मरकुस 8

चार हजार लोक गीनला जेवानो

1 ओनो दिवस मा जबा मोठी भीड़ एकठ्ठी भई अना उनको कठा काही जेवन ला नही होतो। तबा ओना आपरो चेला इन ला जवर बुलायके, उनला साँगीस। 2 "मोला यो भीड़ ला चोवके तरस आवासे, काहेका अज तीन दिवस भयो, मोरो संग सेत, उनको कठा जेवन लाय काही नहात। 3 अदी मि इनला भुखो घर धाड़ूसु, तबा यो रस्ता मा बेहोस भय जाहेत, उनमा लक लगत लोक बेजा दुहुर लक आई होतीन। "

4 यीसु को चेला गीन वोला जवाब देईन। "यो सुनसान जघा मा एतरो जेवन कहान मिलहेत?"

5 यीसु ना उनलक कव्हयो, "तुमरो जवर केतरी जेवन सेत?"

उनना जवाब देईन सात भाकर!

6 तबा ओना जनता ला जमीन मा बसन लाय कहीस, यीसु ना सात भाकर धरके परमेस्वर ला धन्यवाद देइस। अना भाकर को टुकड़ा करके चेला गीन ला देइस, तबा वय उनला परसन लगीन। 7 उनको कठा काही लहान-लहान मसरी होतीन, वोला वसोच परमेस्वर ला धन्य वाद देके, उनला परसन ला कहीस। 8 तबा वय लोक जेयके अघाय गईन, अना चेला गीन बचयो सात टोपली भरके उचलीन। 9 अना लोक चार हजार को करीब मा होतीन। तबा उनला वोना सार करीस।