लुका 22

पतरस ईसु नो नीकारो करे

54 अळतेण तीहया ईसु ने धरीन बांद लेदा, अने तीने तां गेथा डायला पुंजारा ना घोर लीजवा करीन चाल पड़्‌या। अने पतरस थोड़ोक सेटो तीनी पसळ-पसळ जतो हतो। 55 डायला पुंजारा ना घोर पुगीन तीहया माणहु आंगणा मे आक्‌ठु धपाड़ीन आक्‌ठु नी च्‌यारो-मेर बह ज्‌या। पतरस बी तीहया तापवा वाळा ह़ाते बह ज्‌यो। 56 अने एक पावर्‌याण सोरी पतरस ने आक्‌ठु ना वीजाळे बह रेलो देखी, अने तीनी पोर नींगा नाखीन केदी, "आहयु माणेह बी ते हीनी ह़ाते हतु।"

57 बाखीन पतरस नीकारो करतो जाय्‌न ते पावर्‌याण सोरी ने केदो, "ओ बाय! मे हीने जाणु लग नी।"

58 थोड़ीक वार मे अळी कानो पतरस ने देखीन केदो, "तु बी ते हीय्‌या माणहु माय्‌न से।" पतरस तीहया माणेह ने केदो, "नी भाय! मे तीहया माणहु माय्‌न नी हय।"

59 एक घंटोक हय ज्‌यो अने अळतेण कानो बीजो जोर करीन केदो, "ह़ाचीत, आहयो बी ते तीनीत ह़ाते हतो। काहाके आहयो ते गलील ह़ेर मे रेवा वाळो से।"

60 पतरस तीने केदो, "ए भाय! मे नी जाणु के तु ह़ु केवा बाज र्‌यो" पतरस केवात बाज र्‌यो हतो अने तेतरी घड़ी कुकड़ो वांह देदो। 61 तत्‌यार मालीक पासो फीरीन पतरस भणी भाळ्‌यो अने तेतरी घड़ी पतरस ने ईसु नी तीहयी वात फोम आयी, जे वात मालीक ईसु तीने केदलो हतो; के "आज कुकड़ो वाहवा नी पेले, तु मारो तीन कावा नीकारो करही। 62 अने तत्‌यारुत पतरस बारथो नीकळीन पुकु-पुकु रड़वा बाज ज्‌यो।"