लेव्‌यवेवस्‌था 16

पछतावा नो दाड़ो

1 जत्‌यार हारुन ना बे सोरा भगवान ना अगळ ह़ाते जाय्‌न मर ज्‌या, तीनी बाद भगवान मुसा ह़ाते वात कर्‌यो; 2 अने भगवान मुसा ने केदो, "तारा भाय हारुन ने की दे के पेटी नी उपर ना पछतावा वाळा ढाकणा अगळ, वचे वाळा पड़दान मोय, चोखला जागा मे हर टेमे मोय जीया नी करे, नीता मर जही; काहाके में पछतावा वाळा ढाकणान उपर वादळा मे देखाव पड़ही। 3 जत्‌यार हारुन चोखला जागा मे जाय ता आहयीत रीते जीया करे, पाप नी बादा ना लेदे एक बोळद्‌यो ने अने होम नी बादा ना लेदे एक गाडरु ने लीन आया करे। 4 तीहयो सुती लुगड़ा नु कुड़तु, अने सुती चड्‌डी पेरीन, अने सुती लुगड़ा नो पट्‌टो अने सुती लुगड़ा नी पागड़ी बांदीन मोय जाय; आहया चोखला लुगड़ा से, अने तीहयो पाणी वेर उंगळीनेत लुगड़ा पेरे। 5 अळतेण तीहयो ईस्‌रायली मंडळीन तां पाप नी बादा ना लेदे बे बोकड़ा अने होम नी बादा ना लेदे एक गाडरु लावे। 6 अने हारुन तीहयु पाप नी बादा नु वाछड़ु ने चड़ाय्‌न आह़फा ना अने आह़फा ना घोराणा ना लेदे पछतावो करे। 7 अने तीहया बेम बोकड़ा ने लीन मेल-मीलाप वाळा तम्‌बु ना झापला पोर भगवान अगळ उबा करे; 8 अने हारुन बेम बोकड़ा पोर चीट्‌ठी नाखे, एक चीट्‌ठी भगवान ना लेदे अने बीजी अजाजेल*16:8 अजाजेल आहयो एक ईब्‌रानी सब्‌द से जीनु मतलब छुट्‌टो छोड़वा वाळो बोकड़ो, से ना लेदे। 9 अने जे बोकड़ा पोर भगवान ना नाम नी चीट्‌ठी नीकळहे, तीने हारुन पाप नी बादा मे चड़ावहे; 10 पण जे बोकड़ा पोर अजाजेल ना नाम नी चीट्‌ठी नीकळे तीने भगवान ना अगळ जीवत्‌लो उबो करे के तीनी सी पछतावो हये, अने तीने अजाजेल ना लेदे जंगल मे छोड़ देय। 11 हारुन तीहयु पाप नी बादा नु वाछड़ु ने चड़ावीन आह़फा ना घोरल्‌या ना लेदे पछतावो करे। 12 अने जे वेदी भगवान अगळ से तीनी पोर ना धपत्‌ला कोयला सी भरलु धुपदान लीन, अने आह़फा नी बेम मुठ ने कुटला गंदायण्‌या धुप सी भरीन, वचे वाळा पड़दान मोय ली आवे, 13 तीहया धुप ने भगवान ना अगळ आक्‌ठा मे नाखे, जीनी सी धुप नो धुकरो गवा नी चीट्‌ठी ना पछतावा ना ढाकणान उपर छवाय जाय, नी ता तीहयो मर जहे; 14 तत्‌यार तीहयो वाछड़ु नु लोय मे गेथु थोड़ुक ने पछतावा ना जागा पोर छीटे, अने अळतेण तीहयु लोय मे गेथु थोड़ुक पछतावा ना जागा अगळ आंगळी सी ह़ात कावा छीटे। 15 अळी तीहयो माणहु ना लेदे पाप नी बादा नो बोकड़ो मारीन तीनु लोय ने वचे वाळा पड़दा ना मोय ली आवे, अने जे रीते वाछड़ा ना लोय सी तीहयो करलो हतो तेमेत तीहयो बोकड़ा ना लोय सी बी करे मतलब तीने पछतावा ना ढाकणा पोर अने तीनी सामने छीटे। 16 अने तीहयो ईस्‌रायली माणहु नी भाती-भाती नी वीटळ, अने गुना अने तीमना आखा पापु ना कारण चोखला जागा ना लेदे पछतावो करे; अने मेल-मीलाप वाळा तम्‌बु जे तीमनी ह़ाते भात-भाती नी वीटळ ना वचे रेय तीनी लेदे बी तीहयो तेमेत करे। 17 जत्‌यार हारुन पछतावो करवा ना लेदे चोखला जागा मे जाय, ता जत्‌यार तक तीहयो आह़फा अने आह़फा ना घोराणा अने ईस्‌रायल नी आखी मंडळी ना लेदे पछतावो करीन बारो नी आवती रेय तत्‌यार तक कोय बी माणेह मेल-मीलाप वाळा तम्‌बु मे नी रेय। 18 तीहयो अळी नीकळीन तीहयी वेदीन्‌तां जाय जे यहोवा अगळ से अने तीमनी लेदे पछतावो करे, मतलब वाछड़ु नु लोय अने बोकड़ा नु लोय बेम मे गेथु थोड़ुक लीन तीहयी वेदी ना च्‌यारोव खुणा ना ह़ींगड़ा पोर लगाड़े। 19 अने तीहयु लोय मे गेथु थोड़ुक आह़फा नी आंगळी नी लारे ह़ात कावा तीनी पोर छाटीन तीने ईस्‌रायली माणहु ने भात-भातीन वीटळ सी छोड़ाय्‌न चोखला करे।

पछतावा नो बोकड़ो

20 "जत्‌यार हारुन चोखला जागा नी लेदे अने मेल-मीलाप वाळा तम्‌बु अने वेदी नी लेदे पछतावो कर लेय, ता जीवत्‌ला बोकड़ा ने अगळ ली आवे; 21 अने हारुन आह़फा ना बेम हात ने जीवत्‌ला बोकड़ा पोर मेकीन ईस्‌रायली माणहु ना आखा अधरम ना कामु, अने तीमना आखा गुना, मतलब तीमना आखा पापु ने माने, अने तीमने बोकड़ा ना मुंडा पोर मेकीन तीने काना माणेह ना हात सी जे आहया काम ना लेदे तीयार हय उजाड़ी बड़ा मे मोकलीन छोड़ाय देजो। 22 तीहयो बोकड़ो तीमना आखा अधरम ना कामु नो भार आह़फा उपर लीन काना उजाड़ी बड़ा मे उचलीन ली जहे; आनी लेदे तीहयो माणेह ते बोकड़ा ने उजाड़ी बड़ा मे छोड़ देय। 23 ता हारुन मेल-मीलाप वाळा तम्‌बु मे आवे, अने जे सुती लुगड़ा पेरीन तीहयो चोखला जागा मे जेलो हतो तीमने नीकाळीन तांत मेक देय। 24 अळतेण तीहयो काना चोखला जागा मे पाणी वेर उंगळीन आह़फा ना लुगड़ा पेर लेय, अने बारो जाय्‌न आह़फा नी होम नी बादा अने माणहु ना लेदे होम नी बादा चड़ाय्‌न आह़फा ना माणहु जुगु पछतावो कर। 25 अने तीहयो पाप नी बादा नी चरबी ने वेदी पोर धपाड़े। 26 अने जे माणेह बोकड़ा ने अजाजेल ने तां बोकड़ो मेकीन आवे तीहयो बी आह़फा ना लुगड़ा धोवे अने पाणी वेर उंगळे, अळतेण तीहयो डेरा मे जवा जोवे। 27 अने पाप नी बादा नु वाछड़ु अने पाप नी बादा नो बोकड़ो बी जीमनु लोय चोखला जागा मे पछतावो करवा नी लेदे ली जाय तीहया बेम डेरा गेथा बारा लावे; अने तीमनु चामड़ु, माह, अने छाण आक्‌ठु मे धपाड़ देय। 28 अने जे तीमने धपाड़े तीहयो आह़फा ना लुगड़ा ने धोवे, अने पाणी वेर उंगळे, अने अळतेण तीहयो डेरा मे जवा जोवे।

पछतावा नो दाड़ो मानवा

29 "तमारी लेदे आहयी सदा नी रीती रेहे के ह़ातवा मयना ना दहवा दाड़े तमु आह़फा ने उपाह रीन दुख देजो, अने तीहया दाड़े कोय बी काम, तीहयु तमारा देस नो हय, नीता तमारी वचमे रेण्‌यो बीजा देस वाळो हय, कोय बी कानी बी भाती नु काम-काज नी करे; 30 काहाके तीहया दाड़े तमने चोखला करवा ना लेदे तमारी जुगु पछतावो करहे; अने तमु आह़फाम ना आखा पापु सी यहोवा अगळ चोखला ठेरहु। 31 आहयो तमारी लेदे आखा मे अराम नो दाड़ो ठेरे, अने तमु तीहया दाड़े उपाह राखीन जीव ने दुख देजो; आहयी सदा नी रीती से। 32 अने जीने आह़फा ना बाह ना जागा पोर पुंजारो बणाव्‌वा ना लेदे अभीसेक करे तीहयो पुंजारो पछतावो कर्‌या करे, तीहयो चोखला सुती लुगड़ा पेरीन, 33 तीहयो चोखला जागा लेदे, अने मेल-मीलाप वाळा तम्‌बु, अने वेदी ना लेदे पछतावो करे; अने पुंजारा ना अने मंडळी ना आखा माणहु जुगु बी पछतावो करे। 34 अने आहयी तमारी लेदे सदा नी रीती रेहे के ईस्‌रायली माणहु ना लेदे हर साल एक कावा तमारा आखा पापु ना लेदे पछतावो करे।" यहोवा ना आहया हुकम ना लारे जे तीहयो मुसा ने आपलो हतो हारुन बी कर्‌यो।