सी भरायलो रेहे। 16 अने ईस्‌रायल मे गेथा घणा ढेरका माणहुम ने तीमना मालीक भगवान भणी पासा लावहे। 17 अने तीहयो एलीयान तेम सक्‌ती सी तीनी अगळ-अगळ जहे, तीहयो बाहु-बाहुन मन सोरा-सोरी भणी फीरवी देय; अने हुकम नी मानवा वाळा ने धरमी नी ह़मज पोर लावे; अने मालीक भगवान वाटु एक गमे तेवी पाल्‌टी तीयार करे।✝

18 जकर्‌याह ह़रगदुत ने पुछ्‌यो; आहयु मे कीसम जाणु? काहाके मे डायलो से; अने मारी लाडी बी डायली से।

19 ता ह़रगदुत तीने जपाप आप्‌यो, मे जीब्‌राईल से, जे भगवान नी अगळ उबो रेत्‌लो से; अने मे तार ह़ाते वात करवा अने खुस-खबर ह़मळाव्‌वा करीन मने मोकल्‌लो से।✝ 20 अने देख जे दाड़े तक आहयी वात पुरी नी हय जाय, तीहया दाड़े तक तु गुंगो रेही, अने तु बोल नी सके, एम करीन के तु मारी वात ने जे तीनी टेमे पुरी हयहे, तु तीनी पोर भरहो नी कर्‌यो।

21 अने माणहु जकर्‌याह नी वाट जोवता र्‌या अने घबरावा बाज ज्‌या के ईने मंदीर मे एतरी वार केम लागी? 22 जत्‌यार तीहयो बारो आयो, ता तीमनी अगळ बोल नी सक्‌यो ता तीहया जाण ज्‌या, के ईने मंदीर मे भगवान वगे गेथु कंय ने कंय देखाव पड़लु से; अने तीहयो गुंगो र्‌यो, अने तीमने अनसारो करतोत र्‌यो।

23 जत्‌यार तीना सेवा ना दाड़ा पुरा हया, ता तीहयो तीना घोर जत र्‌यो। 24 तीहया दाड़ा वीत ज्‌या, अने अळतेण तीनी लाडी एलीसीबा भारेपोगे हयी; अने पांच मयना तक तीहयी तीने आहयु कीन ह़ताड़ती री। 25 के माणहु मे मारी बदनामी सेटी करवा करीन मालीक भगवान आहया दाड़ा मे दया करीन मारी वाटु ईसम करलो से।

26 अळतेण एलीसीबा नो छटवो मयनो चाल र्‌यो हतो, ता भगवान जीब्‌राईल ह़रगदुत ने गलील ना नासरत ह़ेर मे एक कुवारी सोरीन्‌तां मोकल्‌यो। 27 ✝तीहयी कुवारी सोरी नु नाम मरीयम हतु, अने तीनी जोड़ावणी युसुफ नाम ना सोरा ह़ाते हय जेली हती। अने आहयो दावुद राजा नी अवल्‌यात माय्‌न हतो।✝ 28 अने ह़रगदुत मरीयम ने तां आवीन केदो, "वारु से के? भगवान नी संयबरकत तारी पोर से, मालीक भगवान तारी ह़ाते से।"

29 मरीयम ते बोल सी घणी घबराय जी, अने सोचवा लागी, ईनु मतलब ह़ु से? 30 ह़रगदुत तीने केदो, "ए मरीयम; भंगलाये ना, काहाके भगवान नी संयबरकत तार पोर आवली से। 31 ✝देख, तु भारेपोगे हयह़ी, अने तारो एक सोरो हयहे; तु तीनु नाम ईसु राखजे। 32 तीहयो मोटो हयहे, अने तीहयो आखान मुख्‌या भगवान नो सोरो केवायहे। मालीक भगवान तीना बाह राजा दावुद नी राजगादी तीने आपहे। 33 अने तीहयो याकुब नी अवल्‌यात पोर सदा राज करतो रेहे, अने तीनु राज कदी नी खुटे।"

34 मरीयम ह़रगदुत ने केदी, "मे ते अदमी ने जाणु तक नी, ता तारी लारे केदली वात केम पुरी हयहे?"

35 ह़रगदुत जपाप आप्‌यो, "तार पोर चोखली आत्‌मा उतरह़े, अने तारी पोर आखान मुख्‌या भगवान नो जोरभर्‌यो साहळो पड़हे। एतरे तीहयु पयदा हयवा वाळु चोखलु सोरु, भगवान नु सोरु केवायहे। 36 तारी ह़गाय मे वाळी एलीसीबा ना बारा मे ह़मळ, तीहयी वांज्‌याण हती, अने हाव डायावारे भारेपोगे से, अने छोव मयना हय र्‌या। तीनु सोरु हयवा वाळु से। 37 काहाके भगवान जुगु कानु बी काम नी हये, ईसम नी हय।"

38 मरीयम केदी, "ह़मळ! मे मालीक भगवान नी पावर्‌याण से। तु हमणे केदो, तेम ने तेम मारी ह़ाते हयवा दे।" अने अळतेण ह़रगदुत तीनीन्‌तां गेथो जत र्‌यो।

39 अळतेण तीहया दाड़ा मे मरीयम तीयार हय्‌न, यहुदा जीला ना बड़ा मे वहण्‌या, एक ह़ेर भणी उतवाळ्‌याण चाल पड़ी, 40 अने तीहयी जकर्‌याह ना घोर जाय्‌न एलीसीबा ने "वारु से के?" केदी। 41 अने मरीयम ने आहयु केते ह़मळतेत एलीसीबा नी पेट मे वाळु सोरु खुस हय्‌न उसळी पड़्‌यु, अने एलीसीबा चोखली आत्‌मा सी भराय जी। 42 अने एलीसीबा मरीयम ने ज्‌योरेत आड़ीन की पड़ी, "तु आखा बयरा मे जुगाळी से अने जुगाळो से तारा कोख मे नु सोरु! 43 अने आहयी बरकत मने का गेथी जड़ली से, के मारा मालीक नी आय्‌ह मारीन्‌तां आयी? 44 अने ह़मळ! जत्‌यार तु वारु से के? ईसम करीन पुछी एतरीत, अने मारा कोख मे वाळु सोरु खुस हय्‌न उसळी पड़्‌यु। 45 ह़ाचलीन, तु जुगाळी से, काहाके तु भरहो करी के मालीक भगवान तने केदो तेम ने तेम आखु हयहे!"

46 तत्‌यार मरीयम केवा बाज जी, "मारो जीव मालीक भगवान नी बड़ाय करे; 47 अने मारी आत्‌मा छुटकारो आपवा वाळा भगवान सी खुस हये।"

48 "काहाके तीहयो आह़फा नी पावर्‌याण पोर गीण कर्‌यो; एतरे ह़मळ! हमणे गेथा आखी पीड़ी ना माणहु मने जुगाळी केहे"

49 "काहाके आखा मे जोरभर्‌यो भगवान मारी वाटु घणु मोटु काम करलो से, अने तीनु नाम चोखलु से।"

50 "जे भगवान सी बीहे, तीमनी पोर तीनी दया पीड़ीडीट बणली रेय।"

51 "तीहयो आह़फा ना हात नो जोर देखाड़लो से, अने आह़फाम ना मन मे मोटाय करन्‌या ने रीवण्‌या-तीवण्‌या कर देदलो से।"

52 "तीहयो जोर वाळा राजा ने तीमनी राजगादी पोर गेथो पाड़ देदो; पण भोळा माणहु ने नामह़ाद्‌या बणावलो से।"

53 "तीहयो भुकला ने वारली चीज वेर अफराड़ देदो, अने अमीर ने ठारलात हाते मोकल देदो।"

54 "तीहयो तीना ईस्‌रायली जातीन माणहु ने मदत कर्‌यो, होव, तीमने फोम करीन दया कर्‌यो।"

55 "होव, तीहयो अमारा आड़ा-बुड़ा ह़ाते वायदो करलो हतो, तीनीत अनसारे तीनी गीण, अब्‌राहम अने तीनी अवल्‌यात पोर जलम बणली रेहे।"

56 मरीयम तीन मयना लग एलीसीबा ह़ाते री, अने अळतेण आह़फी ना घोर जत री।

57 अने एलीसीबा नु सोरु पयदा हयवा नी टेम पुरी हय जी, अने तीनो एक सोरो हयो। 58 तीनी आड़े-धेड़े रेवा वाळा, अने तीना ह़गायता ह़मळ्‌या के मालीक भगवान एलीसीबा पोर घण-जबर गीण करलो से, ता तीहया तीनी ह़ाते भेळा हय्‌न खुस हया।

59 अने अळतेण आंठवे दाड़े तीहया ते सोरु ने चोखु करवा आया, अने ते सोरु नु नाम बाह ना नाम पोर जकर्‌याह पाड़वा बाज ज्‌या। 60 पण ते सोरु नी आय्‌ह एलीसीबा केदी, "नी; ईनु नाम युहन्‌नो पाड़ देवो।"

61 तत्‌यार तां आवला आखा माणहु केवा बाज ज्‌या, "तारा ह़गायता मे बी, आहयु नाम कोय नु नी हय।" 62 ता तीहया ते सोरु ना बाह ने ईसारो करीन पुछ्‌या, "तु तारु सोरु नु नाम ह़ु पाड़वा हय र्‌यो?"

63 तीहयो लीखवा नी पट्‌टी मंगाड़ीन लीख्‌यो, "आनु नाम युहन्‌ना से।" ता आहयु देखीन आखा वीच्‌यार मे पड़ ज्‌या। 64 तत्‌यारुत जकर्‌याह नु मोडु अने जीप खुल जी, अने तीहयो बोलवा बाज ज्‌यो, अने भगवान ना गुण गाव्‌वा बाज ज्‌यो। 65 अने आड़े-धेड़े रेवा वाळा आखा माणहु वहराय्‌न बीही ज्‌या अने युहद्‌या ना बड़ा मे वाळा आखा देस मे, आहयी वात च्‌यारो-मेर पुग जी। 66 अने आखा ह़मळन्‌या, सोरु ना बारा मे आपणा-आपणा मन मे वीच्‌यारीन केदा, "आहयु सोरु ह़ु बणहे जाणे?" काहाके मालीक भगवान आनी ह़ाते हतो।

67 तीनो बाह जकर्‌याह चोखली आत्‌मा सी भराय ज्‌यो, अने तीहयो भगवान वगे गेथी हयवा वाळी वात केवा बाज ज्‌यो:

68 ईस्‌रायली जाती ना मालीक भगवान नी बड़ाय हयतीत रेय,

काहाके तीहयो आह़फा ना माणहु पोर दया करीन तीमने फोम कर्‌यो, अने तीमने छुटकारो आप्‌यो।

69 तीहयो आह़फा ना पावर्‌यो दावुद नी अवल्‌यात मे गेथो,

आपणी जुगु एक जोरभर्‌यो बचाड़वा वाळो मोकल्‌लो से।

70 आहयी वात ना बारा मे भगवान वगे गेथा केवा वाळा चोखला माणेह नी लारे कळी ना बारा मे आहयु केतो आय र्‌यो हतो,

71 अमारा वेरी ना हात मे गेथो,

अने अमारी सी ह़ीगी करवा वाळा ना हात मे गेथो अमारो छुटकारो करलो से।

72 तीहयो अमारा आड़ा-बुड़ा पोर दया करीन

अने आह़फो बोली करलो चोखलो वायदो फोम करे।

73 आहयी ह़ाम तीहयो अमारा डायला बाह अब्‌राहम अगळ खादलो।

74 के तीहयो आमने आहयु आपहे के

अमारा वेरी ना हात मे गेथा छुटीन,

75 जीवे तांह लग चोखलापणा मे रीन

अने तीना धरम पोर चालीन तीनी सेवा करता रेवा जोवे।

76 अने ए मारा सोरा! तु आखा गेथो डायला भगवान वगे गेथो वात केण्‌यो माणेह केवायही;

काहाके तु मालीक भगवान वाटु रोहो तीयार करवा करीन

तीनी अगळ-अगळ चाल्‌या करही।

77 भगवान ना माणहु ने छुटकारा नी अक्‌कल आपहे

के तमु भगवान पांह पाप नी माफी हात करीन कीकम छुटकारो हात करहु।

78 जीसम तु केही तेमेत भगवान पाप माफ करहे, काहाके तीहयो घणो दयाळो से।

जीसम दाहड़ु उगे तेमेत नवलो दाड़ो सुरु हये, तेमेत भगवान ने तां गेथो बचाड़न्‌यो अमारीन्‌तां आवह़े।

79 तत्‌यार तीहयो पाप ना अंदारला मे अने जलम नी मोत ना साहळा मे बह र्‌या, तीमनी उपर वीजाळु पपलावहे, अने होव,

तीहयो तीमने एक सांतीन जीवाय नी वाट्‌ये चालवा करीन तीमनी अगळ-अगळ चालीन अगवाय करहे।✝

80 अने तीहयु सोरु मोटु हयतु ज्‌यु अने आत्‌मा मे जोर वाळु हयतु ज्‌यु अने अळतेण ईस्‌रायली जाती ना माणहु नी अगळ उजन्‌तु हयते लग उजाड़ी बड़ा मे र्‌यु।