1 E Nojemina inele jekh rođako tari ple romesiri strana. Ov inele but barvalo manuš tari loza e Elimelehesiri, kova vičinđa pe Vooz.

2 I Ruta i Moavka phenđa e Nojeminaće: "Muk man te džav ano polje hem te čedav o klaso savo ačhola palo okoleste kova ka mukel maje te čedav."

A i Nojemina phenđa laće: "Dža, mli čhaj."

3 Ađahar i Ruta dželi ano polje, pa čedinđa okova so ačhilo palo bućarne. I ulo adava da ali ano deo oto polje savo pripadinđa e Voozese tari loza e Elimelehesiri.

4 A baš tegani o Vooz alo taro Vitlejem hem pozdravinđa e bućarnen: "O GOSPOD tumencar!"

A on phende lese: "O GOSPOD te blagoslovini tut!"

5 O Vooz pučlja e bućarnengere nadgledniko: "Kasiri okoja terni đuvli?"

6 O nadgledniko phenđa lese: "Adavai okoja terni Moavka koja ali e Nojeminaja taro Moav. 7 Pučlja man: ‘Molinava tut, muk man te čedav o klaso savo ačhola maškaro snopija palo bućarne.’ Oj ali rano sabale hem ačhili sa đi akana – samo hari odmorinđa pe ano hlado."

8 Tegani o Vooz phenđa e Rutaće: "Šun, mli čhaj. Ma dža ano aver polje te čede hem ma dža akatar, nego ačhov akate mle sluškinjencar. 9 Dikh ko savo polje mle sluge ka čeden, pa tu dža palo sluškinje. E slugenđe naredinđum te na dirinen tut, a kad ka ove žedno, dža adari kaj o čare hem pi pani savo o sluge dolinde."

10 Ko adava oj pokloninđa pe mujeja đi phuv, pa phenđa lese: "Sar adava da arakhljum esavki milost angla tute te dikhe upra mande iako injum abanđika?"

11 A o Vooz phenđa laće: "Phende maje sa so ćerđan te sasujaće palo meriba te romesoro – sar dželjan te dadestar hem te dajatar hem sar ačhavđan o than kaj injan bijandi hem aljan te živine e narodoja kole angleder na pendžarđan. 12 Nek o GOSPOD platini će za okova so ćerđan. Nek nagradini tut barvale o GOSPOD, o Devel e Izraelesoro, talo kasere phaka aljan te garave tut."

13 I Ruta phenđa: "Muk i dalje te arakhav milost angla tute, gospodarona. Utešinđan man hem šukar vaćerđan mancar, te sluškinjaja, iako na injum sar avera te sluškinje."

14 Kad inele o vreme zako ručko, o Vooz phenđa laće: "Ava akari te ha amencar, le o maro hem macin ano sirće."

Oj beštini uzalo bućarne, a ov dinđa la pržime zrnja. Oj halja sa đikote na čalili, hem ačhilo la pana.

15 Kad uštini te čedel okova so ačhola ine palo bućarne, o Vooz naredinđa ple slugenđe: "Muken la nek čedel hem maškaro snopija, ma braninen laće! 16 Čak hem namerno peraven o klasija taro snopija hem ačhaven laće te čedel, hem ma ukorinen la."

17 Ađahar oj čedinđa đikote na peli i rat, a onda odvojinđa o zrnja hem čedinđa ani korpa deš kilja ječam. 18 Oj lelja adava hem irinđa pe ani diz, pa lakiri sasuj dikhlja kobor čedinđa. I Ruta ikalđa hem okova so ačhilo la oto ručko hem dinđa e Nojeminaće.

19 Lakiri sasuj pučlja la: "Kaj čedinđan adava avdive? Kaj ćerđan buti? Nek ovel blagoslovime okova kova dikhlja upra tute!"

Tegani oj vaćerđa pla sasujaće kaj ćerđa buti hem phenđa: "O manuš kora kaste avdive ćerđum buti vičini pe Vooz."

20 I Nojemina ko adava phenđa pla borjaće: "Nek blagoslovini le o GOSPOD, kova na ačhavđa te mothoj mangipe hem premalo dživde hem premalo mule!" Hem pana phenđa: "Adavai manuš amaro paše rođako, jekh okolendar kovai odgovorno te otkupini amen."

21 Tegani i Ruta i Moavka phenđa: "O Vooz čak phenđa maje: ‘Ov uzalo mle sluge đikote na čedena sa mlo điv.’ "

22 A i Nojemina phenđa e Rutaće, pla borjaće: "Šukari, mli čhaj, te ove uzalo lesere sluškinje, adalese so ko aver polje neko bi šaj te ćerel će nešto bišukar."

23 Ađahar i Ruta inele uzalo sluškinje e Voozesere hem čedinđa o klaso đi o kraj oti žetva e ječamesiri hem e đivesiri. A živinđa kori pli sasuj.