Levítico 5

पाप नी बादा ना कारण

1 कदी कानो माणेह गवा हय्‌न आसम पाप करे के ह़ाम खवाड़ीन पुछवा पोर बी के ह़ु तु आहयु ह़मळ्‌ळो या ह़ु तु आहयु जाणे? अने तीहयो वात नी देखाड़े, ता तीने आह़फा नी गलती नो भार झेलवा पड़हे। 2 कदी कोय वीटळ्‌ळी चीज ने नी जाणे अने छीम लेय, ता चाहे तीहयो वीटळ्‌ळा जंगली जानवर नु, नीता वीटळ्‌ळा पाळ्‌ळा जानवर नु, नीता भले वीटळ्‌ळा घीहाय्‌न चालवा वाळा जीव-जन्‌तु नु धोड़ हय, ता तीहयो वीटळ्‌ळो हय्‌न गुनाळ्‌ळो ठेरहे। 3 कदी कोय माणेह वीटळ्‌ळी चीज ने नी जाणे ने छीम लेय, भले तीहयी वीटळ्‌ळी चीज कानी बी भाती नी काहा नी हय जीनी सी माणहु वीटळ्‌ळी जाय, ता जत्‌यार तीहयो ते वात ने जाण लेहे ता तीहयो गुनाळ्‌ळो ठेरहे। 4 कदी कानो बुरु-भलु करवा सोच्‌या-ह़मज्‌या वगर ह़ाम खाय, चाहे कानी भातीन वात सोच्‌या-ह़मज्‌या वगर ह़ाम खाय्‌न केय, ता आसवी वात मे तीहयो गुनाळ्‌ळो तीहयी टेमे ठेरहे जत्‌यार तीने मालम हय जहे। 5 अने जत्‌यार तीहयो आहयी वातु मे कानी बी वात मे गुनाळ्‌ळो हय, ता जीना बारा मे तीहयो पाप कर्‌यो हय तीहयो तीने मान लेय, 6 जे पाप तीहयो कर्‌यो, तीना कारण सी तीहयो भगवान अगळ आह़फा ना गुना नी बादा लावे, अने पाप नी बादा ना लेदे गाडरु नीता बोकड़ी ली आवे; ता पुंजारो तीना पाप ना बारा मे तीनी लेदे पछतावो करे। 7 पण कदी तीहयो गाडरु नीता बोकड़ी ने नी चड़ाय सके, ता आह़फा ना पाप ना कारण बे हुला नीता पारवा ना बे बच्‌चा गुना नी बादा चड़ाव्‌वा ना लेदे भगवान्‌तां लावे, तीनी मे गेथु एक पाप नी बादा ना लेदे अने एक होम नी बादा ना लेदे। 8 तीहयो तीमने पुंजारान्‌तां लावे, अने पुंजारो पाप नी बादा ने पेले चड़ावे, अने तीनु मुंडु गळा मे गेथु चमळ देय, पण अलग नी करे, 9 अने तीहयो पाप नी बादा ना जानवर नु लोय ने वेदी ना धेड़े छीड़के, अने जे लोय बच जाय तीहयु वेदी ना पाञा पोर नाखे; तीहयु पाप नी बादा ठेरहे। 10 ता बीजा चड़ा ने तीहयी रीती ना लारे होम नी बादा चड़ावे, अने पुंजारो तीना पाप ना लेदे पछतावो करे, अने ता तीहया पाप माफ कर देहे। 11 "पण कदी तीहयो बे हुला नीता बे पारवा ना बच्‌चा बी नी आप सके, ता तीहयो आह़फा ना पाप ना कारण एक कीलो मयदो पाप नी बादा ना रुप मे लावे; तीनी पोर तीहयो तेल नी नाखे, अने नी लोबान मेके, काहाके आहयी पाप नी बादा से। 12 तीहयो तीने भगवान ने तां लावे, अने पुंजारो तीनी मे गेथु आह़फा नी मुठ भरीन फोम कराव्‌वा वाळो वाटो जाणीन वेदी पोर भगवान नी वेदी ना आक्‌ठा मे धपाड़े; तीहयी पाप नी बादा ठेरहे। 13 अने आहयी वातु मे कानी बी वात ना बारा मे जे कोय पाप करे, पुंजारो तीनो पछतावो करे, अने ता तीहया पाप माफ हय जहे। अने आहयी पाप नी बादा नु बचलु अन नी बादा नु बचलु ह़मान ने तेम पुंजारा नु रेहे।"

गुना नी बादा नी रीती

14 अळी भगवान मुसा ने केदो, 15 कदी कानो भगवान नी चोखी करली चीज ना बारा मे भुल सी धोको करे अने पापी ठेरे, ता तीहयो भगवान ने तां एक खामी वगर नु गाडरु गुना नी बादा ना लेदे लावे; तीनी कीमत चोखला जागा ना तोल ना लारे चांदी ना सीक्‌का मे पुंजारो पक्‌कु करहे। 16 अने जे चोखली भेट ना बारा पाप कर्‌यो हय, तीनी तीहयो अळी पांचवो वाटो बड़ाय्‌न पुंजारा ने आपे; अने पुंजारो गुना नी बादा नु गाडरु ने चड़ाय्‌न तीनी लेदे पछतावो करे, ता तीनो पाप माफ कर देहे। 17 कदी कानो एवो पाप करे जे काम करवा भगवान मना करलो हय तीने करे, ता भले तीहयो अंजाण्‌या मे कर्‌यो हय ते बी तीहयो गुनाळ्‌ळो ठेरहे, अने तीने आह़फा ना पाप नो फोळ जड़हे। 18 आनी लेदे तीहयो खामी वगर नु गाडरु पुंजारान्‌तां लावे, तीहयु तेतरीत कीमत नु रेवा जोवे जेतरा पुंजारो ठेरावलो हय, अने पुंजारो तीनी भुल जुगु पछतावो करे, अने तीने माफी जड़ जहे। 19 आहयी गुना नी बादा से। तीहयो माणेह पक्‌को भगवान नी अगळ गुनाळ्‌ळो ठेरहे।