1 Jekh dive i Nojemina phenđa pla borjaće e Rutaće: "Mli čhaj, mora te arakhav će čher, kote ka ovel će šukar. 2 Eče, o Vooz, kasere sluškinjencar ćerđan buti, ovi amari rođako. Ov erat ka ćerel buti ko gumno.* 3 Thov to muj, makh tut miris hem šukar urjav tut, pa hulji đi o gumno. Ali ma te dikhel tut da injan adari đikote na završini plo hajba hem piba. 4 Kad ka džal te sovel, tu dikh kaj pašlilo, pa dža adari. Tegani pučar lesere pre hem pašljov adari, a ov ka phenel će so te ćere."

5 A i Ruta phenđa: "Ka ćerav sa sar so pheneja maje."

6 Ađahar oj huljili đi ko gumno hem ćerđa sa sar so phenđa laće lakiri sasuj. 7 Kad o Vooz završinđa o hajba hem o piba, oraspoložinđa pe hem dželo te pašljol uzali bari kupa e đivesiri. Tegani i Ruta ali pohari đi oleste, pučarđa lesere pre hem pašlili. 8 Ani ekvaš i rat, o Vooz otojekhvar uštino, irinđa pe hem dikhlja e đuvlja sar pašljola uzalo lesere pre.

9 Ov pučlja la: "Ko injan tu?"

A oj phenđa: "Me injum i Ruta, ti sluškinja. Adalese so injan mlo paše rođako, tu injan odgovorno te otkupine man. Molinava tut, le man romnjaće."

10 O Vooz phenđa: "O GOSPOD te blagoslovini tut, mli čhaj. Akava to čin e mangipnasoroi po vredno okolestar so angleder ćerđan, adalese so na rodinđan terne čhave – ni čorore ni barvale. 11 A akana ma dara, mli čhaj. Tuće ka ćerav sa so mangeja, adalese so sare ani amari diz džanen da injan pošteno đuvli. 12 Čače injum to paše rođako hem odgovorno injum te otkupinav tut, ali isi jekh manuš kovai će po paše rođako mandar. 13 Nakhav i rat akate, a sabale, te ov manglja te otkupini tut sar klo paše rođako, šukari, nek otkupini tut. Ali, te ov na manglja, anglo dživdo GOSPOD hava će sovli, me ka otkupinav tut. Pašljov akate đi sabale."

14 Ađahar oj pašlili uzalo lesere pre đi sabale, ali oj uštini angleder nego so dičhilo sar te na pendžari pe lakoro muj, adalese so o Vooz phenđa: "Na valjani te šunđol da i đuvli ali ko gumno."

15 Tegani o Vooz phenđa: "De man adaja šamija savi upra tute hem phrav la."

Oj phravđa la, a ov ano late čhorđa bišu pandž kilja ječam hem vazdinđa laće ko dumo. Palo adava ov irinđa pe ani diz.

16 A kad i Ruta resli kori pli sasuj, oj pučlja la: "Sar inele, mli čhaj?"

Tegani i Ruta vaćerđa pla sasujaće sa so ćerđa laće o Vooz, 17 pa phenđa: "Dinđa man akala bišu pandž kilja ječam, vaćerindoj: ‘Našti te irine tut čuče vastencar kori ti sasuj.’ "

18 Tegani i Nojemina phenđa: "Adžićer, mli čhaj, đikote na dodžaneja so ka ovel, adalese so ov naka smirini pe đikote pana avdive na završini sa."