मरकुस 7

वण-भरह्‌याण बयर नो भरहो

24 अळतेण ईसु गन्‌नेसरत ह़ेर मे गेथो सुर अने सेदा देस ज्‌यो; अने तां एक घोर मे ज्‌यो, अने मने कोय नी जाणवा जोवे, ईसम चाहतो हतो, पण तीहयो ह़ताय नी सक्‌यो। 25 अने तत्‌यारुत तां ह़रकी एक बयर, ईसु आय र्‌यो करीन ह़मळीन आयी, तीनी सोरी ने वीटळ्‌ळो भुत लागलो हतो, अने तीहयी ईसु ना पोगु पोर पड़ी। 26 आहयी बयर युनानी बोली बोलण्‌यान हती अने तीहयी सीरीया देस ना फीनीकी जीला मे पयदा हयली हती। अने तीहयी रावण्‌या करीन ईसु पांह आहयी वीन्‌ती करी "भुत ने मारी सोरी मे गेथो नीकाळ दे।" 27 पण ईसु दाखलान लारे तीने केदो, "पेले सोरा ने खाय्‌न आफरवा दे, काहाके सोरा नु खाणु कुतरा अगळ नाखवा वारु नी हय।"

28 तीहयी बयर बी तीने दाखला मे एक कड़ी जोड़ीन जपाप आपी, "ह़ाचली वात से मालीक, पण ते बी कुतरा सोरा ना एठला रोट्‌ला ना टुकड़ा ने खाय लेय।"

29 अने ईसु तीने केदो, "तु आहयी वात केदी एतरे आराम सी जा, भुत तारी सोरी मे गेथो नीकळी जेलो से।"

30 अने तीहयी तां गेथी आह़फी ना घोर आवीन देखी ता तीने मालम पड़्‌यु के भुत तीनी सोरी मे गेथो नीकळी जेलो हयलो, अने तीनी सोरी वारु हय्‌न खाटला पोर ह़ुय रेली।