Daniel 1

चार जुवान मानूस नबुदकनेसर को राजसभा मा

1 यहूदा परदेस को राजा यहोयाकीम को राज्य को तीसरो बरस मा बेबीलोन को राजा नबूकदनेस्सर ना यरूसलेम पर चघाई कर केन उनला घेर लियो।✝1:1 2 राजा 24:1; 2 इतिहास 36:5-7 2 तबा यहोवा परमेस्वर ना यहोयाकीम ला धरन अना मन्दीर को काही खजानो ला जपत करन दियो, अखीन राजा काही यहूदा कयदी गिनला आपरो संग सीनार बेबिलोन मा आपरो देव गिनको मन्दीर मा ले गयो , अना धरयो गयो खजाना ला मंदीर को भन्डार घर मा ठेव दियो। 3 तबा वोना राजा ना अपरो मुख अधिकारी असपनज ला हुकुम दियो, "जाओ अना इसराइली राज को राजा को खानदान मा लक अना उच्चो खानदान को लोक गिनमा लक बन्दी कियो गयो जुवान गिनला आनो। ✝1:3 2 राजा 20:17 4 वय जुवान होवनो पाहिजे उनमा कोनी परकार को तन लक तगड़ो होवनो पाहिजे वय चोवनो मा खोपसुरत अना सप्पा परकार लक डिमाकदार होवनो पाहिजे। वय गियान अना समज लक भरयो अना बिदवान, सीकन मा लहाकी करन वालो, राजा को राजभवन मा सेवा करनो काबील होवनो पाहिजे, असपनज बेबीलोनिया भासा अना सास्तर को गियान देय। अखीन भासा सिकावने।"

5 राजा ना हुकुम दियो का इसराइली लोख को उन जुवान गिन ला राजकीय जेवन दियो जाय अना अंगूर रस उनला पिवायो जाहे। एकोलाय इनला तीन बरस तकन सिकायो जाहे। एना बेरा को बाद वय राजा नबूकदनेस्‍सर को सेवा मा हाजीर कियो जाय।

6 उनमा लक निवाड़ो गयो, दानिय्येल, हनन्‍याह, मीसाएल अना अजरयाह। नाम को यहूदी होतीन। 7 परमुख अधिकारी असपनज ना उनला नवो नाव दियो। वोना दानिय्येल को नाव बेलतसस्‍सर, हनन्‍याह को सदरक, मीसाएल को मेसक अना अजरयाह को अबेदनगो नाव रख्यो।

8 पर दानिय्येल ना आपरो हिरदय मा असो पक्को कियो का वय ना राजा को जेवन खाहेत अना ना वोको अंगूर रस ला पीहे जोन राजा पिवसे, अखिन आपरो ला अपवितर नही करहे। एकोलाय वोना परमुख अधिकारी लक अरज करयो, "तुम्हि मोला आपरो महाराज को हुकुम लक सुटकारा देव जेनलक मी अपवितर नोको भयि जाऊ।"

9 परमेस्वर ना परमुख अधिकारी को हिरदय मा दानिय्येल को लाय दया पयदा कियो।✝1:9 पैदाइस 39:21 10 पर परमुख अधिकारी ना दानिय्येल लक कह्यो, "मोला यो गोस्टि को भेव से का अदि तुम्हि मोरो महाराज को कन लक पक्को कियो गयो जेवन नहि करहो ता तुम्हि लोग आपरो संगि गिन लक बेजा कमजोर होय जाहो। जबा मोरो मालिक तुमरो टोन्ड ला उतरयो चोयहे, तबा तुम्हि मोरो जान ला सकंट मा डाकहो। महाराज मोरी डोस्की ला धड़ लक बेगरो कर देंहे।" 11 तब दानिय्येल ना वोना देखरेख करन वालो अधिकारी ला जोनला दानिएल, हनन्‍याह, मीसाएल अना अजरयाह को देखरेख करन वालो ठयरायो गयो होतो वोला लक कह्यो, 12 "मी तुम्हि लक बिनती करासू का आपरो इन सेवक गिन ला जाच को लाय दहा दिवस तकन जेवन मा साग-भाजी अना पीवन को लई पानी देव। 13 तबा तुम्हि आमरो टोन्ड ला महाराज को कन लक दियो गयो जेवन जेयो मानूस गिनको टोन्ड को बरोबरी करने, तबा तुम्हिला जसो साजरो चोये वसो बरताव अमी सेवक गिनको संग करने।"

14 तबा वोना उनको यो बिनती मान लियो अना दहा दिवस तकन उनको संग वसोच करके चोयो, 15 का दहा दिवस को बादमा दानिएल अना वोका संगी गिनको टोन्ड राजा को राजकीय जेवन करन वालो मानूस गिन लक बेजा साजरो अना चिकनो अना तनदुरुस्त चोयो।

16 तबा मुखिया उनको देखरेख करन वालो भंडारी ना राजा को कन लक पिक्को कियो गयो अंगूर को रस अना जेवन ला देवनो बन्‍द कर दियो अना वोको जघा मा वय उनला साग-भाजी देवन लगयो।

17 परमेस्वर ना योच चारी इसरायली जुवान गिनला सबच पिरकार को सास्तर अना सबच पिरकार को गियान मा समज को लाय अक्कल ला दियो। दानिय्येल सबच पिरकार को दिव्य-सपना अना वोको अरथ ला समजन अना लिखन लगयो, अना वोमा गियानी भयी गयो। यो समज आय गयी।✝1:17 पैदाइस 41:12 18 तब तीन साल बीतन को बाद जोन नबूकदनेस्सर राजा ना जुवान लोख लक मिलन को बेरा ठयरायो होतो उतरो दिवस बीतन को बाद जुवान गीनला राजा को पूढा मुखीया अधिकारी ना हाजीर कियो। 19 राजा उन लक गोस्टि करन लगयो, अखीन दानिय्येल, हनन्‍याह, मीसाएल अना अजरयाह को बरोबरी कोनी नही होतीन यो काजी वोय राजा को सेवा को लाय राज दरबार मा निवाड़ो गयो।

20 अक्कल अना हरेक परकार को समज को बारे मा जोन काहि राजा उनको लक पूसत होतो, वो मा लक उन राज भर का सबच ज्‍योतिसी गिन अखिन तांतरिक गिन लक दहा गुना जादा साजरो ठयरत होतो। ✝1:20 1 राजा 10:3-4

21 दानिय्येल साही दरबार मा जब तकन फारस को समराट राजा कुस्रू*1:21 साइरस को राज करन को पहेले तकन रह्यो।