1 आनीन करते आमु ह़ु कीये के अमारा आहयी कळी ना बाह अब्‌राहम ने ह़ु जड़्‌यु। 2 काहाके अब्‌राहम ने काम ना लारे धरमी ठेरावे, ता तीने घमंड करवा नी जागा रेती, पण भगवान ना ह़ाते नी। 3 ✝चोखली सास्‌तर मे लीखलु से, के "अब्‌राहम भगवान पोर भरहो कर्‌यो, अने आहयु तीना लेदे धारमीक गणाय ज्‌यु।" 4 काम करन्‌या ने दाड़की आपवा दान नी हय, पण हक ह़मजवा जोवे। 5 पण जे काम नी करतो हय, वण-भक्‌ती करन्‌या ने धरमी ठेरावण्‌या पोर भरहो करतो हय, तीनो भरहो तीनी लेदे धारमीक्‌ता गीणायहे। 6 जीने भगवान बीना काम सी धरमी ठेरावे, तीने दावुद बी वारु से केय:

7 "जुगाळा से तीहया जीमना अधरम माफ हया,

अने जीमना पाप ढाक देदा।

8 जुगाळो से तीहयो माणेह जीने भगवान पापी नी ठेरावे!"

9 ता तीहयो वारलो बोल, खतना करला तीमनी जुगु एतरोत से, के बीना खतना वाळा जुगु बी से? आमु आहयु कीया, "अब्‌राहम ना लेदे तीनो भरहो धरमी गणायो।" 10 ता तीहयो कीसम गीनती मे लाग्‌यो? खतना नी दसा मे के बीना खतना नी दसा मे? खतना नी दसा मे नी पण बीना खतना नी दसा मे। 11 अने तीने खतना नी सेलाणी जड़ी के तीहया भरहा नी धारमीक्‌ता पोर छाप लाग जाय जे तीहयो बीना खतना नी हालत मे हतो, जीनी सी तीहयो तीमनो आखा नो बाह ठेरे जे बीना खतना नी हालत मे भरहो करे तीहयो बी धरमी ठेरे; 12 अने तीहयो खतना करला नो बाह हय; जे नीस्‌ता खतना करला से, पण अमारा बाह अब्‌राहम ना तीहया भरहा ना सोभाव पोर बी चाल्‌या, जे तीहयो बीना खतना नी हालत मे बी करलो हतो। 13 ✝काहाके आहयो वायदो के तीहयो कळी नो वारीस हयहे, नी अब्‌राहम ने, नी तीना पीड़ी ने कायदा ना लारे आप्‌ली हती, पण भरहा नी धरमपण ना लारे जड़ी।

14 ✝काहाके कदी कायदा वाळा वारीस हय ता, भरहो फालतु अने वायदो अमथो हय ज्‌यो। 15 कायदा ते रीह उबजाड़े, अने जां कायदा नी हय हाही बी नी।

16 ✝एतरे वायदो भरहा पोर अने दया पोर टेकलो से, आनीन करते के तीहयो तीनी अवल्‌यात जुगु पक्‌को हय जाय तेम। तीमनी जुगु एतरुत नी जे कायदा पाळन्‌या से, पण तीमनी जुगु बी से, जे अब्‌राहम नी तेम भरहो करे। अब्‌राहम अमारो आखा नो बाह से। 17 जेम के लीखलु से, "मे तने घणा ढेरका मुलक नो बाह ठेरावलो से।" भगवान नी नींगा मे अब्‌राहम अमारो बाह से। अब्‌राहम भगवान पोर भरहो कर्‌यो, जे भगवान मरला ने जीवाड़े अने जे हय नी तीमने बी घड़ीन उबजाड़े। 18 अब्‌राहम ह़ोह़वाय ना दाड़ा मे बी आह राखीन भरहो कर्‌यो अने तीहयो घणा ढेरका मुलक नो बाह बण ज्‌यो, जेम तीने केदलु हतु के तारी गणाये नी एतरी अवल्‌यात हयहे। 19 अब्‌राहम नी उमर एक ह़ो साल नी हती, पण भरहो तीना डील ने तेम कमजोर नी हयो जीसम तीहयो डायो हय जेलो, अने सच्‌चाय ते आहयी से सारा वांजाण हती अने डाहली हय जेली, तीहयी सोरा पयदा नी कर सक्‌ती हती। 20 अने तीहयो भगवान ना वायदा पोर सण्‌का नी कर्‌यो, बाखीन भरहा मे वातड़ो रीन भगवान नी बड़ाय कर्‌यो। 21 तीने पक्‌को भरहो हतो के भगवान जे वात नो वायदो करलो से, तीहयो तीने पुरो करीन सोड़हे। 22 आनीत लेदे भगवान अब्‌राहम ने तीना भरहा नी लारे धरमी गणायो। 23 अने आहयो बोल, "भरहा ना लेदे धरमी गणाय ज्‌यो" तीनी लेदे एतरुत नी लीख्‌या। 24 पण आपणी जुगु बी लीखलो से। आपणु बी भरहा नी करते धरमी गणायहु। काहाके आपणु तीहया भगवान पोर भरहो करया, जे मालीक ईसु ने मर्‌या-ह़र्‌या मे गेथो जीवाड़लो से। 25 हीय्‌योत ईसु आपणा पाप गुना नी करते मरवा करीन धराय ज्‌यो, अने आपणु ने धरमी बणाव्‌वा करीन मर्‌या-ह़र्‌या मे गेथो जीवतो हय्‌न बठो नी हय ज्‌यो।