1 एक बेरा होतो जब तुमी लोक उन गुनाह हुन अना पापहुन को काजी आत्मिक रूप लक मरया हुयो होता। 2 जोन मा तुमी पयले ऐना संसार की बुरी रिती पर चलत हुयो अना ओनो आतमा को पिछा करत हुयो जीवत होता जो ऐना धरती को वरता की आत्मिक सक्तिहुन को मालिक सेत। वा आतमा अब उन मानुसहुन मा काम कर रही सेजोन परमेस्वर की हुकूम नही मानासेत। 3 उनमा आमी भी पयले आपरो देह की मोह मा दिवस बितात होता, देह अना मन को मरजी ला पूरो करत होता, अना अखीन संसार को दुसरो लोकगीन को जसो बरताव लक परमेस्वर को गुस्सा की लेकरा होता।

4 पर परमेस्वर जोन दया को धनी से, आपरो ओना मोठो माया को कारन जेना ओना आमी लक माया राखिसेस। 5 ओनो बेरा जबकि आमी आपरो पापहुन को काजी आमी आत्मिक रूप लक अबा मरया हुया होता ओना आमीला मसीह को संग-संग ओना हमला भी जिंदगी देईसेस, परमेस्वर को किरपा लक तुमरो सूटकारा भयीसे।

6 काहेकि आमी यीसु मसीह मा सेजन एकोलाई परमेस्वर ना हमला मसीह कोसंग च मंग लक जित्तो उचलीस अना ओको संगा च सरग को सिहासन पर बसाईस। 7 ताकि उ आवन वालो हर युग मा आपरो दया को साजरो धनला दिसाये जेनला ओना मसीह यीसु मा आपरी दया को रूप मा आमी पर चिन्हित करीसेत। 8 परमेस्वर को दया कन लक आपरो भरोसा को काजी तुमरो सूटकारा भयीसे। योयो तुमला तुमरी कन लक नही मिलीसे, पर यो ता परमेस्वर को दियो हुयो दान से। 9 अखिन नाता करम लक असो ना होय का कोनी गरब करयेत। 10 काहेकि परमेस्वर हमरो बनावन वालो से। ओना मसीह यीसु मा हमारो बनावनो एकोलाई करीस सेस हमि भलो काम करबीन जिनला परमेस्वर ना पयले लक च एकोलाई तैयार करीसे का उनला करतो हुयो आपरो जिंदगी बिताबिन।

11 एकोलाई तुमी हेत राखो वय लोक जोन आपरो तन मा मानूस को हात लक कियो हुयो खतना को काजी आपरो आपला "खतना करयो वालो" सांगासेत, विधरमी को रूप मा जन्मो तुमी लोकहुन ला "खतना को बिना" कव्हत होतीन। 12 ओनो बेरा तुमी बिना मसीह को होतत, तुमी इसरायल को पंगत लक बाहेर होतीन। परमेस्वर ना आपरो भविस्यवक्ता गीनला जोन वचन देयि होतीस उन पर आधार पर वायदा से अनजान होतो। अना ऐना संसार मा बिना परमेस्वर को निरासा मा जिंदगी जिवत होता। 13 पर तुम जोन पयले परमेस्वर मा दुहुर रव्हत होता अना अबा मसीह यीसु को बलिदान को कन लक तुमी जवर आई गया सेव। 14 यहुदी अना गैरयहुदी बीच मा एक दुसरो लक नफरत करत होतीन अना बेगरो भय गयी होतीन। बेस असो जसो उन को बीच कोनी भीत उभी होय गयी होय। लेकिन मसीह ना खुदच आपरी तन को बलिदान देय के नफरत की ओनो भीत ला गिराय देइस अना मेल कर दियो। 15 अना आपरो देह मा गुस्सा मजे, मोसे को नियम ला जोन हुकूम नियम गिरंथको सहारा पर होतीन, मिटाय देइसेस, की दुही ला आपरो मा एक नवो मानूस बनायके मेल कराय देइसेस। 16 अना कूरूस मा गुस्सा ला निपटाय करके दुही ला एक देह बनायके परमेस्वर लक मेल कराइसेस। 17 ओना आयके तुमला जो दुहुर होता अना उनला भी जोन जवर होतीन; मेल मिलाप को साजरो बारता ला आयकवाइसेस। 18 काहेकि यीसु मसीह को कन लक यहुदी अना गैरयहुदी दुही एकच आतमा लक परमेस्वर बाबुजी को जवर धाड़ियो गयो।

19 अब एको कन लक ना ता तुम्ही अनजान रहयो अना ना च परायो रहयो पर अब त तुमी संत मानूस हुन को संगा परमेस्वर को देस का संगी साथी भय गया सेव। 20 तुमी एक असा घर सेव जोन पेरीतहुन अना भविस्यवक्ता हुन को नीव पर उभो से, अना खुदच मसीह यीसु जेनको लगत महत्तम को कोनटा को गोटा से। 21 जोको लक सप्पा बनयो हुयो काम एक सँगा मिलके पिरभु मा एक पवीतर मंदिर बनतो जावसे, 22 जोन मा तुम आतमा लक परमेस्वर को रव्हन वालो जघा होवन साठी एक सँग बनाया जावोसो।