अदीकार्या ना हुकम मानो
1 हरेक माणेह अदीकार्या ना हक मे रेवा जोवे, काहाके कानो बी हक आसम नी हय के तीने भगवान नी बणायो; अने जे बी हक से, तीमने भगवान ठेरावलो से। 2 आनीन करते जे कोय हक नो वीरोद करे तीहयो भगवान नी रीती नो वीरोद करे, अने वीरोद करन्या ने डंड जड़हे। 3 काहाके राजा वारला काम ना करते नी, पण बुरा काम ना लेदे बीक नो कारण से, कदी तु अदीकारी सी बीहवा नी चाहतो हय, ता वारला काम कर, अने तीनी भणी गेथी तारी बड़ाय हयहे। 4 काहाके तीहया तारी भलाय ना लेदे भगवान नो चाकर्यो से। पण कदी तु बुराय करे ता बीह, काहाके तीहया तलवार फालतु नी ली र्या; अने भगवान ना चाकर्या से के तीनी रीह ना अनसारे बुरु काम करवा वाळा ने डंड आपे। 5 आहयात कारण सी तमने अने आमु ने अदीकार्या ना हुकम मानवा जोवे। भगवान ना डंड ना कारण सी नी पण अमारा मन ना कारण सी।
6 13:6 मत्ती 22:21; मरकुस 12:17; लुका 20:25 आनी लेदे फाळो बी आपो काहाके राज करवा वाळा भगवान ना चाकर्या से, अने सदा आहयात काम मे लागला रेय। 7 आनी लेदे हरेक जणा नो हक आप दीया करो; जीने फाळो जोवे तीने फाळो आपो; जीने पय्हा जोवे तीने पय्हा आपो; जीनी ईज्जत करवा जोवे तीनी ईज्जत करो।
एक-बीजा ना लेदे मोंग
8 एक-बीजा सी मोंग ने सोड़ीन कानी बीजी वात मे करजाळ्ळा ना हयो; काहाके जे बीजा मोंग करे तीनी सी नेम नो पाळण करलो से। 9 आहयु के "छीनाळु नी करजे, हत्या नी करजे, चोरी नी करजे, लालच नी करजे" अने आमने सोड़ीन अळी कानो बी हुकम हय ता आखा हुकम नु मतलब आञे देखाड़े, के "आपणा ह़ाते वाळा सी आपणीन तेम मोंग कर।" 10 मोंग ह़ाते वाळा नी बुराय नी करे, मोंग करवा आहयु नेम ने पाळण करनु से।
11 टेम ने ओळखीन आसमेत करो, आनीन लेदे के हाव तमने नींदर मे गेथा जाग उठवा नी घड़ी आय जेली से; काहाके जे टेमे आमु भरहो करला हता, तीहयी टेमे ना वीच्यार सी हाव अमारो छुटकारो ह़ाते से। 12 रात घणी हय जेली से, अने दाहड़ु उगवा मे से; आनी लेदे आमु अंदारला ना कामु ने सोड़ीन वीजाळा ना हत्यार बांद लीया। 13 जीसम दीहु ह़ोबा देय, तेमेत आपणु ने ह़ुदी चाल चालवा जोवे, नी बेमान्या अने दारकुट्या, नी छीनाळ्या अने नी लुच्चा, अने नी झगड़्या अने नी खीजर्या। 14 पण मालीक ईसु मसी ने पेर लेवो, अने डील नी लालच ने पुरी करवा नो जुगाड़ ना करो।