1 Zako vreme kad o sudije vladinde ulo baro bokhalipe ani phuv Juda. Jekh manuš taro Vitlejem, savoi ani Juda, dželo pla romnjaja hem ple duje čhavencar te živini sar abanđija ani phuv Moav. 2 Adale manušesoro anav inele Elimeleh, lesere romnjakoro anav inele Nojemina, a o anava lesere duje čhavengoro inele Mahlon hem Kilion. On inele Efratovci taro Vitlejem ani Juda hem džele ani phuv Moav hem adari lelje te živinen.

3 E Nojeminakoro rom o Elimeleh mulo, pa oj ačhili ple duje čhavencar. 4 On leljefse romnjen Moavken, jekh olendar vičinđa pe Orpa, a i dujto Ruta. Kad adari živinde deš berš, 5 mule hem o Mahlon hem o Kilion. Ađahar i Nojemina ačhili hem bizo čhave hem bizo rom.

6 I Nojemina ano Moav šunđa da o GOSPOD lelja te pomožini ple narodose hem da dinđa len hajbnase, pa spreminđa pe ple borjencar te irini pe ano Vitlejem. 7 Ađahar oj iklili ple duje borjencar taro than ano savo živinđa, pa lelja olencar te irini pe ani phuv Juda.

8 Tegani i Nojemina phenđa ple duje borjenđe: "Nek svako tumendar irini pe pla dajaće ano čher. Nek o GOSPOD mothoj plo šukaripe premala tumende sar so hem tumen mothovođen premalo mle pokojna čhave hem premala mande. 9 Nek o GOSPOD del svakonaće tumendar te arakhen mir ano čher tumare romesoro."

Tegani čumudinđa len. A on sa glasoja runde, 10 pa phende laće: "Na, amen ka irina amen tuja koro to narodo."

11 Ali i Nojemina phenđa: "Irinen tumen čhere, mle čhaja. Sose te džan mancar? Zar ka bijanav pana čhaven kola bi šaj ine te oven tumenđe roma? 12 Džan, irinen tumen, mle čhaja. Me injum but purani te dav man. Čak hem kad bi mislinava da isi nada maje, kad bi hem erat dava man, pa te bijanav čhaven, 13 zar ka adžićeren len đikote na barjona? Zar zbog olende te ačhoven bidinde? Na, mle čhaja. Majei po pharo nego tumenđe, adalese so o GOSPOD irinđa pe protiv mande."

14 Ko adava on palem sa glasoja runde.

Palo adava i Orpa čumudinđa pla sasuja hem dželi, ali i Ruta ačhili olaja.

15 I Nojemina phenđa laće: "Eče ti jetrva irini pe koro plo narodo hem koro ple develja. Irin tut hem tu olaja."

16 Ali i Ruta phenđa: "Ma terin man te ačhavav tut hem te džav tutar. Adalese so, kaj god tu ka dža, ka džav hem me, hem kaj god tu ka živine, ka živinav hem me. To narodo ka ovel mlo narodo hem to Devel ka ovel mlo Devel. 17 Kaj tu ka mere, ka merav hem me hem adari ka ovav parume. Nek o GOSPOD najphare kaznini man te bilo so sem o meriba cidela man tutar."

18 Dikhindoj so i Ruta zorale odlučinđa te džal olaja, i Nojemina ništa više na phenđa. 19 Ađahar on duj džele sa đikote na resle ano Vitlejem.

A kad resle, celo diz lelja te čedel pe zbog olende.

O đuvlja vaćerena ine: "Akava li i Nojemina?"

20 Ali oj phenđa lenđe: "Ma vičinen man Nojemina.* Vičinen man Mara,* adalese so o Devel, kova sa šaj, zagorčinđa mlo dživdipe. 21 Dželjum pherde vastencar, a akana o GOSPOD irini man čuče vastencar. Sose te vičinen man Nojemina kad o GOSPOD irinđa pe protiv mande hem o Devel, kova sa šaj, anđa nevolja upra mande?"

22 Ađahar i Nojemina irinđa pe taro Moav pla borjaja e Rutaja e Moavkaja. Resle ano Vitlejem baš tegani kad počinđa i žetva oto ječam.