Lucas 24

ईम्‌माउस ह़ेर मे जाण्‌या चेला ने ईसु देखाव पड़े

13 तीहयात दाड़े बे चेला ईम्‌माउस नाम ना गाम भणी जाय र्‌या हता। तीहयु यरुसलेम ह़ेर गेथु ह़ात मील सेटु हतु। 14 तीहया बे जणा जे हयली ते वात ना बारा मे आंबा-सांबा वात-वीच्‌यार करता-करता जाय र्‌या हता। 15 जत्‌यार तीहया वात करवा बाज र्‌या हता, तीहयीत टेमे ईसु आह़फोत आवीन, तीमनी ह़ाते-ह़ाते चाल पड़्‌यो, 16 चेला ईसु ने देख्‌या, पण तीहया तीने नी ओळख्‌या। 17 ईसु ते चेला ने केदो, "तमु वाट्‌ये चालता-चालता कानी वात ना बारा मे वात-वीच्‌यार कर र्‌या?" तीहया उबा री ज्‌या। अने घणा उदास हता। 18 तीमनी माय्‌न एक जणो कलीयुपास नाम नो हतो, तीहयो जपाप आप्‌यो, "यरुसलेम ह़ेर मे आव्‌वा-जवा वाळा माय्‌न तुत एवो अंजाण्‌यो से ह़ु, जे आहयु नी जाणे के आहया दाड़ा मे ह़ु-ह़ु हयलु से?"

19 ईसु तीमने केदो, "तां ह़ु हयलु से?" तीहया केदा, "आहयी ईसु नासरी नी वात से। तीहयो माणेह भगवान नी अने आखा माणहु नी नींगा मे, काम अने वात मे, भगवान वगे गेथी वात केण्‌यो जोरभर्‌यो माणेह हतो। 20 अने डायला पुंजारा अने अमारी पोर हक जमाड़न्‌या पुडारी तीने धराय देदा; अने मोत नो डंड अपाड़्‌या अने कुरुस पोर खुटा ठोकीन चड़ाय मांग्‌या। 21 आमु ते घणी मोटी आह कर र्‌या हता, की आहयोत ईस्‌रायल देस नो छुटकारो करवा वाळो से। आहयी आज गेथा तीन दाड़ान पेल्‌नी वात से। 22 अमारी माय्‌न थोड़ाक बयरा आमने घणा वहराड़ देदा; तीहया ह़वारे वेगा-वेगात मड़ाट्‌यान्‌तां जेला। 23 तीमने ईसु नो धोड़ नी जड़्‌यो। तीहया तां गेथा पासा आवीन आमने केदा, के आमने ह़रगदुत देखाव पड़्‌या, तीहया आहयु केदा के ईसु जीवत्‌लो से। 24 आहयी वात ह़मळीन अमारी माय्‌न थोड़ाक ह़ाती मड़ाट्‌यान्‌तां ज्‌या, अने जेम बयरा तीमने केदला, तेमेत आखु तीमने देखाव पड़्‌यु; पण तीहया ईसु ने नी देख्‌या।"

25 ता ईसु तीमने केदो, "ए वण-अकल्‌या! तमु भगवान वगे गेथा केण्‌या माणेह नी वात पोर, भरहो करवा मे एतरा कम अकल्‌या कीकम बण ज्‌या! 26 मसी ईसु ने दुख झेलीन, तीना ह़ेक मे पासु भरायवा ताले नी हतु ह़ु?" 27 अने ईसु मुसा नी लीखली सास्‌तर मे गेथो, अने भगवान वगे गेथा केण्‌या माणेह नी सास्‌तर मे गेथो, अने सुरु करीन आखा खरला सास्‌तर मे गेथु आह़फा ना बारा मे जे कंय लीखलु से, तीहयु आखु तीमने ह़मजाड़्‌यो।

28 अने अळतेण चालता-चालता, तीहया गाम मे पुग ज्‌या, जां तीहया जाय र्‌या हता। मालीक ईसु ने देखीन आसम लागतु हतु, के ईसु अळी अगो जवा ना वीच्‌यार मे हतो। 29 तीहया चेला ईसु ने रावण्‌या करीन रोक्‌या, के "तु अमारी ह़ाते री जा। काहाके हाव ह़ांतु हय ज्‌यु, अने दाहड़ु बी घणु ढळ जेलु से।" अने ईसु तीमनी ह़ाते रेवा करीन घोर मे ज्‌यो। 30 जत्‌यार ईसु तीमनी ह़ाते खाणु खावा करीन बह्‌यो, ता तीहयो रोट्‌लो हात मे धर्‌यो, अने भगवान ने तु घणो वारु से कीन चेला ने भांगी-भांगीन आप देदो। 31 तीहयीत टेमे चेला ना डोळा उगड़ी ज्‌या, अने तीहया ईसु ने ओळखी लेदा, बाखीन ईसु तीमनी देखणतेत उलुप हय ज्‌यो। 32 ता चेला आंबा-सांबा आहयु केदा, "जत्‌यार तीहयो वाट्‌ये चालतो जाय्‌न अमारी ह़ाते वात करतो हतो, अने खरला सास्‌तर नी वात देखाड़तो हतो, ता आपणु मन घण-जबर खुस नी हयु ह़ु?"

33 ते चेला तत्‌यारुत तां गेथा उठीन यरुसलेम ह़ेर भणी पासा ज्‌या। तां पुगीन तीहया ग्‌यारे चेला ने अने तीमना बीजा ह़ाती ने भेळा हय रेला देख्‌या। 34 तीहया आहयु केवा बाज र्‌या हता, "मालीक ईसु ह़ाचलीन पासो जीवतो हय जेलो से, अने तीहयो सीमोन पतरस ने देखाव पड़लो से।"

35 तत्‌यार तीहया बेम जणा वाट्‌ये जे हयु तीहयु आखु की देदा अने आहयु बी की देदा के ईसु रोट्‌लो भांगीन आप्‌यो, ता आमु तीने ओळखी लेदा।