लेव्‌यवेवस्‌था 11

चोखला अने वीटळ्‌ळा जानवरु

1 अळी भगवान मुसा ने अने हारुन ने केदो, 2 ईस्‌रायली माणहु ने की देवो: जेतरा जानवर धरती पोर से तीमनी मे गेथा तमु आहया जीवत्‌ला जानवरु नु माह खाय सको। 3 जानवरु मे गेथा जेतरा चीरायला अने फाट्‌ला खुर्‌या ना रेय अने वगल करे तीने खाय सको। 4 पण चीरायला खुर्‌या अने वगल करवा वाळा मे गेथा आहया जानवर ने नी खाजो, उटड़ु, जे वगल ते करे पण चीरायला खुर्‌या नु नी रेय, आनी लेदे तीहयु तमारी लेदे वीटळ्‌ळु से। 5 अने सापान नाम नु जानवर जे वगल ते करे पण चीरायला खुर्‌या नु नी रेय, तीहयु बी तमारी लेदे वीटळ्‌ळु से। 6 अने ह़ेहल्‌यु, जे वगल ते करे पण चीरायला खुर्‌या नु नी रेय, करीन तीहयु बी तमारी लेदे वीटळ्‌ळु से। 7 अने ह़ुवर्‌यु, जे चीरायला खुर्‌या नु ते रेय पण वगल नी करे, आनी लेदे तीहयु बी तमारी लेदे वीटळ्‌ळु से। 8 आमनु माह गेथु कंय बी नी खाजो, अने नी आमना धोड़ ने छीमजो; आहया तमारी लेदे वीटळ्‌ळा से। 9 अळी जेतरा पाणी मे वाळा जीव से तीमनी मे गेथा आमने तमु खाय सकत्‌ला, दर्‌या नीता नंदी ना पाणी मे गेथा जीमना पाखड़ा रेय अने खीलपड़ा रेय तीमने खाय सकत्‌ला। 10 अने पाणी मे वाळा जीव-जन्‌तु जेतरा बी जीव पाखड़ा वगर ना दर्‌या नीता नंदी मे रेय तीहया आखा तमारी लेदे वीटळ्‌ळा से। 11 तीहया तमारी लेदे वीटळ्‌ळा से; तमु तीमनु माह नी खाजो, अने तीनी धोड़ ने वीटळ्‌ळी जाणजो। 12 पाणी मे जे बी जन्‌तु ना पाखड़ा नी रेय तीहया तमारी लेदे वीटळ्‌ळा से। 13 अने चड़ा मे गेथा आमने वीटळ्‌ळा जाणजो, आहया वीटळ्‌ळा हयवा ना कारण नी खाजो, उकाब घुवड़, मोर घुवड़, कुरर घुवड़ 14 घुवड़, अने भाती-भाती ना घुवड़ा, 15 अने भाती-भाती ना आखा ढांड्‌या, 16 सुतुरमुर्‌ग, तखमास नाम नो घुबड़्‌यो, बोतकुकड़ा अने भाती-भाती ना घुवड़, 17 ढुड्‌डाकणा, अने मोट्‌ला बगल्‌या, काकणघारा 18 माछला खाण्‌या बगल्‌या, जंगली घुबड़्‌यो दर्‌या मे वाळी घुवड़, 19 लगलग नाम ना बगल्‌या, अने भाती-भाती ना बगल्‌या, टीटवड़ी, अने वागळा। 20 अने जेतरा पाखड़ा वाळा कीड़ा च्‌यार पोग पोर चाले, तीहया आखा तमारी लेदे वीटळ्‌ळा से। 21 पण घीहाय्‌न चालन्‌या अने पाखड़ा वाळा जे च्‌यार पोगु पोर चाले, जीमना जागा पोर कुदवा उछळवा ना पोगु रेय तीमने ते खाय सकत्‌ला, 22 तीहया आहया से, भाती-भातीन टीड्‌या, भाती-भातीन छीदा, भाती-भाती ना काहरु भुबला अने भाती-भाती ना टीड्‌या। 23 पण बीजा आखा घीहाय्‌न चालवा वाळा कीड़ा जे च्‌यार पोगु वाळा रेय तीहया तमारी लेदे वीटळ्‌ळा से। 24 पण कदी तमु मरला जानवर ने छीमे ता तीहयो ह़ांतो तक वीटळ्‌ळो ठेरहे। 25 अने जे कोय मरला जानवर ने नाखवा ली जाय तीहयो आह़फा ना लुगड़ा धोवे अने ह़ांतो तक वीटळ्‌ळो रेहे। 26 अळी जेतरा जानवर चीरायला खुर्‌या ना रेय पण तीमना खुर्‌या फाट्‌ला नी हय अने वगल नी करता हय तीहया तमारी लेदे वीटळ्‌ळा से; जे कोय तीमने छीमे तीहया वीटळ्‌ला ठेरहे। 27 अने च्‌यार पोगु पोर चालवा वाळा मे गेथा जेतरा पाटली ना भरहे चाले तीहया आखा तमारी लेदे वीटळ्‌ळा से; जे कोय तीमना धोड़ ने छीमे तीहयो ह़ांतो तक वीटळ्‌ळो रेहे। 28 अने जे कोय तीमना धोड़ ने नाखवा ली जाय तीहयो माणेह आह़फा ना लुगड़ा धोवे अने ह़ांतो तक वीटळ्‌ळो रेय; काहाके तीहयु तमारी लेदे वीटळ्‌ळु से। 29 जे धरती पोर घीहाय्‌न च्‌यार पोगे चाले तीमनी मे गेथा आहया तमारी लेदे वीटळ्‌ळा से, मतलब नोळ्‌या, उंदरा, अने भाती-भाती ना गुरफड़ा, 30 अने मंदवाड़्‌या, मोगर, घीरवळी, मोट्‌लो ह़ेवड़्‌यो, अने ह़ेवड़्‌या। 31 आखा च्‌यार पोगे घीहाय्‌न चालन्‌या मे गेथा आहया तमारी लेदे वीटळ्‌ळा से; जे कोय आमने मरला ने छीमे तीहयो ह़ांतो तक वीटळ्‌ळो रेय। 32 अने आमनी मे गेथु कानु मरलु जानवर कानी चीज पोर पड़ जाय तीहयी चीज बी वीटळी जहे, तीहयु लाकड़ा नु कंय बणलु हय, नीता लुगड़ु, खाल, नीता चचर्‌यो ठेलो नीता काना काम नु कानु बी चीज काहा नी हय; तीने पाणी मे धोव्‌वा जोवे, अने ह़ांती तक वीटळ्‌ळी रेहे, ता चोखली हय जहे। 33 अने कदी कादा नु कंय बणलु हय जीनी मे आहया जीव-जन्‌तु मे गेथु कंय पड़ जाय, ता तीहयु ठाहरु मे जे कंय हय तीहयु वीटळी जहे अने ते ठाहरु ने तमु फोड़ नाखजो। 34 तीनी मे कंय खावा लायक खाणु हय, अने पाणी तीहया खाणा पोर पड़ जाय ता तीहयु वीटळी जहे; अळी एवा ठाहरा मे पीवा लायक कंय बी चीज हय तीहयी वीटळी जहे। 35 अने कदी मरला जानवर नु कंय कानी चीज पोर पड़े ता तीहयु बी वीटळी जहे, अने तीने भांग नाखवा जोवे; काहाके तीहयी वीटळ्‌ळी हय जाय, तीहयी तमारी लेदे बी वीटळ्‌ळी ठेरहे। 36 पण झोर नीता तळाव जीनी मे पाणी एक्‌ठु हये तीहयु ते चोखलुत रेहे; पण जे कोय मरलु ने छीमे तीहयो वीटळी जहे। 37 अने कदीम मरला जानवर काना भाती ना बीज पोर पड़े जे वेरवा करीन मेकलु हय, ता तीहयु बीज चोखलु रेहे; 38 पण कदी बीज पोर पाणी नाखलु हय अने पछळ मरला जानवर मे गेथु कंय बीज पोर पड़ जाय, ता तीहयु तमारी लेदे वीटळ्‌ळु ठेरहे। 39 जे जानवरु ने तमने खावा नो हुकम आपलो से, कदी तीमनी मे गेथु कानु जानवर मरे, ता जे कोय तीने छीमे तीहयो ह़ांतो तक वीटळ्‌ळो रेहे। 40 अने मरला जानवर मे गेथु जे कोय खाय तीहयो आह़फा ना लुगड़ा धोवे अने ह़ांतो तक वीटळ्‌ळो रेहे; अने जे कोय मरला जानवर ने ली जाय तीहयो बी आह़फा ना लुगड़ा धोवे अने ह़ांतो तक वीटळ्‌ळो रेहे। 41 "आखा भाती ना धरती पोर घीहाय्‌न चालन्‌या जीव-जन्‌तु ह़ीगी आवे एवा से; तीमने खावा नी जोवे। 42 धरती पोर आखा घीहाय्‌न चालवा वाळा मे गेथा जेतरा पेट नीता च्‌यार पोगे चालन्‌या से, नीता जादा पोग वाळा रेय, तीमने तमु नी खाजो; काहाके तीहया ह़ीगी आवे एवा से। 43 तमु काना भाती ना घीहाय्‌न चालवा वाळा जीव-जन्‌तु ना लारे आह़फा ने नी वीटाळजो; अने तीमनी लारे आह़फा ने नी वीटळ्‌ळा बणावजो। 44 काहाके में तमारो भगवान यहोवा से; आना कारण सी आह़फा ने चोखा करीन चोखला बणीन रेवो, काहाके में चोखलो से। आनी लेदे तमु बी कानी भाती ना घहड़ाय्‌न चालन्‌या जीव-जन्‌तु ना लारे जे धरती पोर चाले आह़फा ने नी वीटाळजो। 45 काहाके में तीहयो यहोवा से जे तमने मीस्‌र देस गेथा आनी लेदे नीकाळीन लावलो से के तमारो भगवान ठेरु; आनी लेदे तमु चोखला बणो, काहाके में चोखलो से।" 46 जानवरु, चड़ा अने आखा पाणी मे रेण्‌या जीवु, अने धरती पोर आखा घहड़ाय्‌न चालन्‌या जीवु ना बारा मे आहयो नेम से, 47 के चोखला अने वीटळ्‌ळा, अने खावा लायक अने नी खावा लायक जीवु मे फरक कर सको।