लेव्‌यवेवस्‌था 6

1 अळी भगवान मुसा ने केदो, 2 कदी कोय माणेह भगवान ने धोको दीन पापी ठेरे, जीसम लेण-देण, नीता लुट ना बारा मे आह़फा ना भाय ह़ाते धोको करे, नीता तीनी ह़ाते गलत करे, 3 अने नीता खोवायली चीज पाछी जड़ जाय, अने तीना बारा मे झुट मेले अने झुटी ह़ाम बी खाय; आसवी कानी बी वात काहा नी हय जीनी सी माणहु पापी ठेरे, 4 ता जत्‌यार तीहयो आसम काम करीन गुनाळ्‌ळो हय जाय, ता जे बी चीज तीहयो लुट्‌यो, नीता लुच्‌चाय करीन, नीता खोवायली चीज जड़ली हय; 5 भले कानी बी चीज काहा नी हय तीना बारा मे झुटी ह़ाम खादो हय; ता तीहयो तीने आखु पासो आप देवा जोवे, अने पांचवो वाटो बी बड़ाय्‌न आप देय, जे दाड़े आहयु मालम हय जाय के तीहयो गुनाळ्‌ळो से तीहयात दाड़े तीहयी चीज ने जीनी हय तीने आप देय। 6 अने तीहयो भगवान ना अगळ आह़फा नी गुना नी बादा बी लावे, नीता खामी वगर नो गाडरो बी गुना नी बादा ना लेदे पुंजारान्‌तां लावे, तीहयो तेतरीत कीमत नो रेवा जोवे जेतरी पुंजारो ठेरायो हय। 7 आहयी रीते पुंजारो तीनी लेदे भगवान ना अगळ पछतावो करे, अने जे काम ने तीहयो करीन गुनाळ्‌ळो हय जेलो से तीनी माफी तीने जड़हे।

भाती-भाती नी बादा नी रीती

होम बादा

8 अळी भगवान मुसा ने केदो, 9 हारुन अने तीना सोरा ने हुकम आपीन आहयु कीदे के होम बादा नो नेम आहयो से: होम बादा आक्‌ठु पोर रात भर ह़वारे तक वेदी पोर पड़ रेय, अने वेदी नु आक्‌ठु वेदी पोर धपतु रेय। 10 अने पुंजारो सुती लुगड़ु अने आह़फा ना डील पोर सुती धोती नी कासड़ी पेरीन होम बादा नो रोखड़ो, जे आक्‌ठु मे धपीन वेदी पोर री जाय तीने चुटीन वेदीन एक धेड़े मेके। 11 तत्‌यार तीहयो आह़फा ना आहया लुगड़ा नीकाळीन बीजा लुगड़ा पेरीन रोखड़ा ने पड़ावा मे गेथो सेटो बारो वारला जागा मे ली जाय। 12 वेदी पोर आक्‌ठु धपतु रेवा जोवे कदी ओलायवा नी जोवे; अने पुंजारो दाड़ीन ह़वारे तीनी पोर लाकड़ा धपाड़ीन होम बादा ना टुकड़ा तीनी पोर जमाड़ीन मेक देवा जोवे अने तीनी उपर मेल-मीलाप कराव्‌वा वाळी बादा नी चरबी ने धपाड़्‌या करे। 13 वेदी पोर आक्‌ठु लगातार धपतु रेय; तीहयु कदी ओलायवा नी जोवे।

अन नी बादा

14 अन नी बादा नो नेम आसम से: हारुन ना सोरा तीने वेदी ना अगळ भगवान ना ह़ाते लावे। 15 अने तीहया अन नी बादा मे तेल मीलावला लोट मे गेथु मुठ भरीन अने तीनी पोर नु आखु लोबान चुटीन अन नी बादा ने फोम कराव्‌वा वाळा वाटा ना रुप मे भगवान ना अगळ वारु गंद ना लेदे वेदी पोर धपाड़े। 16 अने तीनी मे जे बच जाय तीने हारुन अने तीना सोरा खाय; तीने खमीर वगर चोखला जागा मे खावा जोवे, नीता तीहया मेल-मीलाप वाळा तम्‌बु ना आंगणा मे खावा जोवे। 17 तीने खमीर भेळ नी चुड़ाव्‌वा जोवे; काहाके मे मारी आक्‌ठु मे चड़ावली बादा नो वाटो तीमने आपलो से; करीन जेम आहयी पाप नी बादा अने गुना नी बादा चोखली से तेमेत आहयी बादा बी चोखली से। 18 हारुन नी अवल्‌यात ना आखा अदमड़ा तीनी मे गेथु खाय सकत्‌ला, तमारी पीड़ी-पीड़ी तक भगवान नी वेदी ना आक्‌ठा मे चड़ाव्‌वा नी बादा नो वाटो तमारोत रेहे; जे कोय आहयी बादा ने छीमहे तीहयो चोखलो ठेरहे। 19 अळी भगवान मुसा ने केदो, 20 जे दाड़े हारुन नो अभीसेक हये ते दाड़े तीहयो तीना सोरा ह़ाते भगवान ने आहयो चड़ावो चड़ावे; नीता दसवो वाटो लोट तीनी मे गेथो अरदो वाटो ह़वारे अने अरदो वाटो ह़ांतो चड़ावतो रेय। 21 तीने तवा पोर तेल ह़ाते चुड़ावे; जत्‌यार तीहयु तेल सी चुड़ जाय ता तीने ली आवो आहयी अन नी बादा ना चुड़ला टुकड़ा ने भगवान ना लेदे वारु गंदायवा ना लेदे चड़ावो। 22 हारुन ना सोरा मे गेथा जीने बी पुंजारा ना लेदे अभीसेक करलो हय, तीहयो बी आनीन तेवो चड़ावो चड़ावे; आहयी रीती सदा नी से, अने भगवान नो चड़ावा ना वाटा ने आखो धपाड़े। 23 पुंजारा नी आखी अन नी बादा ने धपाड़ देहे; तीने कदी बी नी खाय।

पाप नी बादा

24 अळी भगवान मुसा ने केदो, 25 हारुन अने तीना सोरा ने आहयु कीदे के पाप नी बादा नो नेम आहयो से: जे जागा मे होम बादा नु जानवर ने मारे तीनी मे जानवर ने मारीन पाप नी बादा बी भगवान ना अगळ चड़ावो; तीहयी बादा आखा सी चोखली से। 26 जे पुंजारो पाप नी बादा चड़ावे तीहयो तीने खाय; तीहया चोखला जागा मे नीता मेल-मीलाप वाळा तम्‌बु ना आंगणा मे खावा जोवे। 27 जे कोय तीना माह ने छीमे, तीहयो चोखलो हय जहे; अने कदी तीना लोय ना छीटा काना लुगड़ा पोर पड़ जाय, ता तीने काना चोखला जागा मे धोय लेवा जोवे। 28 अने तीहयु कादा नु ठाहरु जीनी मे तीहयु रांदलु हय फोड़ देवा जोवे; कदी तीने पीतळ नु ठाहरु मे उबाळ्‌ळु हय, ता तीने उजाळ देवा जोवे अने पाणी सी धोय लेवा जोवे। 29 पुंजारा मे गेथा आखा अदमी तीने खाय सकत्‌ला; तीहयी जादा चोखली चीज से। 30 पण जे पाप नी बादा ना जानवर ना लोय मे गेथु थोड़ुक लोय मेल-मीलाप वाळा तम्‌बुन मोय चोखला जागा मे पछतावो करवा, पुगाड़वा जोवे, तीनु माह कदी नी खावा जोवे; आक्‌ठु मे धपाड़ देवा जोवे।