लेव्‌यवेवस्‌था 13

कुड़ावान मंदवाड़ नी लेदे नेम

1 अळी भगवान मुसा ने अने हारुन ने केदो, 2 जत्‌यार काना माणेह ना चामड़ा मे ह़ुजन नीता फोपलो नीता दाग हय, अने आनी सी चामड़ा मे कोड़ ना छालान तेम देखाव पड़े, ता तीने हारुन पुंजारान्‌तां नीता तीना सोरा जे पुंजारा से तीमनी मे गेथा कोय ने तां ली जाय। 3 जत्‌यार पुंजारो तीना चामड़ा ना छाला ने देखे, अने तीहया छाला नी जागे नीम्‌बाळा धोळा हय जेला हय अने घाव चामड़ा मे उंडो देखाव पड़े ता तीहयो जाण लेय के छालो कोड़ नो से; अने पुंजारो तीहया माणेह ने देखीन तीने वीटळ्‌ळो ठेरावे। 4 तीना चामड़ा मे नो छालो धोळो ते से पण चामड़ा मे उंडो नी देखाव पड़े, अने तीहया जागे ना नीम्‌बाळा धोळ्‌ळा नी हया हय ता पुंजारो तीहया माणेह ने ह़ात दाड़ा तक अलग राखे; 5 अने ह़ातवा दाड़े पुंजारो तीने देखे, अने कदी तीहयो‌ छालो तेमेत बणलो रेय अने चामड़ा मे नी फेल्‌लो हय, ता पुंजारो तीने अळी बी ह़ात दाड़ा तक अलग राखे, 6 अने ह़ातवा दाड़े पुंजारो तीने अळी देखे, अने कदी छालो कम हय जेलो हय ता अने चामड़ा मे छालो फेल्‌लो नी हय, ता पुंजारो तीने चोखलो ठेरावे; काहाके तीना ते चामड़ा मे घावेत से; ता तीहयो तीना लुगड़ा धोय्‌न चोखो हय जाय। 7 पण कदीम पुंजारा नी तीहयी जाच ना बाद जीनी मे तीने चोखलो ठेरावलो हतो, छालो तीनी बाद चामड़ा मे अळी फेल जाय, ता तीहयो अळी पुंजारान्‌तां जाय अने देखाड़े; 8 अने पुंजारा ने देखाव पड़े के छालो चामड़ा मे जादा फेल जेलो से, ता तीहयो तीने वीटळ्‌ळो ठेरावे काहाके तीहयी कोड़ नीत बीमारी से। 9 कदी कोड़ ने तेवो छालो काना माणेह ने हय, ता तीने पुंजारान्‌तां लीजवा जोवे; 10 अने पुंजारो तीने देखवा जोवे, अने कदी चामड़ा पोर धोळ्‌ळो ह़ुजन हय, अने नीम्‌बाळा बी धोळ्‌ळा हय जेला हय, अने तीहयी ह़ुजन मे चामड़ा वगर नु माह हय, 11 ता पुंजारो जाण जवा जोवे के तीना चामड़ा मे पुराणो कोड़ से, आनी लेदे पुंजारो तीने वीटळ्‌ळो ठेरावे तीने अलग नी राखे काहाके तीहयो वीटळ्‌ळो से। 12 अने कदी कोड़ रोग काना ना चामड़ा मे गेथो फुटीन एतरो फेल जाय, के जां कंय बी पुंजारो देखे मांदला ने मुंडे सी लगाड़ीन पोगु ना तळवे तक कोड़ रोग फेल जेलो से, 13 ता पुंजारो ध्‌यान सी देखे, अने कदी कोड़ रोग तीना आखा डील मे फेल जाय, ता तीहयो ते माणेह ने चोखलो ठेराव्‌वा जोवे; अने तीनु आखु डील जे धोळ्‌ळु हय जेलु से तीहयु चोखलुत ठेरे। 14 पण जत्‌यार तीनी मे चामड़ा वगर माह देखावा पड़े, ता तीहयो वीटळ्‌ळो ठेरहे। 15 अने पुंजारो चामड़ा वगर ना माह ने देखीन तीने वीटळ्‌ळो ठेरावे; काहाके चामड़ा वगर नु माह वीटळ्‌ळुत रेय; तीहयु कोड़ से। 16 पण कदी चामड़ा वगर नु माह पासु धोळ्‌ळु हय जाय, ता तीहया माणेह ने पुंजारान्‌तां जवा जोवे। 17 अने पुंजारो तीने देखे, अने कदी तीहयो छालो अळी धोळो हय ज्‌यो हय, ता पुंजारो तीने चोखलो जाणे; तीहयो चोखलो से। 18 अळी कदी काना ने चामड़ा मे फोड़ो नीकळीन वारु हय ज्‌यो हय, 19 अने फोड़ा ना जागा पोर धोळ्‌ळी ह़ुजन नीता रात्‌लो हय रेलो धोळ्‌ळो दाग हय, ता तीने पुंजारा ने देखाड़े; 20 अने पुंजारो तीहयु ह़ुजन ने देखे, अने तीना नीम्‌बाळा बी धोळा हय ज्‌या हय, ता पुंजारो आहयु जाणीन तीहया माणेह ने वीटळ्‌ळो ठेरावे; काहाके तीहयो कोड़ नो छालो से जे फोड़ा मे गेथो फुटीन नीकळ्‌ळो से। 21 पण कदी पुंजारो देखे के तीनी मे धोळ्‌ळा नीम्‌बाळा नी हय, अने तीहयो चामड़ा मे उंडे नी हय, अने तीनी चमक कम हयली से, ता पुंजारो तीहया माणेह ने ह़ात दाड़ा तक अलग करीन राखे। 22 अने कदी तीहयो छालो तीहयी टेम तक चामड़ा मे ह़ाचलीन फेल जाय, ता पुंजारो तीहया माणेह ने वीटळ्‌ळो ठेरावे; काहाके तीहयो कोड़ नो छालो से। 23 पण कदी तीहयो छालो नी फेले अने तीहयात जागा पोर रेय, ता तीहयो फोड़ा नो छालो से; पुंजारो तीहया माणेह ने चोखलो ठेरावे। 24 अळी कदी काना ना चामड़ा मे धपवा नो घाव हय, अने तीहयो धपला नो घाव चामड़ा वगर रात्‌लो छालो धोळ्‌ळो हय जाय, 25 ता पुंजारो तीने देखे, अने कदी तीहया दाग मे नीम्‌बाळा धोळा हय ज्‌या हय अने छालो चामड़ा मे उंडो देखाय, ता तीहयो कोड़ से; जे तीहया धपला ना छाला मे गेथु फुट नीकळ्‌ळो से; पुंजारो तीहया माणेह ने वीटळ्‌ळो ठेरावे काहाके तीनी मे कोड़ नो दाग से। 26 पण कदी पुंजारो देखे के दाग मे धोळ्‌ळा नीम्‌बाळा नी हय अने नी दाग चामड़ा मे कंय उंडे हय, अने तीनी चमक बी कम हय जेली से, ता पुंजारो तीने ह़ात दाड़ा तक अलग राखे, 27 अने ह़ातवा दाड़े पुंजारो तीने देखे, अने कदी ते छालो चामड़ा मे फेल ज्‌यो हय, ता पुंजारो ते माणेह ने वीटळ्‌ळो ठेरावे; काहाके तीने कोड़ नो दाग से। 28 पण कदी तीहयो छालो चामड़ा मे नी फेले अने तीना जागे जेम हतो तेमेत बणीन रेय, अने तीनी चमक कम हय जी हय, ता तीहयु धप जवा ना कारण ह़ुजलु से, पुंजारो तीहया माणेह ने चोखलो ठेरावे; काहाके तीहयो छालो धप जवा ना कारण सी से। 29 कदी काना अदमी नीता बयर ना मुंडा पोर, नीता अदमी नी डाडी मे छालो हय, 30 ता पुंजारो छाला ने भाळे, अने कदी तीहयो चामड़ा नो रोग उंडो देखाय, अने तीनी मे भुरला-भुरला पातळ्‌ळा नीम्‌बाळा हय, ता पुंजारो तीहया माणेह ने वीटळ्‌ळो ठेरावे; तीहयो छालो मतलब मुंडा नो नीता डाडी नो कोड़ रोग से। 31 अने कदी पुंजारो छाला ने देखे के चामड़ा मे घाव उंडो नी हय अने तीनी मे काळ्‌ळा-काळ्‌ळा नीम्‌बाळा नी हय, ता तीहयो चामड़ा ना रोग वाळा ने ह़ात दाड़ा तक अलग करीन राखे, 32 अने ह़ातवा दाड़े पुंजारो दाग ने देखे, ता कदी तीहयो चामड़ा नो रोग फेल्‌लो नी हय, अने तीनी मे भुरला-भुरला नीम्‌बाळा नी हय, अने छालो चामड़ा मे उंडे नी देखाव पड़े, 33 ता आहयो माणेह डाडी ते बोड़े पण जां दाग हय तां नी बोड़वा जोवे; अने पुंजारो तीने अळी ह़ात दाड़ा तक अलग राखे; 34 अने ह़ातवा दाड़े पुंजारो छाला ने देखे, अने कदीम तीहयो छालो चामड़ा मे नी फेल्‌यो हय अने चामड़ा मे उंडे नी देखाय, ता पुंजारो तीहया माणेह ने चोखलो ठेरावे; अने तीहयो आह़फा ना लुगड़ा धोय्‌न चोखलो ठेरे। 35 पण कदी तीने चोखलो ठेरवान बाद चामड़ान रोग वाळा चामड़ा मे कंय बी फेले, 36 ता पुंजारो तीने भाळे, अने कदी तीहयु चामड़ा मे फेल्‌यु हय, ता पुंजारो भुरला नीम्‌बाळा नी ह़ोदे; काहाके तीहयो माणेह वीटळ्‌ळो से। 37 पण कदी तीनी नींगा मे तीहयो घाव जीसम हतो तेमेत हय, अने तीनी मे काळ्‌ळा-काळ्‌ळा नीम्‌बाळा जमला हय, ता तीहयो जाण जाय के रोग वारु हय जेलो से, अने तीहयो माणेह चोखलो से; पुंजारो तीने चोखलो ठेरावे। 38 जत्‌यार काना अदमी नीता बयर ना डील ना चामड़ा पोर धोळ्‌ळो छालो हय। 39 ता पुंजारो देखे, अने कदी चामड़ा पोर दाग कम धोळो हय ता आहयी दादर से जे चामड़ा पोर नीकळी री तीहयो माणेह चोखलो से। 40 अळतेण जीना मुंडा ना नीम्‌बाळा झड़ ज्‌या हय, ता जाणजो के तीहयो भुमळो ते से पण चोखलो से। 41 अने जीना मुंडा ना अगळ वाळा नीम्‌बाळा झड़ जेला हय, ता तीहयो नींडाळा पोर ते भुमळो से पण चोखलो से। 42 पण कदी भुमळा मुंडा पोर नीता भुमळा नींडाळा पोर रात्‌ला नीता धोळ्‌ळा छाला देखाव पड़े, ता आहयु जाणजो के आहयो एक घण-जुदो कोड़ नो रोग से। 43 आनीन करते पुंजारो तीने देखवा जोवे, के कदी मुंडा पोर नीता नींडाळा पोर रात्‌ला नीता धोळ्‌ळा छाला ते नी हय जीसम कोड़ ना रोग मे रेय। 44 ता तीहयु माणेह कुड़ावु से, अने वीटळ्‌ळु से; अने पुंजारो तीने पक्‌को वीटळ्‌ळो ठेराव्‌वा जोवे, काहाके तीना मुंडा पोर रात्‌ला छाला से। 45 जीने बी कुड़ावान रोग हय तीने फाट्‌ला लुगड़ा पेरवा जोवे अने नीम्‌बाळा वेरवायला रेवा जोवे, उपरला होट्‌या तक ढकाय्‌न रेवा जोवे अने वीटळ्‌ळो, वीटळ्‌ळो करीन आड़तो रेवा जोवे। 46 अने जत्‌यार तक कोड़ नो रोग रेय तांह तक तीहयो वीटळ्‌ळो रेय, आनीन करते तीने बीजा गेथो सेटोत एखलोत रेवा जोवे।

बगड़ला लुगड़ा

47 जे बी लुगड़ा मे कोड़ ना रोग ने तेवो छालो हय, भले तीहया हीर ना हय के टेरीकाट ना हय। 48 तीहयो छालो हीर ना नीता टेरीकाट ना लुगड़ा भले बणावलु मे हय के ह़जाड़लु मे हय नीता चामड़ा सी बणली कानी चीज मे हय। 49 कदी आहयो रात्‌ला रंग नो छालो काना लुगड़ा मे हय, नीता चामड़ा मे हय, नीता चामड़ा नी बणली चीज पोर हय, ता आहयु जाणजो के कोड़ रोग नो छालो से अने पुंजारा ने देखाड़वा जोवे। 50 अने पुंजारा ने छाला ने देखवा जोवे, अने ते छाला वाळी चीज ने ह़ात दाड़ा लग सेटी राखवा जोवे। 51 ह़ात दाड़ान बाद तीने अळी भाळवा जोवे, कदीम तीहयो छालो लुगड़ा मे नीता चामड़ा मे नीता चामड़ा नी बणली चीज मे फेल जेलो हय, ता तीहयी चीज वीटळ्‌ळी से। 52 पुंजारो तीहया लुगड़ा ने जे लुगड़ा मे तीहयो छालो हय, भले तीहयु लुगड़ु हीर नु हय, नीता टेरीकाट नु हय, नीता चामड़ा नी चीज हय, तीने धपाड़ देय, काहाके तीहयो छालो गळवा वाळो कोड़ नो से; तीहयी चीज आक्‌ठा मे धपाड़ देवा जोवे। 53 अगर पुंजारो देखे के तीहयो छालो ते लुगड़ा मे, या चामड़ा नी चीज मे नी फेल्‌लो हय 54 ता तीहयी चीज ने जीनी मे छालो हय तीने धोव्‌वा करीन केवा जोवे, ता तीने अळी बी ह़ात दाड़ा लग सेटी राखवा जोवे; 55 अने तीने धोव्‌वान बाद अळी पुंजारा ने देखवा जोवे, ते छाला नो रंग नी बदल्‌यो हय, भले फेल्‌लो नी हय, ता आहयु जाणजो के तीहयु वीटळ्‌ळु से; तीने आक्‌ठा मे धपाड़ देवा जोवे, भले ते छालो अगळ हय के पछळ हय। 56 पण कदी पुंजारो धोव्‌वान बाद देखे ता छाला नी चमक कम हय जी हय, ता तीहयु लुगड़ु ने या चामड़ा मे गेथु फाड़ीन नीकाळे; 57 पण कदी अळी तीहयो छालो बणावला नीता ह़जाड़ला लुगड़ा नीता चामड़ा नी चीज मे देखावा पड़े ता, जाणजो के छालो अळी फेल र्‌यो हय, ता पुंजारा ने तीहयी चीज ने धपाड़ देवा जोवे। 58 कदी तीहयु लुगड़ु ने जीने छालो हय, नीता चामड़ा नी कंय चीज हय तीने जत्‌यार धोय देय अने तीहयो छालो मीट जाय, ता तीने बीजी कावा धोय देय ता तीहयी चोखली ठेरे। 59 हीर नीता टेरीकाट ना लुगड़ा ने नीता कानी चीज ने कोड़ नो छालो हय तीने चोखली अने वीटळ्‌ळी ठेराव्‌वा नो आहयो नेम से।